Read lugbara E’doza 39 Bible Online

E’doza 39 - lugbara bible

E’doza 39

¹Ji Yusufuni Misiria ra; Misiriou alu, runi Potifari, ’ba azi ngapi Farau dri, asikari opi ma agei tepi ’diyi ma driliari, je eri ’ba Isimaelini eri jipi ’dale ’diyi dri.

²Yehova ovu Yusufu be, eri ofu ’ba drilebaru; eri ovu eri ma opi Misirioururi ma joa.

³Opi erini ndre kini Yehova ovu eri be, azini Yehova fe afa dria erini ’yele ’diyi ma eca eri dri drilebaru.

⁴Yusufu nga asi ndriza isu eri vu ra, eri nga azi nga eri dri; eri nga eri ’ba aku erini ma drilia, nga afa dria erini ovuzu yi be ’diyi ku eri dria.

⁵Te eri nga eca ’dini, engazu o’du erini eri ’bazu aku erini ma drilia, afa dria erini ovuzu yi be ’diyi kuzu eri ma driarisi, Yehova fe asi ndriza aku Misiriou vileri dri e’yo Yusufunisi; asi ndriza Yehovaniri ovu ani afa dria erini ovuzu yi be ’diyi ma dria, kani joa, kani amvua.

⁶Eri nga afa erini ovuzu yi be ’diyi ku Yusufu dri dria ra; eri nini afa erini ma e’yo aluni ku, pe lu nyaka erini nyaleri’i. Te Yusufu ma mile ndrizaru, ruani alaru.

⁷Eri nga eca ’dini e’yo ’diyi ma vutia, opi erini ma oku nga mile ’ba Yusufu ma ruaa avasi, nga ’yo eri tia, Mi la masi.

⁸Te eri gasi, nga ’yo opi vile okuri ma tia, Mi ndre, opi mani nini afa ovupi ma be joa ’diyi ma e’yo ku, te eri ku afa erini dria ovuzu yi be ’diyi ma dria ’bo;

⁹’ba aluni ma agapi jo ’dori ma aliani yo, eri kuni afa aluni ma dri fekokoru ku, pe lu mi’i, mini ovule oku erinirisi; ma eco di ezata amboru ’diri ezazu, azini e’yo onzi ’yezu Mungu vu ngoni ngoni ya?

¹⁰Eri nga eca ’dini, eri ka e’yo ’yo Yusufu be etuzu etuzu ti, eri a’ini e’yo erini ku, kani lazu eri be kani ovuzu eri be aluni ku.

¹¹Eri nga eca o’du azinisi ’dini, eri nga fi joa azi erini ngazu, de isu ’ba adripi ovupi joa ’diyi ovuni jo nde ma alia etu ’dasi ku.

¹²Oku nde nga bongo erini bi, nga ’yo kini, Mi la masi fo! Eri nga bongo erini ku eri ma dria, nga apa fu amve ra.

¹³Te eri nga eca ’dini, oku ka ndre eri ku bongo i dria, apa ’bo ’dini,

¹⁴eri nga ’ba adripi ovupi joa ’diyi omve, nga ’yo yi tia kini, Mi ndre, eri ji Ebrahimu ama vu, emuzu ama aji dizu; eri fi ma vu lezu lazu masi, te ma ga lulu o’duko urusi;

¹⁵te eri eca ’dini, eri ka eri mani lulu garia o’duko urusi eri ku bongo ini ma vu ’de, fu di apa ra.

¹⁶Eri nga bongo erini ma ta mba i vu ci, de nga opi erini ecani akua ku.

¹⁷Eri nga ’yo eri tia e’yo takarile, kini, Ati’bo Ebraniouru mini ejile ama vuri, efi ma vu ma aji dizu;

¹⁸te eri eca ’dini, ma ka lulu ga o’duko urusi, eri nga i ma bongo ku ma vu ’de, nga apa amve.

¹⁹Eri nga eca ’dini, opi erini ka e’yo oku i vilerini ’yoleri eri ra, kini, Ati’bo mini ’ye ma vu ’dini ’dini; asi erini nga ve aokosi.

²⁰Opi Yusufuni nga di eri ’du ’ba arujoa, pari yini opi amboruri ma ’ba aruru ’diyi ma ta mbazuria; eri ovu arujoa ’daa.

²¹Te Yehova ovu Yusufu be, nga asi ndriza fe eri dri, nga fe ’ba arujo ma agei tepiri ma ovu eri vu yikisi.

²²’Ba arujo ma agei tepiri nga ’ba ombele arujoa ’diyi ku dria Yusufu ma dria; afa dria yini ’yele ’daleri, eri yi ’yeni.

²³’Dini ’ba arujo ma ma agei tepiri luni afa azini ovupi Yusufu ma driari ku, Yehovani ovule eri berisi; azini Yehova fe afa dria erini ’yeleri ma eca drilebaru.