Read lugbara E’doza 4 Bible Online

E’doza 4 - lugbara bible

E’doza 4

¹Agu nde nga oku ini Evani ni ra; eri nga mva isu eri ma alia, nga Kainini osi ra, nga ’yo kini, Ma isu agupimva, Yehovani ma aza kolerisi.

²Eri nga vini adri Habilini ti ra. Habilini eri ’ba kabilo ocepiri, te Kainini’ba amvu’yapiri’i.

³Teeri nga eca ’dini o’du azini ma vutia, Kaini nga afa kapi amvua ’diyi maazi eji fe edetaru Yehova dri.

⁴Habilini vini indi nga ini kabilo o’biru ma anzi otile oko ’diyi ma azi eji edetaru, oso yini be. Yehova nga Habilini a’i ra edeta erini be,

⁵te a’ini Kainini edeta erini be ku. Kaini nga di ovu aokosi tu, eri ma mile nga bi ini.

⁶Yehova nga ’yo Kaini ma tia kini, Mi aoko be ’dini a’disi ya? Mi mile bi ini a’disi ya?

⁷Mi ka e’yo onyiru ’ye, ma ngani mi a’i ku ya? Te mi ka e’yo onyiru ’ye ku, isu e’yo onzini mi te jotilea; e’yo erini leleri le mi mba, te mi ma nde eri ovuzu opiru eri drilia.

⁸Kaini nga ’yo i adripi Habili ma tia kini, Onyiru ama ma fu mu amvua. Te eri nga eca ’dini, yini de ovuria amvua, Kaini nga enga i adripi Habili ma ruaa ombasi, nga eri fu kai ra.

⁹Yehova nga di ’yo Kaini ma tia, Mi adri Habilini ngoa ya ? Eri nga ’yo ra, Ma nini ku; ma ’ba ma adripi ma ta mbapiri ma’i ya ?

¹⁰Eri nga ’yo eri tia, Mi ’ye ngoni ya? O’duko mi adripi ma ariniri wu ma bilia engazu nyakuarisi ’do.

¹¹Te curu’do mi ovu trizaru nyakuarisi ’bo, nyaku nderini i ti zile mi adripi ma ari mini adaleri mvuzurisi.

¹²Mi ka nga nyaku nde ’ya ra, eri ngani curu’do afa ka mi dri eri ma okposi ku; mi nga ovu ’ba apapi apariru, azini ’ba abapi saaruriru oro drisi dria.

¹³Kaini ang ’yo Yehova ma tia, Panga mani nde ma ra, okpo mani eri ’duzu yo.

¹⁴Mi ndre, mi dro ma andru nyakuarisi bo; ma nga ovu zizaru mi milia; ma nga ovu ’ba apapi apariru azini ’ba abapi saaruriru oro drisi dria, te eri nga eca ’dini, ’ba ma isupiri nga ma fu ra.

¹⁵Yehova nga ’yo eri tia, E’yo ’disi ’ba ka Kainini fu ra, eri nga avutani ofe paleko aziri. Yehova nga eceta ’ba Kaini ma dria, ’ba eri isupiri kazu eri ’dizu ku.

¹⁶Kaini nga di fu Yehova ma driliarisi, nga mu ovu angu Nodia Edeni ma kala etuni efurialeruria.

¹⁷Kaini nga oku erini ni ra, eri nga mva isu eri ma alia, nga Enokani ti ra; eri nga vini aku amboru si, nga aku nde ma ru ’da Enoka’i mvi erini ma ru vusi.

¹⁸Osi Iradini Enoka dri; Irari ti Mehuyaelini, Mehuyaeliti Metusaelini, Metusaeli ti Lame-kini.

¹⁹Lameki nga ini oku o’du iri; aluri ma ru Ada’i, aziniri ma ru Zila’i.

²⁰Ada ti Yabalini; eri ’ba ovupi hema ma alia anyapa ocepi ’diyi ma a’bi.

²¹Adripi ma ru Yubali’i; eri ’ba dria o’di copi ejeleko vupi ’diyi ma a’bi.

²²Zilani ti vini ini indi Tubali-kainini; eri oka dipi afa dria si ciza be edele molasi kani ayasi ’diyiedepiri’i.Tubalikaini ma amvini Naama’i.

²³Lameki nga di ’yo okupi ma tia: Ada pi Zila be, emi ma eri ma o’duko fo! Emi Lameki okupi la, emi eri e’yo mani ’yoleri: Ma ’di ’ba ’bo erini ebi ’bale ma ruaarisi; ma ’di karilau ’bo erini ma colerisi.

²⁴Yi ka Kaini ma avuta ofe paleko aziri, yi nga Lameki ma avuta ofe paleko kali aziri drini aziri adada.

²⁵Adamu nga oku erini ni dika, eri nga mva ti, nga runi ’da Seti’i;[1] eri kini, Te Mungu ’ba ma dri ori azini Habili paria ’bo, Kainini eri fulerisi.

²⁶Seti dri indi, ti mva eri dri, ’da runi Enosi’i. Ewu nde ’dasi ’ba e’do Yehova ma ru omve.