Read lugbara E’doza 43 Bible Online

E’doza 43 - lugbara bible

E’doza 43

¹Abiri ovu okporu tu angua.

²Te eri nga eca ’dini, yi ka nyaka yini ejile Misiriari nya de ’bo yi ati nga ’yo yi tia, Emi mu dika, emi je nyaka were ama dri.

³Yuda nga ’yo eri tia kini, Agu nde azi ndra e’yo ama tia asi driasi kini, Emi ngani ma mile ndre dika ku, pe lu emi adripi ma ovu emi be ka!

⁴Mi ka a’i ama adripi ti pezu ama be, ama nga si ’dale nyaka jezu mi dri;

⁵te mi ka eri ti pe ku, ama ngani si ’dale ku, agu ndeni ’yole ama tia, Emi ngani ma mile ndre dika ku, pe lu emi adripi ma ovu emi be ka, ’dinirisi.

⁶Israeli nga ’yo ra, Emi ’ye ma vu onzi ’yozu agu nde ma tia emi adri azini ci, ’diniri a’disi ya?

⁷Yi nga ’yo ra, Agu nde ozi ama e’yo okposi, ori’ba amani ma e’yo pie, kini, Emi atini nga idriru ya? Emi adri azini indi ya? Ama olu eri ma tia e’yo awa’diyile; ama eco ndra ni eri ndra ’ye ’yo kini, Emi eji emi adrini ’doa, ’diniri ngoni ngoni ya?

⁸Yuda nga ’yo i ati ma tia, Mi pe mva ma ti ma be, ama di nga dri ko mu ani, ama ma ovu di idriru, ama ma dra ku ama’i, mi pie, anzi nyiri amani ’diyi be dria.

⁹Ma nga tani mba ma’i; mi nga e’yoni zi ma tia. Ma ka eri eji mi vu idika ku, eri ’bazu mi milia ku, e’yo onziniri ma ovu ma dria ’dani ’dani;

¹⁰a’disiku ama ka ndra dri ici ku, te’do ama mvi ’dale pale iriria ’bo.

¹¹Yi ati Israeli nga ’yo yi tia, Ka adri ’dini, emi ’ye ’dinile: emi ’du patiefi onyiru angu ’doria ’diyi ma azi afazu emini ma alia, emi ji afa feza agu nde dri, odu arikariru pi were, anyuoso were pie, afa arikariru ’diyi pie, ajinguru pie, patiefi pie, patiefi alimondiru ’diyi pie dria.

¹²Emi ’du silingi emi dria ndrarile ndrarile paleko iri; te emi ji silingi indra omvile gunia emini ma tia ’diyi emi dria; kani omvi ’dini tavisi yani.

¹³Emi ma ’du emi adrini indi, emi ko dri mu agu nde vu dika;

¹⁴Mungu okpoe’i ma fe emi dri yiki isuzu agu nde vu, eri ma tru emi dri emi adri aziri pi Benyamini be beni. Ma ka di nga ovu anzi kokoru, ma ma ovu di.

¹⁵’Ba nde nga afa feza nderi ’du ra, nga vini silingi ndrarile paleko iri ’diyi o’du yi ma Idria, nga Benyaminini ji indi; yi nga ra, nga si mu Misiria, nga pa so Yusufu ma milia ra.

¹⁶Yusufu ka Benyaminini ndre yi ma eselia, eri ’yo ’ba jo erini ma,agei tepiri ma tia, Mi ofi ’ba ’diyi joa, mi mu za li, mi ede afa ngonde, ’ba ndeni ngale nyaka etu agaduari nyale ma berisi.

¹⁷Agu nde ’ye Yusufuni azilerile; agu nde nga ’ba nde ofi Yusufu vile joa,

¹⁸’Ba nde ’diyi ovu ani urisi ’bani yi ofile Yusufu vile joarisi, yi nga ’yo ra, Yi ofi ama silingi ndraka omvile gunia amani ma alia ’diyi ma e’yosi, eri le e’yo nda ama ruaa, eri ma enga ani ama ruaa ombasi, ma obi ama ati’baru, ma opa akanya amani indi beni.

¹⁹Yi nga yi osi ’ba Yusufu ma jo ma agei tepiri vu ogogo, nga e’yo ’yo eri be jotilea,

²⁰kini, Opi mani la, ama eca ndra okorisi nyaka jezu ada ada;

²¹te eri eca ’dini, ama ka ca ndra pari amani lazuria, ama zi gunia amani ma ti, te mi ndre, ’bai dria alu alu ma silingi ovu gunia erini ma tia, silingi nde yi ndra: o’bilerile pari ’da vusi; ama eji di yi dika ama dria indio

²²Ama eji vini silingi azini nyaka jezu indio. Te ama nini ’ba silingi nde omvipi ama gunia ma aliari a’di’i yari ku.

²³Eri ’yo ra, Emi asi ma ovu anzuru, emi ru ku; Mungu emini azini Mungu emi atiniri fe lonyi emi dri gunia emini ma aliani; ma’i, ma ’du ndra silingi emini ra. Eri nga Simeoni ofu yi vu.

²⁴Agu nde nga ’ba nde ofi Yusufu vile joa, nga yi eji yini ani yi ma pa ojizu, eri nga nyaka fe akanya yini dri.

²⁵Yi nga afa feza nde ede ngonde de nga Yusufu ecani etu agaduarisi ku, yini erile kini yi nga aka nya ’dalerisi.

²⁶Yusufu ka eca akua ’bo, yi nga afa feza ovupi yi ma dria ’diyi eji eri vu joa, nga avu va nyakua eri inzizu.

²⁷Eri nga yi ngoni yari zi, nga ’yo ra, Emi ati mbazauru emini ndra, e’yoni ’yoleri onyiru ya? Eri nga idriru ya?

²⁸Yi nga ’yo ra, Ati’bo mini ama atini onyiru, eri nga idriru ra. Yi nga yi dri elu va eri inzizu.

²⁹Eri nga i mile enga uru, nga i adripi Benyamini i andrini tileniri ndre, nga ’yo ra, ’Diri emi adri werea emini e’yoni olule ma tiari’i ya? Eri ’yo ra, Mungu ma fe mi dri asi ndriza fo, ma mvi ’la!

³⁰Yusufu nga ’ye mbele mbele, i adripi ma avani i vale turisi, eri nga pari wuzu mindresiri nda. Eri nga fi jo aliza eriniri ma alia, nga wu mindresi’daa.

³¹Eri nga di i mile oji, nga fu ra; eri nga i asi imba, nga ’yo ra, Emi eji nyaka.

³²Yi nga nyaka eji erini ndu, yini ndu, ’ba Misiria nyalea nyapi eri be ’diyini ndu indi; ’ba Misiria ’diyini adrile nyaka nyale ’ba Ebraniani be tualu kurisi, e’yo ndeni ovule e’yo ngule onzi ’ba Misiria ’diyi ma miliarisi.

³³Yi nga ri eri ma milia, mva osile okori ri drile osita erini vusi, wereari eli erini wereri vusi, ’ba nde yi nga e’yo osu yi eselia.

³⁴Eri nga nyaka eriniri ’du awa fezu yi dri, te esele fele Benyamini driri aga nyaka fele yi ma azi driri paleko towi. Yi nga di afa mvuza mvu, nga ovu ayikosi eri be.