Read lugbara 2 Samueli 3 Bible Online

2 Samueli 3 - lugbara bible

2 Samueli 3

¹A’di ’diza izu ovu suru Sauloni pi ma eselia suru Daudini be; te okpo Daudini zo dika dika, te isuru Sauloni ma okpo de i dika dika.

²Te Daudi ti anzi Hebironia osipi okori Aminoni’i, Ahinoamu Yezireeli zi vileri’i;

³iriri Kileabu’i, Abigaili Nabali ’ba Karimeliari ma awuzi vileri’i; nari Abisalomu’i, Maaka Talimai opi Gesuriari zi ma mvi’i;

⁴suri Adoniya Hagiti mvi’i; towiri Sefatia Abitali mvi’i;

⁵aziari Itireamu oku Daudini Egila vileri’i. Daudi ti ’diyi Hebironia.

⁶Eri nga eca ’dini, a’di ’dizani ovuria suru Saulo pini ma eselia suru Daudini beria, Abineri eca okporu suru Sauloni ma eselia.

⁷Te Saulo ovu oku ati’boru be, ru erini Rizipa, Aya zi’i; re Isiboseti ’yo Abineri ma tia. Mi fi oku ati’boru ma atini vu a’di e’yosi ya?

⁸Te Abineri nga ovu adra be tu e’yo Isibosetini ’yolerisi, eri ’yo ra kini, Ma ovu Yuda ma oce drini ya? Andru ma ece asi onyiru mani suru mi ati Sauloni pi vu, adripi erini pie, lagyi erini ’diyi pie, ma feni mi Daudi ma dria ku; te ti, andru mi asu su ima ruaa oku ’di ma e’yosi.

⁹Mungu ma ’ye Abineri vu ’dini, azini agapi rari indi, ma ka e’yo Yehovani oyo sozu Daudi ma e’yosiri ’ye eri dri ku,

¹⁰opi nyaza nzezu suru Sauloni ma driasi, azini oguna Daudini ’bazu Israeli pi ma drilia Yuda be, engazu Dania cazu Beerisebaa.

¹¹Te Isiboseti econi e’yo lazini omvizaru Abineri ma tia ku, a’disiku eri ru eri.

¹²Te Abineri pe ojio ma ti Daudi vu Hebironia, ’yozu kini, Angu ’dori a’dini ya? Mi azi e’yo aziza ma be, te mi ne, dri mani nga ovu mi be Israeli dria esezu mi vu ani.

¹³Te eri ’yo eri tia, Onyiru; ma nga e’yo aziza azi mi be, te ma azi mi dri e’yo alu ’yezu; eri ’di, mi ka emu ma mile ne, mi ngani ma mile ne ku mi ka Mikali Saulo zini eji oko ku.

¹⁴’Di ma vutia Daudi nga ojio ma ti pe Isiboseti Saulo mvi vu, ’yozu kini, Mi fe ma dri oku mani Mikalini, mani azile ndra ma dri enyiriko agele drilia ’ba Filisitiaa turu alu ’diyi vilerisiri.

¹⁵Te Isiboseti nga ’ba ti pe eri ’duzu agupi erini Palitieli Laisi mvi vusi.

¹⁶Te agupi erini mu eri be, eri wu erini muria, bi eri ma vuti cazu Bahurimua. Te Abineri nga ’yo eri tia, Mi mu, mi mvi; te eri mvi ra.

¹⁷Te Abineri o’yo e’yo tualu ’ba ’wara Israelini ’diyi be, kini, Ndra emi le Daudini ovuzu opiru emi drilia.

¹⁸Te curu’do emi ’ye e’yo nderi; a’disiku Yehova ’yo e’yo Daudini, kini, Ati’bo mani Daudi ma drisi, ma nga ’ba mani Israeli pi opa ’ba Filisitiaa ’diyi pi ma dria, ari’ba dria yini be.

¹⁹Te Abineri ’yo Benyamini ma tia indi; ’di ma vutia Abineri mu Daudi vu Hebironia, e’yo dria ovupi onyiru Israeli pi ma milia suru Benyamini be ’diyi oluzu eri tia.

²⁰’Dini Abineri eca Daudi vu Hebironia, ’ba kali iri erini ’diyi be. Te Daudi ’ba omu Abineri pi dri ’ba ovupi eri be ’diyi be.

