Read lugbara 2 Samueli 1 Bible Online

2 Samueli 1 - lugbara bible

2 Samueli 1

¹Eri nga eca ’dini Sauloni drazuri ma vutia, Daudini emvizu ’ba Amalekini ofuzuri ma vutia, Daudi nga awo Zikilagia o’du iri;

²eri nga eca ’dini o’du narisi, agu alu engapi pari Sauloni ovuzuriari nga eca bongo suza asizaru be, omvu nyaku i dria. Eri eca ’dini, erini ecaria Daudi vu, eri eco i va inzita fezu.

³Te Daudi nga ’yo eri tia, Mi enga ngoa ya? Eri ’yo eri tia, Ma enga apazu pari Israelini ovuzuria.

⁴Te Daudi ’yo eri tia, E’yo ’dale ngoni ya? Ma zi mi tia, mi olu ma dri. Eri omvi eri tia kini, ’Ba ongulumuru apa ombasi, te ’ba kakau e’de va, odra ra; te Saulo Pi mvi ini Yonatani be odra indi.

⁵Te Daudi ’yo karilau e’yo nde olupi eri tiari be, Mi ni ngoni ya Saulo pi mvi ini Yonatani be yi odra ra?

⁶Karilau e’yo nde olupi eri tiari ’yo, Mani ovuria oni Giliboa dria ma isu Sauloni ruuru erini i atiria aju erini ma ruaa; te mi ne, gari pi asikari tupi akanya dria ’diyi eca ogogo eri ma vutia.

⁷Eri ka i oja lu i vutia, eri ne ma ra, omve ma. Ma omvi eri tia, Ma ’do’i.

⁸Te eri ’yo ma tia, Mi a’di’i ya? Ma omvi eri tia, Ma Amalekini.

⁹Te eri ’yo ma tia Mi so pa ma ageia, mi fu ma; toko ku candi amboru bi ma ’bo, te idri mani ovu nga ma alia ’dani.

¹⁰E’yo ’disi ma so pa eri ageia, ma fu eri, a’disiku ma ni adaru eri econi ovuzaru idriru erini e’dezu vari ma vutia ku; ma ’du oku ovupi eri driari, gbala eri wuari be, ma eji yi opi mani vu ’do.

¹¹’Di ma vutia, Daudi nga bongo erini bi, nga yi asi yi; ’ba dria ovupi ’eri be ’diyi ’ye ’dini indi;

¹²yi ovu candisi, yi owu, yi ga nyaka nyako si cazu ondresi Saulo pi ma e’yosi, mvi Yonatani pie, ’ba Yehovani pie, suru Israelini pie, a’disiku yini o’dele va seisirisi.

¹³Te Daudi ’yo karilau e’yo nde olupi eri driri ma tia, Mi enga ngoa ya? Eri omvi e’yo kini, Ma ovu ani’bo mvani, Amalekini.

¹⁴Te Daudi ’yo eri tia, Mi ovuni lurisi ku dri mini ejuzu ’ba Yehovani odu osule driniari fuzu ngoni ya?

¹⁵Te Daudi nga karilau alu omve, ’yozu, Mi mu ogogo, mi ’de eri dria. Eri co eri, ’dini eri dra kai,

¹⁶Te Daudi nga ’yo eri tia, Ari mini ma ovu mi ngulupi ma dria; a’disiku ti mini su asu mi ngulupi ma ruaa, ’yozu, Ma fu ’ba Yehovani odu osule driniari.

¹⁷Te Daudi wu candisi Saulo pi e’yosi Yonatani mvi erini be, wuta ’dorisi,

¹⁸azini eri azi yi ma imba anzi Yudani dri ongo nde osunisi mi ne, eri ovu sizaru buku Yasarini ma alia. Eri ’yo!

¹⁹Israeli la, diza mini ovu ofuzaru i pari uruleru ’diyia! ’Ba okporu ’diyi o’de ’doni ya!

²⁰Mi olu e’yo nderi Gatu alia ku, mi oji eri gboko Asikelonia ’diyia ku indi; ’ba Filisitiaa ’diyi ma ezoanzi kazu ovuzu ayikosi ku, ’ba agele liza a’ipi ku ’diyi ma ezoanzi kazu yi enyazu ku.

²¹Emi oni Giliboaa ’diyi, andrali kani ozoo ma ovu emi dria ku, kani efi amvua ’bani fele edetaru ’diyi ma ovu yo indi! A’disiku ’dale gombere ’ba okporuni ovu ’bezaru tokole, gombere Sauloni ekile gombere ’ba odu osule drinia kuri vilerile.

²²Osu Yonatanini ojani i vile ari ’ba fule ’diyisi ku, kani oso ’ba okporu ’diyinisi ku indi, sei Sauloni emvini pirini ku.

²³Saulo pi Yonatani be, yi ndri tu, le vini yi tu ewu yini ovuzu idrirurisi! Te coni yi esele drata yinisi ku indi; yi ovu ongu be aga ongu ajini ra, yi ovu okpo be aga okpo kamini ra.

²⁴Emi ezoanzi Israelini, emi owu Sauloni, eri’i emi supi ndrizaru bongo ekarusiri, eri’i onyiafa meleru supi bongo emini ma ruaari.

²⁵’Ba okporu e’de ’doni omba eselia! Fu Yonatanini pari mini uruleruria.

²⁶Ma ovu candisi mi e’yosi, ma adri Yonatani; mi ovu ndra onyiru tu ma vu leta mini ma vuri ovu ndra onyiru tu, aga leta okuni ra.

²⁷’Ba okporu e’de ’doni, i azini afa a’di ’dizu ’diyi deru ’bo ’doni!