Read lugbara E’doza 48 Bible Online

E’doza 48 - lugbara bible

E’doza 48

¹Eri nga eca ’dini e’yo ’diyi ma vutia, ’ba azini nga e’yo olu Yusufu ma tia kini, Mi ndre, mi atini azoru; eri nga anzi erini iri ’diyi, Manase pi Efiraimu be, ’du eri be.

²’Ba nga e’yo olu Yakobo ma tia kini, Mi ndre, mi mvi Yusufuni emu mi vu; Israeli nga ani i opi okposi, nga ri gbolo ma dria,

³Yakobo nga ’yo Yusufu ma tia, Mungu Okpoe’ini i e’dapi ma dri ndra Luzia angu Kananiniari, fe ma dri asi ndriza,

⁴’yo ndra ma tia, Mi ndre, ma nga fe mi orini yi erezu, drile drile, ezuzu kakau, ma nga mi ’ba ovuzu suru ongulumuru, ma nga angu ’dori fe ori mini mi vutia ’diyi dri awita ’dani ’daniru.

⁵Te curu’do anzi mini iri, otile mi dri angu Misiriaria de nga ma cani mi vu angu Misiriaria ku ’diyi, yi mani; Efiraimu pi nga ovu mani Manase be, ekile Rubeni pini ovule mani Simeoni berile.

⁶Ori mini mini ngale tile yi vutia ’diyi nga ovu mini; yi runi nga ovu omvezaru yi adri ma ru vusi awita yini ma alia.

⁷Te ma’iruni, ma ka ndra ibi enga Padaniasi, Rakeli dra ndra ma dri geria angu Kananiari ma alia, gerini aceria nga izu were cazu Efiratiaria; ma sa eri ma avu geri muzu Efiratiaria (pari nde Betelehemu’i).

⁸Israeli nga anzi Yusufuni ndre, nga zi kini, ’Diyi a’dipiyi ya?

⁹Yusufu nga ’yo i ati ma tia, Yi anzi mani, Munguni fele ma dri ’doa ’diyi. Eri nga ’yo ra, Mi eji yi ma vu, ma zi mi tia, ma di asi ndriza fe yi dri ra.

¹⁰Isu de Israeli ma mile obi de ma e’yosi ’bo, econi ani erini afa ndrezaru ku. Eri nga yi eji eri vu ogogo; eri nga yi ma o’bolo ndru, nga yi o’du i ma dria.

¹¹Israeli nga ’yo Yusufu ma tia, Ma egani ndra ma nga mi mile ndre ra ’dini ku; te mi ndre, Mungu fe vini mani mi ori ndrezu indio

¹²Yusufu nga yi ofu i ma palaasi, eri nga avu va o’bukuru nyakua.

¹³Yusufu nga yi ’du iri tro, Efiraimuni i ma dri ndia Israeli ma dri ejialeru, azini Manaseni i ma dri ejia Israeli ma dri ndialeru, eri nga yi osi ani eri vu ogogo.

¹⁴Israeli nga i dri ndiri eju, nga ’ba mva werearu Efiraimu ma dria, nga i dri ejiari eju Manase ma dria, i dri alazu i agyi drisi erini e’yoni nilenirisi, Manaseni ovule mva tile okori’irisi.

¹⁵Eri nga asi ndriza fe Yusufu dri, nga ’yo ra, Mungu ma ati Iburahimu pini acizu drilenia Isaka be, Mungu nyaka fepi ma dri o’du mani ovuzu idrirurisi dria cazu kpere andruri,

¹⁶malaika ma onzepi e’yo onzi dria ma aliari ma fe asi ndriza anzi ’diyi dri; ma omve ma ru ’dani yisi, ma omve ma ati Iburahimu pi ma ru yisi Isaka be indi; yi ma ezu ovuzu ’ba ongulumuru amboru oro ma dria.

¹⁷Te Yusufu ka ndre i ati ’ba eri ma dri ndiri Efiraimu ma dria, e’yo nde ovu eri ma milia onzi; eri nga i ma ati ma dri ’du uru, eri ’duzu Efiraimu ma driarisi ’bazu Manase ma dria.

¹⁸Yusufu nga ’yo i ati ma tia, ’Dini ku, ma ati la; te mva ’diri mva okori’i; mi ’ba mi dri ndiri eri ma dria.

¹⁹Te ati gasi, nga ’yo ra, Ma ni ra, mva mani la, ma ni ra; eri nga efu ovuzu sururu indi, eri’i nga ovu amboru indi; te ti, adri wereri nga eri aga ambosi ra, eri ma orini nga efu ovuzu suru ongulumuru.

²⁰Eri nga asi ndriza fe yi dri o’du ’dasi, kini, Israelini nga asi ndriza fe ’ba dri emisi, ’yozu kini, Mungu ’ba mi ovuzu Efiraimu pile Manase be; ’dini eri ’ba Efiraimuni Manase ma drilia oko.

²¹Israeli nga ’yo Yusufu ma tia, Mi ndre, ma nga dra ra, te Munguni nga ovu emi be, nga emi ji emi a’bipi ma angua dika.

²²Azini indi, ma fe mi dri angu ma esele alu amboru ’bo, aga mi adripi driri ra, angu nde mani ndra pale ’ba Amorini ma driasi sei mani pisi osu mani beri’i.