Read lugbara 2 Samueli 13 Bible Online

2 Samueli 13 - lugbara bible

2 Samueli 13

¹Te eri eca ’dini, Daudi mvi Abisalomu ma amvi alu ovu ndrizaru tu, runi Tamara’i; te Aminoni Daudi mvi le eri tu.

²Te ava ruani va Aminonini nde ra, ’dini eri eca azoru amvipi erini Tamara ma e’yosi; te eri ovu zamva agupi nipi nga kuri, azini eri ovu ewaru eri dri o’bizu e’yo ’yezu eri be.

³Te Aminoni ovu agi be, runi Yonadabu, Simea Daudi adri mvi’i; te Yonadabu ovu ’ba lokiri be turi’i.

⁴Eri ’yo eri tia kini, Opi mvi la, mi oyi ’doni etu vusi etu vusi a’disi ya? Mi eceni ma dri ku ya? Te Aminoni ’yo eri tia, Ma le Tamara, ma adri Abisalomu ma amvini.

⁵Te Yonadabu nga ’yo eri tia kini, Mi la va gbolo mini dria, mi ’ye ekile mi azorule; te mi atini emuria mi neria, mi ’yo eri tia, Ma matu ’ba mi vu, mi fe ma amvi Tamara ma emu nyaka fe ma dri, nyaka ’yezu ma milia, ’dini ma ma ne nyaka nderi, ma nya eri eri ma dria beni.

⁶’Dini Aminoni la va, ’ye ekile eri ovu azorule; te opini emuria eri neria, Aminoni ’yo opi tia kini, Ma matu ’ba mi vu, mi fe ma amvi Tamara ma emu mikate enya olemiru iri edezu ma milia, ’dini ma ma nya eri ma dria beni.

⁷Daudi nga ’ba ti pe akua Tamara vu, ’yozu, Mi mu curu’do adri mini Aminoni ma joa, mi ede nyaka eri dri.

⁸’Dini Tamara mu adri erini Aminoni vile joa, pari erini lazu varia. Eri ’du mikate ibiru, iti eri, ede mikate enya olemiru eri ma milia, ozo mikate nde ’diyi indi.

⁹Eri ’du ajikoa, osu yi eri drilia, te eri ga nyako si. Te Aminoni ’yo, ’Ba dria ma fu amve ma vusi. ’Ba dria nga fu amve eri vusi ra.

¹⁰Te Aminoni ’yo Tamara tia, Mi eji nyaka jo ’dori ma alia, ma ma nya mi dria beni. Te Tamara ’du mikate enya olemiru erini edele ’diyi, eji yi jo nde alia adripi erini Aminoni vu.

¹¹Eri ka yi eji ogogo eri vu nyazu, eri bi eri ci, ’yo eri tia, Ma amvi, mi emu la ma vu ’doa.

¹²Eri omvi e’yo eri tia kini, Yo, ma adripi, Mi bi ma pirimasi ku; a’disiku e’yo ’dinileri ovuni ’yezaru Israeli eselia aluni ku; mi ’ye e’yo azaza ’diri ku fo.

¹³Te ma’i, ma nga mu drinza mani be ngoa ya? Te mi’i, mi nga ovu ekile ’ba azazale Israeli ma eselia. E’yo ’disi ma matu ’ba mi vu, mi ’yo opi tia; a’disiku eri ngani ma oga mi dri ku.

¹⁴Te eri leni e’yo erini ’yoleri eri ku; te okpo erinirini eri agale rarisi, ru eri kongolokoru.

¹⁵Vutinia Aminoni ngu eri onzi nguta amboru turisi; ’dini nguta erini eri nguzu onziri aga leta erini eri lezu okori ra. Te Aminoni ’yo eri tia, Mi nga, mi mu.

¹⁶Te eri ’yo eri tia, kini, ’Dini yo, te e’yo onzi ambo ’do mini ma ofuzuri, ovu onzi aga e’yo azini mini ’yele ma vuri ra. Te eri leni e’yo erini eri ku.

¹⁷Eri omve ati’bo azi ngapi eri driri, ’yo ra, Mi ofu oku ’diri ma vusi curu’do, mi opi jotile eri vutia ci.

¹⁸Te Tamara su bongo wura ndu ndu beri; a’disiku opi ezopi agupi nipi nga ku ’diyi adri bongo su ’dinile. ’Dini ati’bo erini ofu eri ra, opi jotile eri vutia.

¹⁹Te Tamara omvu of uta i dria, asi bongo ini wura ndu ndu be ini suleri; odro dri ini i dria, eri ’du geri muzu, awu wuzu o’dukosi erini muria.

