Read lugbara E’doza 7 Bible Online

E’doza 7 - lugbara bible

E’doza 7

¹Yehova nga ’yo Noa ma tia, Mi emu mi’i ’ba mi vile joa ’diyi be dria, emi fi maburua, mani mi ndrele kililiru ma milia a’bianzi ’diyi ma eseliarisi.

²Mi ma o’du mi be anyapa alaru ’diyi aziri aziri, ago piyi aroni be; te anyapa alaru ku ’diyi iri iri, ago piyi aroni be;

³mi ’du aria ’bua ’diyi indi aziri aziri, ago piyi aroni be, ori ta mbazu idriru wudrikuru dria ma dria.

⁴Te ace nga o’du aziri, mani ngazu ozoo fezu ’dizu nyakua o’du kali su etusi inisi dria; ma nga afa idri be mani o’bale ’diyi ma dri ja dria nyaku ma driarisi.

⁵Noa nga di ’ye tro tro ekile e’yo dria Yehovani azile eri ma tiarile.

⁶Noa ma elini caria turu azia ’boria yi tiza nga eca nyaku ma dria ra.

⁷Noa nga di fi maburua eri’i anzi erini pie, oku erini pie, anzi ma okupiyi be, yi tiza ma e’yosi.

⁸Anyapa alaru ’diyi piyi anyapa alaru ku ’diyi pie, aria pie, afa dria acipi aci valesi nyakua ’diyi pie,

⁹nga fi Noa vu maburu ma alia iri iri, ago pi aroni be, Munguni azile Noa ma tiarile.

¹⁰Te eri nga eca ’dini o’du aziri nde ’diyi ma vutia, yi tiza nga ovu nyaku ma dria.

¹¹Noa ma eli turu azia ma mba iriri ma mbao’du mudri drini azirisi, o’du nde ’dasi yi aliru amboru ma yi a’di dria nga ova okposi, ’bu ma derisa nga yi ozi mgboru.

¹²Ozoo ’di nyaku dria o’du kali su etusi inisi dria.

¹³O’du nde alu ’dasi Noa pi nga fi maburu ma alia, Semi pie, Hamu pie, Yafeti pie, yi anzi Noani, Noa vile okuri pie, anzi eri vile ’diyi ma okupiyi be dria;

¹⁴yi fi yi’i anyapa asea ’diyi pie dria esele yini vusi, anyapa akua ’diyi pie dria esele yini vusi, afa dria acipi aci valesi nyakua ’diyi pie esele yini vusi, aria dria pie esele yini vusi, ada aria ma esele dria dria.

¹⁵Afa rua be ovupi ava idrini be ’diyi dria nga fi dria Noa vu maburu ma alia iri

¹⁶Afa dria rua be fipi ’diyi fi ago aroni be, Munguni e’yoni azile eri ma tiarile; Yehova nga di eri ma ti opi ci.

¹⁷Yi tiza ovu nyaku ma dria o’du kali su; yi nga ti ra, nga maburu enga uru, eri nga di ovu ’duzaru uru nyaku ma dria.

¹⁸Yi nde ti okposi aga ra, ti amboru nyaku ma dria; maburu nga di aci yi dria.

¹⁹Yi nde aga tu nyakua, a’bu oni izu izu ’bu dria ma etia ’diyi dria ma dri ci;

²⁰yi nde aga kpere uru ca wuale mudri drini towi ’dipi, a’bu oni ambo ambo ’diyi ra.

²¹Afa rua be acipi nyakua ’diyi odra dria ra, aria piyi, anyapa akua ’diyi pie, anyapa asea ’diyi pie, afa dria acipi aci valesi nyaku ma dria ’diyi pie, ’ba pie dria dria;

²²afa dria ava idrinirini ovuzu yi ma omvu talaa ci ovupi nyaku a’wiru ma dria ’diyi odra dria ra.

²³Ja afa dria idriru ovupi nyaku ma dria ’diyi ma dri ra, ’ba piyi, anyapa pie, afa acipi aci valesi ’diyi pie, aria ’bua ’diyi pie; ja yi ma dri dria nyakuarisi ra. Ku kiri Noani a’dule, ’ba ovupi eri be maburu ma alia ’diyi be’i.

²⁴Yi nde ti okposi nyaku ma dria o’du turu alu drini kali towi.