Read lugbara E’doza 49 Bible Online

E’doza 49 - lugbara bible

E’doza 49

¹Yakobo nga i anzipi omve, nga ’yo ra, Emi oku emi tualu, ma ma olu emi tia e’yo ngapi i ’yepi emi vu ewu vileria ’diyi ani.

²Emi Yakobo anzipi la, emi oku emi e’yo erizu, emi eri emi ati Israeli ma e’yo ra.

³Rubeni la, mi mva mani kayuri, okpo mani, azini mvi oko mani ma okpo e’dozuri; mi aga ’ba azini ’diyi inzitasi tu, okposi indi ra ’bo,

⁴mi adrini pa so pari alua ku, mi adri mbu yile, mi ngani aga onyisi ku, mini ndra tule mi ati ma gbolo! driarisi; etu ’dasi mi eza eri ra; eri tu gbolo mani dria!

⁵Simeoni pi Levi be yi adripiru; sei yini yi afa ’ba ’yezu okposi ’diyi,

⁶Orindi mani la, mi emu pari yini e’yo amazuri ma alia ku; mi diza mani la, mi eci mi ti yi be okuza yini ma alia ku; a’disiku yini ndra ’ba ofule aoko yinisirisi, eganja yinisi yi oli ti ma isu paari ra.

⁷Adra yini ma ovu trizaru, erini ovule okporurisi; aoko yini ma ovu trizaru indi, erini ovule yoo kokorurisi! Ma nga yi awa Yakobo ma alia, ma nga yi ere Israeli ma alia.

⁸Yuda la, mi adripi nga mi inzi ra; dri mini nga ovu ari’ba mini ma ombelea; mi ati ma anzipi yi nga avu va mi drilia.

⁹Yudani kamimvani; mi enga anyapa dileri ma driarisi ’bo, ma mvi la! Eri avu va, eri la i va kamile, azini kamiandrile; a’dini nga fe erini engazuni ya?

¹⁰Kali opiniri ngani fu Yuda vusi ku, kali ’ba dri cepiriniri ngani fu eri ma palaarisi ku, de nga opi kali nde ma e’iruri ecani ku; suru yi nga e’yo erini ru ra,

¹¹Eri’i akanyamva ini zabibu pati ma ruaa, eri ’i akanyamva ini zabibu pati onyiru turi ma ruaa; eri oji i ma bongo zabibuefi ma susi, eri oji afa suza erini zabibuefi ma arisi;

¹²eri ma mileni nga ovu ekaru zabibuefi ma susi, eri ma sini nga ovu emveru lesusi.

¹³Zebulunini nga ri miri ma kutia; eri nga ovu kuti oguruni pa sozuriru; eri ma lokirini nga ovu Zidoni ma tia.

¹⁴Isakarini akanya okporuni, eri i la va lico kabiloni ma eselia;

¹⁵eri neire pari ava lizuri eri onyiru, anguni indi ayikoru; eri elu i gbudri teri ’duzu, eri ofu ati’boru ayua ’yezu.

¹⁶Danini nga ’ba ini ma e’yo li ekile suru alu Israeli ma eseliarile.

¹⁷Danini nga ovu uri gbokoariru, uriohulu geria, akanya ma paedu gapiriru, ’dini ’ba nzupi akanya ma

¹⁸driari nga e’de juluru va. Ma te pata mini ’bo, Yehova la,

¹⁹’Ba ongulumuru afa opapi ’diyi nga Gadini omi ci ci, te eri nga vini yi ma paedu omi ci.

²⁰Aseri ma nyakani nga ovu osoru, eri tibi onyiru dri fupi opiniruri fe ra,

²¹Nafutalini eba ’bani trule rari’i, eri e’yo ’yoza onyiru ’diyi fe.

²²Yusufuni eri arakala efi kapi turi, eri arakala efi kapi tu yi a’di ma tiarile; arakala erini nyiri ’diyi ra abi ma driasi.

²³’Ba osu be ’diyi ecandi eri tu, yi ca eri ra, inza eri tu;

²⁴te osu eriniri pa so okporu ’dani, wuni pi drini be isu okpo Mungu Okporu Yakoboniri ma drisi (eri ma alia ’Ba kabilo Ocepi, Israeli ma Oniruri),

²⁵ada, Mungu mi atiniri ma drisi, eri’i ngapi mi aza kopiri, Mungu okpoe’ini ma drisi, ngapi mi dri asi ndriza fepiri’i, asi ndriza ’bu ururiari pisi, asi ndriza miri aliru i ajapi valeruriari pie, asi ndriza ba pini opojo beri pie dria.

²⁶Asi ndriza mi atini ’diyi aga asi ndriza ma a’bipi drio ’diyini ra, kpere cazu oni amboru ’dani ’dani ’diyi ma kalati asizuria; asi ndriza ’diyi nga ovu Yusufu ma driani, yi nga ovu agu esele cole i adripi be nduri ma dri’u’bia.

²⁷Benyamini eri ’balau afa ocepi kpi kpirile; o’bitisi eri nga za erini cileri nya teketeke ra, ondresi eri nga afa erini opale ’diyi awa ra.

²⁸’Diyi dria suru Israelini mudri drini iri ’diyi; ’diyi e’yo yi ma atini ’yole yi ma tia, erini asi ndriza feria yi dririari; eri fe asi ndriza yi dri alu alu asi ndriza yini vusi.

²⁹Eri azi e’yo yi tia, nga ’yo yi ma tia kini, Ma nga mu ’ba mani drapi ’bo ’diyi vu; emi ma sa ma ma a’bipi be oni gule amvu Efironi ’ba Hitiniri ma aliaria,

³⁰oni gule nde amvu Makipelani ovupi Mamire drilia angu Kananiaria, Iburahimuni ndra jele amvu Efironi ’ba Hitini be tualu ovuzu awita erini ’ba avu sazuriruri’i.

³¹Osa ndra Iburahimu pi ma avu oku erini Sara be ’daa; osa ndra vini Isaka pi ma avu oku erini Rebeka be ’daa indi; ma sa ndra Leani ’daa

³²amvu nde oni gule ovupi aleniari be ndra jele anzi Hetini driri.

³³Yakobo ka de i anzipi azizu ’bo, eri nga i pa ’du tra ’ba gbolo dria, orindini nga fu ra, mu di ’ba erini drapi ’bo ’diyi vu.