²¹Te Abineri ’yo Daudi ma tia, Ma nga nga, ma nga mu, ma nga Israeli dria oku opi mani opi ambori vu, ’dini yi ma azi e’yo aziza tualu mi be, ’dini mi eco ovuzu opiru ’ba dria mini lele ovuzu opiru yi drilia ’diyi ma drilia. Te Daudi nga di geri fe Abineri dri; eri mu asi anzuru be.

²²Te mi ne, ati’ba Daudini eca Yoabu be engazu a’diasi, yi eji afa yini opale a’dia tre ’diyi yi be. Te Abineri ovuni Daudi be Hebironia ku, a’disiku erini eri ti pele ra’i erini mule asi anzuru berisi.

²³Te Yoabu ka eca asikari ovupi eri be dria ’diyi be, yi olu Yoabu tia kini, Abineri Neri mvi eca opi vu, te eri fe eri dri geri ra, eri mu asi anzuru be.

²⁴’Di ma vutia Yoabu mu opi vu, ’yo ra, Mi ’ye a’dini ya? Mi ne, Abineri eca mi vu; mi fe eri dri geri erini muzu ani a’di e’yosi ya?

²⁵Mi ni ra, Abineri Neri mvi eca mi icizu, azini fuza mini pi nizu efiza mini be, azini e’yo dria mini ’yele ’diyi nizu indi.

²⁶Te Yoabu ka fu Daudi vusi ’bo, eri pe ojio ti Abineri ma vutia, yi eji eri dika engazu yi Sirania; te Daudi nini e’yo nderi ku.

²⁷Abineri ka emvi Hebironia ’bo, Yoabu ’du eri ji kalaa kalitilia agadua e’yo ’yozu eri tia oyokolosi, ’dale eri so eri alia, ’ dini eri dra ra, eri ma adri Asaheli ma avu ofezu.

²⁸’Di ma vutia, Daudi ka e’yo nderi eri ra, eri ’yo kini, Abineri Neri mvi ma avuari ovuni ma dria kani opi nyaza mani ma dria Yehova ma milia aluani ku, kpere ’dani ’dani.

²⁹Eri ma ’de be Yoabu pi ma dria i ma ati ma ori’ba be; ori’ba Yoabuni ma eselia ’ba vini efuzu ruaniari, kani ’ba ofu beri, kani ’ba acipi kalisiri, kani ’ba lile seisiri, kani ’ba owupi nyakaakosiri, ’ba ’diyi ma ece ovuzu ’ dani ’ dani ku.

³⁰’Dini Yoabu pi adri Abisai be, yi fu Abinerini, erini ndra adripi ’yini Asahelini fule a’di eselia Gibeo’niarisi.

³¹Te Daudi nga ’yo Yoabu pi ma tia ’ba dria ovupi eri be ’diyi be kini, Emi osi bongo suza emini, emi su koliba emi opilia’i, emi owu candisi Abinerisi. Te opi Daudi bi avu nderi ma vuti.

³²Te yi sa Abinerini Hebironia; te opi wu o’duko urusi Abineri ma nyadria; te ’ba dria owu indi.

³³Opi wu candisi Abineri ma e’yosi, ’yozu kini, Abinerini drazu ’ba azazaleri onyiru ya?

³⁴Yi ombeni dri mini bakasi ku, azini yi ombeni pa mini anzirikusi ku indi; te ekile ’bani ’dele ’ba onzi ma driliarile mi e’de ’dini. ’Ba dria owu dika eri ma dria.

³⁵Te ’ba dria eca Daudini omizu nyaka nyazu de nga etu ’deni ku; te Daudi so oyo kini, Mungu ma ’ye ’dini ma vu, azini agapi rari indi, ma ka enya ma aji kani nyaka azini ma aji ’bi de nga etu ’deni ku

³⁶’Ba dria yi ne e’yo nderi, te eri ovu onyiru yi ma milia; ekile e’yo dria opini ’yelerini ovule onyiru ’ba dria ma miliarile.

³⁷’Dini ’ba ongulumuru dria, azini Israeli dria, yi va e’yo Abineri Neri mvini drazuri ovuni e’yo opini ku.

³⁸Opi nga ’yo ati’ba erini ’diyi ma ria kini, Emi nini ku ya, andru opi, ’ba amboru ruri, dra Israeli eselia.

³⁹Te andru ma ovu okpo kokoru, ka tro yi osu odu ma dria ti; ’ba ’diyi Zeruiya anzipi, yi ma aga. Yehova ma ofe ’ba e’yo onzi ’yepiri ekile e’yo onzi erinile!