Read lugbara 2 Samueli 22 Bible Online

2 Samueli 22 - lugbara bible

2 Samueli 22

¹Te Daudi ’yo ongo ’di ma ti Yehova tia o’du Yehovani eri pazu ari’ba erini ma dria dria, azini Saulo ma dria indirisi.

²Te eri ’yo, Yehova ovu kata mani, azini pari mani ma ta mbazuri, ’ba ma aripiri, adaru maniri,

³Mungu oni mani okpo beri, ma nga ovu a’itasi eri alia, gombere mani azini o’yu pata manirini, kali mani abi izuru beri, pari mani ma zizu aleniari indi, ’ba ma papiri, mi pa ma e’yo okporu ma sia.

⁴Ma nga Yehova i sipi inzizaruri omve; ’dini ma nga ovu pazaru ari’ba mani dri ani.

⁵A’disiku dra yi mbupi mburileri yi ma ace kuru, e’yo onzi yi tizaleri uri fe ma dri;

⁶baka ’bile drataniri vileri ekila ma kuru kuru, emba drataniri bi ma ci.

⁷Candi mani ma alia ma omve Yehovani; adaru ma wu Mungu maniri vu. Hekalu erini ma alia eri eri o’duko mani, wuta mani ca kpere bilenia.

⁸Etu ’dasi nyaku ’ye yanga, yazu di di di; ’bu eti si di di di, oya yi, erini ovule adrasirisi.

⁹Acika efu omvulenia tu uru, aci efupi eri ma tiari ve angu ra acikulu nga ti ko ani.

¹⁰Eri fe ’bu ma aku iva, eri esi va; ini inicici idururi ovu pa erini ma etia.

¹¹Eri tu uru kerubi dria, sa sa; adaru, ne eri oli ma opile dria.

¹²Eri ede ini i ageia kuru kuru hemaru, iriti asepi iniciciru ’bua ’diyi pie, yi i okupi okuri pie.

¹³Diza erini eri ma driliarisi acikulu nga ti ko ani.

¹⁴Yehova no ’bu ma alia no no, Mungu ovupi Uru Agapi Turi no o’duko erinisi.

¹⁵Eri gbi ’ye yi crezu; ofu ovi yi odrozu.

¹⁶Etu’dasi geri miria ’diyi e’dayi ra, azini nyaku ma eti e’da ree, Yehovani egale yi ma driarisi, oli okporu Jipi ava efupi eri ma omvuliarisi.

¹⁷Eri pe e’yo ti ’bualesi ma e’duzu, eri enze fila yi amboruri ma aliasi.

¹⁸Eri ari ma ari’bo mani okporuri dri, ’ba ma ngupionzi ’diyidriindi; yi ma okponi ma ndelerisi.

¹⁹Yi e’de ma dria o’du mani ovuzu candi berisi; te Yehova fe ma so pa ci.

²⁰Eri ofu ma ra, ofi vini ma pari amboru ma alia; eri ari ma ra, ala e’yoni eri valerisi.

²¹Yehova fe ma dri ekile onyi manirile; eri ofe ma ekile ma drini ovule alarurile.

²²A’disiku ma mba geri Yehovani ’diyi ma ta ’bo, ma kuni Mungu mani aka asi onzisi ku.

²³E’yo liza erini dria yini ovule ma miliarisi, ma kuni azita erini ’diyi ku.

²⁴Ma ovu kililiru eri vu, ma mba ma ngulupi ma ta ma kazu e’yo onzi ’yezu ku.

²⁵E’yo ’disi Yehova ofe ma onyi manirile ’bo, ekile mani ovule alaru eri ma miliarile.

²⁶’Ba yiki beri vu mi nga mi ece yikiru; ’ba kililiru vu indi mi nga mi ece kililiru;

²⁷’ba alatararuri vu mi nga mi ece, alatararu, ’ba asi okaru vu mi nga mi ece okporu.

²⁸Te mi nga ’ba candi be ’diyi pa ra, te mi mileni ovu ’ba ambo be ’diyi vu, yi omvizu va.

²⁹A’disiku mi ovu tala mani, Yehova la, Yehovani nga ini mani oja eturu.

³⁰Te mi ma okposi ma nzu ari’ba, o’biru ma eselesi, Mungu mani ma okposi ma mbu kali drilesi.

³¹Te Mungu’i, geri eriniri kililiru; o’bi e’yo ’yoza Yehovani ’bo; eri gombereni ’ba eri a’ipi ’diyi dri dria.

³²Te a’di ovu Munguruni ya, alu Yehova’i ku ya? A’di ovu kataruni ya, alu Mungu amani’i ku ya?

³³Munguni pari okporu maniri, eri ce ’ba kililiru ’diyi dri geri erini ma alia.

³⁴Eri ma pa ede ekile yere ma pale, eri ma ’ba uru pari mani izuru ’diyi ma dria.

³⁵Eri dri mani imba omba ’bazu, eco ma drini osu molaru nzozaru ani.

³⁶Mi fe vini ma dri gombere pata minirini ’bo, asi e’yere miniri ’ba ma amboru ’bo.

³⁷Mi ’ba pari mani ma pa agele ’bazu ’diyi walaru ’bo, pa mani nzoni ku;

³⁸ma dro ari’ba mani ma vuti, ma ja yi dri ra, ma ojani ma vile dika ku de nga yi odrani de teketeke ku.

³⁹Ma de yi teketeke ra; ma oso yi lekeke lekeke ’dini yi econi engazaru ku ani; ada, yi o’de ma palaa va.

⁴⁰A’disiku mi anzu ma opile omba ’bazu; mi ’ba ’ba engapi ma ruaa ombasi ’diyi va ma palaa ’bo.

⁴¹Dika mi fe ari’ba mani oja yi nguku ma vuleru ’bo, ma eco ani ’ba ma ngupi onzi ’diyi fuzaru kai,

⁴²Yi lu, te ti, ’ba yi papini yo; ada yi lu Yehova vu, te eri omvini e’yo yi tia ku.

⁴³Etu ’dasi ma oco yi nyingiriki ekile irifura nyakunirile, ma otu yi ekile okurunya geriarile, ma ere yi ra.

⁴⁴Mi pa vini ma abala ’ba manini ’bale ’diyi ma alia ’bo; mi mba ma ta ma ’bazu suru ndu ndu ma drilia ’bo; suru mani nile nga kuri nga azi nga ma dri.

⁴⁵’Ba jururu ’diyi nga yi ’ba va ma palaa; coti yini e’yo mani eriria yi nga azita mani inzi ra.

⁴⁶’Ba jururu ’diyi nga avi ra, yi nga efu pari yini yi zizuria rua oyaza be.

⁴⁷Yehovani ’dani ’dani; kata maniri ma ovu inzizaru, Mungu kata pata maniriniri ma ovu ’bazaru uru,

⁴⁸Mungu ma arioti ofepiri suru ndu ndu ’bapi va ma palaari’i,

⁴⁹ma ofupi ari’ba mani ma eseliasiri’i; adaru, mi ma enga uru aga ’ba engapi ma ruaa ombasi ’diyi ra, mi adri ma ari ’ba egana beri ma dria.

⁵⁰E’yo ’disi ma nga awa’difo fe mi dri, Yehova la, suru ndu ndu ma eselia, azini ma nga ongo ngo ru mini inzizu.

⁵¹Eri pata amboru fe opi erini dri, azini eri leta yiki beri ece ’ba erini odu osule driniari dri, ’di Daudi’i, a’bianzi erini ’diyi dri indi ’dani ’dani,