Read lugbara E’doza 38 Bible Online

E’doza 38 - lugbara bible

E’doza 38

¹Eri nga eca o’du ’dasi Yuda nga i adripi ku, nga si va nga i oja fizu ’ba Adulamuari azini ma akua, runi Hira’i.

²’Dale Yuda nga ’ba Kananini ma azi ma zamva ndre, runi Sua’i; eri nga eri ’du ra, nga la erisi.

³Eri nga mva isu ra, nga mva osi agupiani, eri nga runi ’da Eri’i.

⁴Eri nga mva isu dika, nga Vini osi agupiani, nga runi ’da Onani’i,

⁵Eri nga vini mva azini ti, nga runi ’da Sela’i. Osi eri de eri Kezibua.

⁶Yuda nga oku je Eri i ma mvi okori dri, runi Tamari’i,

⁷Te Eri, Yuda ma mvi okol’i, ovu’ba onzini Yehova ma milia; Yehova nga eri fu ani.

⁸Yuda nga ’yo Onani ma tia, Mi fi oku mi adripini vu, mi ’ye ’ba drapiri ma adrini adrile ’yelerile, mi ti mi adri ma ori.

⁹Te Onani ni ra kini ori ngani ovu erini ku; te eri nga eca ’dini, eri ka fi oku i adripini vu, eri nga orini ada nyakua, eri kazu ori tizu i adrini ku.

¹⁰E’yo nde erini ’yeleri ovu onzi Yehova ma milia; eri nga vini eri fu indio

¹¹Yuda nga di ’yo i zia Tamari ma tia, Mi te awuzioru mi ati vile ’de cazu kpere ma mvi Selani ngaria mbaria; a’disiku eri ’yo ra, Eri kazu drazu eri ma adripile indi ku. Tamari nga mvi ani ovu i ma ati vile.

¹²O’du ka aga ra, Sua zi Yuda vile okuri nga dra ra; Yuda ka asi omiza isu ’bo, eri nga tu uru ’ba eri vile kabilo ’biko olipi ’diyi vu Timinaa, yi’i agyi Hira ’ba Adulamuari be.

¹³’Ba olu e’yo Tamarini ’kini, Mi nare, mi anyi etu Timinaa kabilo i vile ’diyi ma ’biko olizu.

¹⁴Eri nga ani bongo erini awuzioniri tru i ruaarisi ra, nga bongo ’beza ’be i ruaa, nga i a’bu ci, aga mu ri kalitile Enaimu ovupi geri, mupi Timinaari ma Haria; erini ndrele kini Sela mba ’bo, te yi feni i eri dri okuro kurisi.

¹⁵Yuda ka eri ndre ra, eri ega eri oku acipi saaruni, erini i mile a’bule cirisi.

¹⁶Eri nga i ja i eri vu geri kalaa, nga ’yo, Ma zi mi, mi fe a fi mi vu fo; erini nile kini eri i zia’i kurisi. Eri nga ’yo ra, Mi nga ma dri a’di afa fe, mi ka fi ma vuria?

¹⁷Eri nga ’yo ra, Ma nga mi dri ndriamva ndri o’biru ma eseliari fe’i, Eri nga ’yo ra, Mi nga ma dri afa ku toboru de nga mi peni eri ti ku ya?

¹⁸Eri nga ’yo ra, Ma nga mi dri a’di ma afa ku toboru ya? Eri nga ’yo ra, Driadriamva mini ecetaruri pi, baka mini pi, kali mi driari pie. Eri nga yi fe eri dri, nga fi la erisi, eri nga mva isu i alia erini.

¹⁹Eri nga enga ra, nga bongo ’beza ini tru ra, nga bongo ini awuzioniri su dika.

²⁰Yuda nga ndrimva ndri o’biru ma eseliari ma ti pe agyi erini ’ba Adulamuari ma dria, afa toboru nde onzezu oku nde dri, te isuni eri ku.

²¹Eri nga di ’ba ovupi pari ndea ’diyi zi kini, Oku saaru ndra Enaimua geri tiari ngoa ya? Te yi ’yo eri tia, Oku saaroni oku ’doa yo.

²²Eri nga di emvi Yuda vu, nga ’yo tinia, Ma isuni eri ku; ’ba pari ndea ’diyi ’yo vini indi kini, Oku saaruni oku ’doa yo.

²³Yuda nga ’yo ra, Le te ma ’du afa nde i ma afaru, ama kazu drinza isuzu ku; mi ndre, ma pe ndriamva ’diri ma ti ra, te mi isuni eri ku.

²⁴Eri nga eca ’dini, ka ca mba nale ’ba olu Yuda ma tia kini, Mi zia Tamari ofu mile aci be, azini vini mi ndre, ti mva aliru ’bo. Yuda nga ’yo ra, Emi eji eri ’doa, ma eve eri acisi.

²⁵Yi ka eri ofu amve ’bo, eri pe ’ba ti anyi vu, kini, Mva ma aliari afa ’diyi ma e’ini. Eri nga ’yo ra, Mi ini nga,ma zi mi fo, afa ’diyi, driadriamva ecetaruri pi baku pie kali pie, bani yi a’dini ya?

²⁶Yuda nga afa nde a’i ra, nga ’yo ra, Eri ma e’yo kilili aga mani ra, mani eri fele ma mvi Sela dri kurisi. Asini la erisi dika ku.

²⁷Eri nga eca ’dini, o’du mvaazoni eri e’duzurisi, mi ndre, anzi yi ejoru eri ma opojoa.

²⁸Eri nga eca ’dini, erini nga osiria, mva aluri ega dri esu amve; oku eri osipiri nga baka ekaru ’du a’di eri ma dria, kini, Mva ’diri efu okoni.

²⁹Te eri nga eca ’dini, eri ka i dri se vile ’bo, mi ndre, adripi osi ra; eri nga ’yo ra, Mi asi pari mi dri okposi ’dini a’disi ya? ’Da runi ani Perezi’i.

³⁰Eri ma adri baka ekaru be driari nga osi vileru, ’da eri ma ru Zera’i.