Read lugbara E’doza 8 Bible Online

E’doza 8 - lugbara bible

E’doza 8

¹Mungu ega e’yo Noa pini, afa dria idri be ’diyi pie, anyapa dria ovupi eri be maburu ma alia ’diyi pie dria. Mungu nga fe olini lizu nyaku ma dria, yi nga anga ani;

²eri nga yi a’di yi alirurini ’diyi opi derisa ’bua ’diyi pie ci, eri nga vini ozoo ’buari oga si,

³yi nde nga dro ri nzusi nyaku ma driarisi ’dani. O’du turu alu drini kali towi ma vutia, yi nde ace de wereru ’bo;

⁴maburu nga ri oni Araratiari ma dria, mba aziri ma mbao’du mudri drini azirisi.

⁵Yi nga nzu ’dani cazu mba mudriria; mba mudri ma o’du alurisi oni ma dri mbili ’diyi endre ra.

⁶Te eri nga eca ’dini o’du kali su ka yi de ra, Noa nga maburu erini edeleri ma derisa zi ra,

⁷eri nga koreke ma ti pe amve; eri nga fu mu ’dile ’dole de nga yi angani nyaku ma driarisi de ku.

⁸Eri nga vini a’balau ma ti pe i vu ’darisi ngazu ndrezu kani yi nzu de angu a’wiru ma driarisi’bo yani;

⁹te a’balau isuni pari i ma pa agele ’bazu ini ava lizuri ku, eri nga ani dri da vile eri vu maburua, yini ovule angu wudrikuru ma dria driarisi. Eri nga i dri eju eri ebizu, eri ofizu i vu maburu ma alia.

¹⁰Eri nga vini te o’du aziri dika, eri nga a’balau ma ti pe dika engazu maburuarisi;

¹¹a’balau nga emvi eri vu ondresi, te mi ndre, mizeitu pati bi erini tileri eri ma tilia ci; Noa nga di ni ani kini yi nzu di nyakuarisi de ’bo.

¹²Eri nga vini te o’du azini aziri, eri nga a’balau ndrakari ma ti pe dika; te awini di emvi eri vu dika ku.

¹³Te eri nga eca ’dini eli turu azia drini aluri ma mba okori ma mbao’du alurisi, yi nzu di nyaku ma driarisi ’bo; Noa nga afa maburu ma ti opizuri nze ra, nga angu lu ra, te mi ne, nyaku ma dri anga de ’bo.

¹⁴Nyaku anga di de mba iri ma mbao’du kali iri drini aziririsi.

¹⁵Mungu nga di ’yo Noa ma tia kini,

¹⁶Mi fu maburuarisi, mi’i oku mini pie, anzi mini pie, mi anzipi ma oku pie mi be tualu.

¹⁷Mi ofu mi be afa idriru rua be ovupi mi be ’diyi dria-aria piyi, anyapa pie, afa dria acipi ad valesi nyakua ’diyi pie driayi ma oti kakau nyakua, ma ’ya efi tu, ma ezu kakau nyakua.

¹⁸Noa nga di fu amve, eri’i anzi lerini pie, oku erini pie, anzipi ma oku pie, eri be dria.

¹⁹Anyapa dria nga di fu mabuarisi ori’ba yini vusi, afa dria acipi aci valesi ’diyi pie, aria dria pie, afa acipi nyaku ma dria ’diyi pie dria.

²⁰Noa nga pari edeta edezuri si Yehova dri, nga anyapa alaru ’diyi ma azi ’du aria alaru ’diyi ma azi be, nga edeta vezaru ’diyi ede pari edetaniri ma dria.

²¹Yehova nga afa arikariru ma aji ngu ra; Yehova nga di ’yo i ma asia kini, Ma ngani nyaku tri dika ’ba ma e’yosi ku, egata ’ba ma asiarini ovule onzikanyaru engazu gbu mvasirisi; ma ngani vini afa dria idriru ’diyi ofu dika mani ’yele ’borile ku.

²²De nyakuni ovuria nga ci, ewu ori rizuri pi ewu lozuri be, ewu ambizaruri pi ewu drizaruri be, ayi pi eli be, etu pi ini be, ngani asi ’de ku.