²⁰Te adri Abisalomu ’yo eri tia, Mi adri Aminoni ovu mi be ra ya? Te curu’do mi ovu ciri, ma amvi; eri mi adri’i; mi ’ba e’yo nderi amboru mi asia ku. ’Dini Tamara ovu candisi adri ini Abisalomu ma joa.

²¹Te opi Daudi ka e’yo ’diyi eri dria ’bo, eri ovu aokosi tu.

²²Te Abisalomu ’yoni Aminoni vu e’yo onyiru ku, kani e’yo onzi ku indi; te Abisalomu ngu Aminoni onzi, a’disiku erini i amvi Tamarani bile pirimasirisi.

²³Eri eca ’dini, eli pi pi iri ka aga ’bo, ’ba kabilo ’biko lipi Abisalomu dri ’diyi ovu Baali-hazori ovupi Efiraimu ageiaria. Te Abisalomu omve opi anzi agupiru ’diyi dria.

²⁴Te Abisalomu nga emu opi vu, ’yozu kini, Mi ne curu’do, ati’bo mini ovu ’ba kabilo ’biko lipi ’diyi be; ma matu ’ba mi vu, mi fe opi pi ma mu ati’ba erini ’diyi be, ati’bo mini be tualu.

²⁵Te opi ’yo Abisalomu ma tia kini, Yo, ma mvi, ama ngani mu dria ku, ama ka mu ovuzu kakau mi andezu ku. Eri omi eri, te eri leni muzu ku, te eri fe asi ndriza eri dri.

²⁶Te Abisalomu nga di ’yo, Ka’dini yo, ma matu ’ba mi vu, mi fe ma adripi Aminoni ma mu ama be. Opi nga ’yo eri tia, Eri ma mu mi be a’di e’yosi ya?

²⁷Te Abisalomu omi eri, ’dini eri fe geri Aminoni pi dri opianzi be dria muzu eri be.

²⁸Te Abisalomu nga azita fe ati’ba erini ’diyi dri ’yozu, Emi ne kilili, asi Aminonini ka ovu ayikosi patiefi ma susi, ma ka nga ’yo, Emi co Aminonini, emi ma fu eri. Emi ru ku; ma feni emi dri azita ku ya? Emi ovu asi okporu be, ombaru ya!

²⁹’Dini ati’ba Abisalomuni ’ye Aminoni vu ekile Abisalomuni azita fele yi dririle. ’Di ma vutia opi anzipi dria enga, ’ba dria alu alu tu akanya yini dria, apa ra.

³⁰Te eri eca ’dini, yini ovuria geria, e’yoni ku Daudi vu kini, Abisalomu ofu opi anzipi dria, aluni aceni ku.

³¹Te opi nga enga, asi bongo ini ra, la va nyakua; te ati’ba erini pa sopi eri ageia ’diyi dria; osi bongo yini indi.

³²Te Yonadabu, Simea Daudi adri ma mvi ’yo, Te opi mani ma ega yi ofu karile anzi dria, opi anziru ’diyi ku, te kiri Aminoni drani, a’disiku Abisalomu ’ba asi ini okporu e’yo ’diri ’yezu, engazu o’du Aminonini i amvi Tamarani bile pirimasiria.

³³E’yo ’disi curu’do, opi mani amboruri ma ’ba e’yo nderi amboru i asia ku, egazu opi anzipi dria odra ’bo, ’dini ku; te kiri Aminoni drani.

³⁴Te Abisalomu apa ra. Te karilau angu agei tepiri enga mile erini luzu, te mi ne, ’ba kakau emu eri vutia, geri oni ombetiarisi.

³⁵Te Yonadabu nga ’yo opi tia, Mi ne, opi anzi eca ’bo; eri eca ’dini ekile ati’bo minirini ’yolerile.

³⁶Eri nga eca ’dini, erini e’yo ’yo dezu ’boria, mi ne, opi anzi eca ra, yi awu owu o’dukosi; opi pi wu ati’ba erini ’diyi be dria okposi.

³⁷Te Abisalomu apa ra, mu Talimai Amihudi mvi opi Gesuriari vu. Te Daudi wu mvi erinisi o’du dria.

³⁸’Dini Abisalomu apa ra, mu Gesuria, ovu ’dale eli na.

³⁹Te opi Daudi le asisile ini omvi muzu Abisalomu vu, a’disiku erini nele Aminonini drale ’bo, candi inirini dele ’borisi.