Read lugbara E’doza 6 Bible Online

E’doza 6 - lugbara bible

E’doza 6

¹Te eri nga di eca ’dini, bani ’baria ezuria kakau nyaku driaria, oti ezoanzi indi,

²’dini anzi Munguni ndre kini ezoanzi ovu ndrizaru; yi nga yi ma azi o’du okuru dria yini opelerile.

³Yehova nga di ’yo kini, Orindi mani ngani agata ga ’ba be ’dani ku, erini ovule rua ari berinirisi, te eri ma eli nga ovu turu alu drini kali iri.

⁴’Ba Nefilini[2] ’diyi ovu nyakua eli nde ’dayisi, azini vilerisi, anzi Munguni ka fi ezoanzi ’bani vu, yi nga anzi oti yi dri. ’Ba nde yi ndra ’ba okporu ovupi drio, ’ba ru kuza be ’diyi.

⁵Yehova ndre e’yo onzi ’bani ovu amboru tu nyakua, azini egata dria yini egale asisile yi ma asiari ma alia ’diyi ovu kiri onzi etuzu.

⁶Yehova ovu ani candisi erini ndra ’ba ’bale nyakuarisi, e’yo nde ovu eri ma asia candiru tu.

⁷Yehova nga di ’yo ra, Ma nga ’ba mani ’bale ra ’diyi ma dri ja nyaku ma driarisi ra, ’ba piyi anyapa pie, afa acipi nyakua valesi ’diyi pie, aria ’bua ’diyi pie dria, e’yo mani yi ’bazu rarini ovule candiru ma asiarisi.

⁸Te Noa nga asi ndriza isu Yehova ma milia.

⁹A’bianzi Noani yi ’di. Noa eri ’ba kililiru, eri ezata kokoru a’bianzi erini ma eselia; Noa aci Mungu be.

¹⁰Noa oti anzi na, Semi pi, Hamu pie, Yafeti be.

¹¹Nyaku eza i onzikanyaru Mungu ma milia, nyaku nde ga tre egaqasi.

¹²Te Mungu nga nyaku ndre ra, te mi ndre, eri eza i onzikanyaru ’bo; a’disiku ’ba dria rua ari be ’diyi eza yi ma geri onzi nyakua ra.

¹³Mungu nga ’yo Noa ma tia, ’Ba rua ari be ’diyi ma asiza eca ma milia ’bo; nyakuni gale tre egaqasi e’yo yinisirisi; te mi ndre, ma nga yi dri ja nyaku be tualu.

¹⁴Mi ede mi dri maburu goferi patisi; mi ma ede jo aliza maburu nde ma alia, mi ma obi eri alialeru azini amveleru oderi afa bizurisi.

¹⁵Mi ma ede eri ’dini: maburu nde ma oco ma ovu wuale turu na, walani wuale kali towi, izuni wuale kali na.

¹⁶Mi ma lu geri dizani fizu maburu ma aliari, mi ma de kalani uruleruri cazu wuale alu; mi ma lu maburu ma tile ejenialeru; mi ma ede maburu jo be adrozaru na, valeruri pi, jo adrozaru iriri pie, nari pie dria.

¹⁷Te ma’i, mi ndre, ma nyaku ma dria yi tiza eji ra, ’ba dria rua ari be, ava idrini be yi ma alia ’diyi ma dri jazu ’bu ma etiarisi; afa dria nyaku ma dria ’diyi nga odra ra.

¹⁸Te ma’i, mi ndre, ma nyaku ma dria yi tiza eji ra, ’ba dria rua ari be, ava idrini be yi ma alia ’diyi ma dri jazu ’bu ma etiarisi; afa dria nyaku ma dria ’diyi nga odra ra.

¹⁹Mi ma ofi maburu ma alia afa rua be idriru ’diyi dria ma azi iri iri, esele be dria dria, yi ta mbazu idriru mi be; ma ovu ago pi aroni be.

²⁰Aria piyi esele yini be, anyapa piyi esele yini be, afa dria acipi aci valesi nyakua ’diyi pie esele yini be, afa ’diyi ma esele dria ma emu mi vu iri iri, yi ta mbazu idriru.

²¹Mi ma ’du mini afa nyale nya ’diyi ma esele dria, mi oku yi mi vu; yi nga ovu afa nyazaru emi dri yi be.

²²Noa nga di ’ye ’dini; ekile e’yo dria Munguni azile eri ma tiarile, eri ’ye tro tro.