Read lugbara 2 Samueli 10 Bible Online

2 Samueli 10 - lugbara bible

2 Samueli 10

¹’Di ma vutia eri eca ’dini, Amoni anzi ma opi dra ra, te mvi erini Hanuni nya opi eri ma pariani.

²Te Daudi ’yo, Ma nga ’ye onyiru Hanuni Nahasi mvi vu, ekile atini ’yele onyiru ma vurile. ’Dini Daudi pe ati’ba erini ma ti, asi erini omizu ati ma e’yosi. Te ati’ba Daudini eca angu Amoni anzinia.

³Te opi anzi Amoni anzini ’yo opi yini Hanuni ma tia kini, Mi ega Daudi le mi atini inzi ra ya, erini ’ba asi mini omipi ’diyi ti pezu mi vurisi? Eri peni ati’ba erini ma ti aku ’eli ma orile gazu, eri agazu beni ku ya?

⁴’Dini Hanuni o’du ati’ba Daudini, fa yi ma tibi ega alua ega alua, li yi ma bongo agadua oro vusi kpi, fe yi dri geri ra.

⁵Yi ka e’yo nderi olu Daudi tia, eri pe ’ba ti muzu dri fuzu yi be, toko ku ’ba ’diyi ovu drinza be tu. Te opi ’yo, Emi te Yerikoa, cazu tibi eminini duzuria, emi nga emvi ndo.

⁶Amoni anzi ka ne e’yo yini eca onzi Daudi ma milia ’bo, Amoni anzi ’nga ’ba ti pe silingi be ’ba Suriaa Beti-rehobua ’diyi pi ofezu ’ba Suriaa Zobaa ’diyi be, yi alifu kali iri acipi pasi ’diyi, opi Makaari pi ’ba alifu alu ’diyi pie, ’ba Tobua alifu mudri drini iri ’diyi pie.

⁷Daudi ka e’yo nderi eri ra, eri pe Yoabu pi ma ti asikari okporu ongulumuru ’diyi be.

⁸Amoni anzi nga efu, otu yi a’di ’dizu pari ’bani fizu kalitiliaria; te ’ba Suriaa Zobaa ’diyi pi Rehobua ’diyi be, ’ba Tobua ’diyi pi ’ba Makaa ’diyi be, yi ovo nyamukoa yi’i a’dule.

⁹Te Yoabu ka ne a’di ovu otuzaru eri drilia azini eri ma ngukua, eri ope ’ba dria opele Israeli ma, eselia ’diyi ma azi, oti yi a’di ’dizu ’ba Suriaa ’diyi be;

¹⁰eri ’ba adri Abisaini ’ba acepi ’diyi ma drilia, oti yi a’di ’dizu Amoni anzi be.

¹¹Te eri ’yo kini, ’Ba Suriaa ’diyi ka ’ba ma aga ra, ka’dini mi nga ma aza ko; te Amoni anzi ka ’ba mi aga aga, ma nga mu mi aza ko.

¹²Emi ru ku, emi ovu asi agupinisi, ’ba amani ’diyi pi ma e’yosi aku Mungu amanirini ’diyi be; te Yehova ma ’ye e’yo ovupi onyiru eri ma miliari.

¹³’Dini Yoabu pi ’ba ovupi eri be ’diyi be nga mu ogogo a’di ’dizu ’ba Suriaa ’diyi be; te yi nga apa eri ma drilia.

¹⁴Te Amoni anzi ka ne ’ba Suriaa ’diyi apa ’bo, yi nga vini apa Abisai drilia indi, yi fi aku alia. Te Yoabu nga Amoni anzi ku ra, nga mvi Yerusalemua.

¹⁵Te ’ba Suriaa ’diyi ka ne ’ba Israelini aga yi ’bo, yi oku yi tualu.

¹⁶Te Hadadezeri pe ’ba ti, ’ba Suriaa ovupi Yi Ufirate tia ’aa’dasi ’diyi omvezu; yi eca Helamua, Sobaki ambo asikari ongulumuru Hadadezerini ’diyi ma driliari aci yi drilia.

¹⁷Yi ka e’yo nderi olu Daudi tia ’bo, eri oku Israeli dria tualu, yi zo Yoridanini ca Helamua. ’Ba Suriaa ’diyi otu yi Daudi dri aruzu, ’di a’di eri be.

¹⁸Te ’ba Suriaa ’diyi nga apa Israeli ma drilia; te Daudi ofu ’ba Suriaa gari dria ’diyi turu aziri, azini akanya dria ’diyi alifu kali su, te eri fu Sobaki ambo asikari ongulumuru yini driliari, ’dini eri dra ’dale.

¹⁹Te opi dria emupi azi ngapi Hadadezeri dri ’diyi ka ne Israeli aga yi ’bo, yi ’ye aziza asi anzuruni tualu Israeli be, yi eca ati’ba yiniru. ’Dini ’ba Suriaa ’diyi ru di ci, koni Amoni anzi ma aza dika ku.