Read lugbara E’doza 9 Bible Online

E’doza 9 - lugbara bible

E’doza 9

¹Mungu nga asi ndriza fe Noa pi dri anzipi be, nga ’yo yi tia, Emi ma oti anzi tu, emi ma ezu kakau, emi ma ga nyakua tre dika.

²Anyapa dria nyakua ’diyi piyi, aria dria ’bua ’diyi pie, afa dria nyakuni gazu ani tre tre ’diyi pie, e’bi dria miria ’diyi pie dria nga ovu urisi emisi, nga emi ru indi; ma fe yi dria emi dri ’bo.

³Afa dria idri be acipi nyaku ma dria ’diyi nga ovu emi dri zaru; ma fe afa dria emi dri ’bo, mani afa idiza ibiru felerile.

⁴Te emi ma nya za idrini be ku, efini kini arini be, ’dini ku.

⁵Ada ma nga ari emini, ari idri emini ma arioti a’i ra ma nga eri a’i geri anyapa dria vurisi; te ma nga ’ba ma lavuari ma arioti a’i ’ba dri geri ’ba vurisi, ada agu nderi ma adripi vurisi.

⁶’Ba dria ari ’bani adapiri, ’ba yi nga eri ma ari ada’i; Munguni ’ba ’bale i ma wurasirisi.

⁷Te emi’i, emi ma oti anzi tu, emi ezu kakau, emi ma oti kakau nyakua, emi ere emi tre alenia.

⁸Mungu nga e’yo ’yo Noa pi ma tia anzipi be kini,

⁹Mi ndre, ma’i ma aziza mani fe pa sozu emi be okporu ’dani, ori emini emi ma vutia’diyi be indi;

¹⁰ma aziza nde azi afa idriru ovupi emi be ’diyi be dria, aria piyi, anyapa akua ’diyi pie, anyapa asea ovupi emi be ’diyi pie dria, anyapa dria efupi maburuasi ’diyi be kpere anyapa nyakua ’diyi dria.

¹¹Ma nga aziza mani fe pa sozu emi be okporu ’dani; ma ngani afa dria rua be ’diyi ofu yi tizasi dika ku, yi tiza ngani ovu nyaku dri jazu dika ku.

¹²Aziza mani azile ama eselia emi be, afa idriru ovupi emi be Munguni ’bale ’diyi pie driari ma eceta, kpere a’bianzi vu ’dani ’daniri, eri’do:

¹³ma gari mani ’ba iritia, eri nga ovu ecetaru aziza ama eselia nyaku beri ecezu.

¹⁴Te eri nga eca ’dini, ma ka nga iriti eji nyaku a’buzu, garini nga i e’da iriti ma alia,

¹⁵ma nga ani aziza mani, mani azile ama eselia emi be afa dria idriru Munguni o’bale rua be ndu ndu ’diyi pieri ma e’yo ega ra; yi nde kazu ngazu ofuzu yi tizaru afa rua be ’diyi ma dri jazu dria dika ku beni.

¹⁶Garini nga ovu iriti ma alia, te ma nga eri lu ra, ma ma ega aziza ’dani ’dani ovupi Mungu pi ma eselia afa dria idriru Munguni o’bale rua be ndu ndu nyakua ’diyi beri ani.

¹⁷Mungu nga di ’yo Noa ma tia, Aziza mani fele pa sozu okporu ama eselia afa dria rua be nyakua ’diyi beri ma eceta ’di’i.

¹⁸Anzi Noani efupi maburua ’diyi yi ’di: Semi pi, Hamu pi, Yafeti pie. Hamuni Kanani ma ati’i.

¹⁹Anzi ’diyi na yi anzi Noani; ’ba nde ’diyi ma ori ere yi angu wudrikurua driani.

²⁰Noa nga di e’do ovuzu ’ba amvu ’yapiriru, nga zabibu pati isi amvua;

²¹eri nga patiefi ma su mvu, nga di ati ani ati ati, nga la pililiru hema erini ma alia.

²²Te Hamu Kanani ati nga i ati ma rua pililiruri ndre ra, nga e’yoni olu i adripi iri amve ’diyi ma tia.

²³Semi pi Yafeti be nga bongo ’du, nga eri ’ba yi ma gbudria, nga fi muzu ngukungukuru, nga yi ati ma rua pililiruri a’bu ci; yi ri angu lu kala azinia, yi ndreni yi ati ma rua pililiruri ku.

²⁴Te Noa nga oru atiza patiefi ma susiri ma vutia, nga e’yo i ma mvi wererini ’yele i vuri ni ra.

²⁵Eri nga ’yo, Kanani ma ovu trizaru; eri nga ovu i adripi dri ati’boru ndi ndi.

²⁶’Yo vini kini, Yehova Mungu Seminiri ma ru ma ovu inzizaru; Kanani ma ovu ati’bo eriniru.

²⁷Mungu ma fe Yafeti ma pari ma eca walaru aga ra, eri ma adri hema Semini ma alia; te Kanani ma ovu ati’bo eriniru.

²⁸Noa nga adri yi tiza ma vutia eli turu na drini kali towi.

²⁹O’du Noani dria ca eli turu oromi drini kali towi; dra di ra.