Read lugbara 2 Samueli 12 Bible Online

2 Samueli 12 - lugbara bible

2 Samueli 12

¹Te Yehova nga Natani ma ti pe Daudi vu. Eri ca eri vu, ’yo eri tia kini, ’Ea iri ovu aku alu alia, aluri ovu afa e’ini, aziniri alioni.

²’Ba afa e’iru ovu kabilo be, ti be, kakau;

³te ’ba alioru ovuni afa be ku, kiri alu kabilemva kariaru erini jele ezozaruri. Eri mba eri vu tualu anzi erini be; eri nyaka e’i ma ngulupini nyaleri ma esele nya’i, eri, mvu okele eri ma ngulupinisi, eri la ’eri ma agatia, ovu eri dri ekile eri ma zamvale.

⁴’Ba emuza eca ’ba afa e’iru nde vu, te eri ku kabilo eri ngulupini kani ti erini feni fuzaru ku ’ba emuza nde ecapi eri vuri dri, te eri ’du kabilomva alio nde vileri, eri fu eri ’ba emuza nde ecapi eri vuri dri.

⁵Te adra Daudini di tu agu nde vu; eri ’yo Natani tia, Ekile Yehovani ovule idrirurile, eco agu e’yo nderi ’yepiri ma dra ra;

⁶te eri ma omvi kabilo su alu nderi ma Paria, erini e’yo ’di ’yelerisi, azini erini ovule yiki kokorurisi.

⁷Natani nga ’yo Daudi tia kini, Eri bani mi’i, Yehova Mungu Israeliniri ’yo ’dini, kini, Ma osu ndra odu mi dria ovuzu opiru Israeli ma drilia, te ma pa ndra mi Saulo ma dria;

⁸ma fe mi dri opi mi vileri ma jo, azini oku opi mi vilerini ’diyi mi agatia, ma fe vini mi dri suru Israelini pi Yudani be; te ’di ka ovu ndra were te’do ma fe mi dri afa ’diyi ’diyi drinia indi.

⁹Mi onzo ’e’yo Yehovani toko, e’yo ovupi onzi eri ma miliari ’yezu a’di e’yosi ya? Mi fu Uria ’ba Hitiniri seisi ra, mi ’du oku erini ovuzu oku miniru ra, mi fu Uriani sei Amoni anzinirisi ra.

¹⁰E’yo ’disi sei ngani ori’ba mini ku aluni ku, mini ma onzolerisi, mini oku Uria ’ba Hitiniri ’duzu ovuzu oku miniru.

¹¹Yehova ’yo ’ dini, Mi ne, ma nga e’yo onzi ofu mi vu engazu jo mini ma alia; ma nga oku mini ’diyi o’du mi milia yi fezu ’ba mi jo ejeliari dri, te eri nga la yisi etu milia.

¹²A’disiku mi ’ye e’yo nderi zizaru; te ma nga e’yo ’diri ’ye Israeli dria ma milia, etu be ayii,

¹³Te Daudi nga ’yo Natani tia kini, Ma ’ye e’yo onzi Yehova vu. Te Natani ’yo Daudi tia kini, Te Yehova zi e’yo onzi mini ’bo indi; mi ngani dra ku.

¹⁴Te mini geri amboru fele ari’ba Yehevani ’diyi dri Yehovani o’dazu, mini ’yele ’dinirisi, mva ngapi osipi mi driri nga dra ra.

¹⁵Natani nga di mvi i vile joa. Te Yehova nga mva oku rianirini osile Daudi driri co ra, te eri ovu azoru okporu.

¹⁶E’yo ’disi Daudi ’ba matu Mungu vu mva nderi ma e’yosi; te Daudi nga di ani nyaka ’da ’da, eri fi joa, la ini rra nyakua.

¹⁷Te ’ba ’wara eri ma ori’baru ’diyi so pa eri ageia eri engazu nyakuasi; te eri leni ku, eri nyani nyaka yi be ku indi.

¹⁸Eri nga eca ’dini o’du aziririsi, mva nderi dra ra. Te ati’bo Daudini yi ru e’yo mva nderini drazuri ’yozaru eri tia; te yi ’yo, Mi ne, mvani ovuzu nga idrirurisi, ama ’yo eri tia, te eri erini e’yo amani ku; candi erini nga aga ngopi ya, kani fezu erini ngazu i ngulupi ’yezu onzi, ama ka e’yo mvani drazuri olu eri tia?

¹⁹Te Daudi ka ne ati’ba erini ’diyini e’yo ’yoria yi eselia oyokolosi, Daudi ni di mva nderi dra ’bo; eri nga zi ati’ba erini ’diyi ma tia, Mva dra ’bo ya? Yi ’yo ra, Eri dra ’bo.

²⁰Te Daudi nga enga nyakuasi, oji i rua, efi i odusi, su bongo azini; te eri nga fi; Yehovani alia eri inzizu; vutinia eri mu jo i ngulupiniria; eri ka omve, yi ’ba nyaka eri drilia, te eri nya ra.

²¹’Di ma vutia, ati’ba erini nga ’yo eri tia, Mi ’ye ’dini a’di e’yoni ya? Mvani ovuzu nga idrirurisi, mi ’da nyaka ’da ’da, mi wu erisi indi; te mvani draria mi enga, mi nya nyaka.

²²Eri ’yo ra, Mvani ovuzu nga idrirurisi ma ’da nyaka ra, ma owu ada; a’disiku ma ’yo, A’di nini, kani Yehovani nga asi ndriza ece ma vu, ’dini mvani ngazu atizu ya?

²³Te curu’do eri dra ’bo, ma nga di nyaka ’da a’di e’yosi ya? Ma eco eriomvizu dika ra ya? Ma nga mu eri vu, te eri ngani emvi ma vu ku.

²⁴Te Daudi omi oku erini Batiseba ma asi, fi eri vu, la eri be, te oku nde osi mva, ’da runi Sulemani’i. Te Yehova le eri;

²⁵te eri pe e’yo ti nabi Natani ma tisi; ’dini eri ’da runi Yedidia’i, Yehova ma e’yosi.

²⁶Te Yoabu ’di a’di Raba aku Amoni anzini be, eri ’du aku opiniri,

²⁷Te Yoabu ope ojio ti Daudi vu ’yozu kini, Ma ’di a’di Raba be; ada ma aga aku nde yi be treri ’bo.

²⁸E’yo ’disi mi oku ’ba acepi ’diyi tualu, mi ace aku nderi kuru kuru, mi aga aku nderi; ma kazu aku nderi agazu ku, ka mu eri omvezu ma rusi ku.

²⁹Daudi nga di ’ba dria oku tualu, mu Rabaa’i ’di a’di eri be, ’du eri.

³⁰Eri nze oku opi yi vileri ma driasi; o’bizani ma nziza mele ma onzi alurile, eri ma ruaa oni ajeambosi ’diyi indi; yi su eri Daudi ma dria. Te eri ofu afa yini opale ombasi ’diyi aku ndeasi, Ikakau tu.

³¹Eri ofu vini ’ba ovupi aku nde alia ’diyi, ’ba yi azi ngazu aya si be nyiri pati asizu ’diyi pisi, jaya nzizaru oni gazu ’diyi pie, ogara pie, fe yi azi ngazu pari biriki vezu ’diyia; eri ’ye ’dini aku Amoni anzini ’diyi dria. Te Daudi piyi mvi Yerusalemua, ’ba erini be dria.