Read lugbara 2 Samueli 5 Bible Online

2 Samueli 5 - lugbara bible

2 Samueli 5

¹’Di ma vutia suru Israelini dria yi eca Daudi vu Hebironia, ’yo eri tia kini, Mi ne, ama ovu fala mini, azini kalanya mini.

²Ewu ndra Sauloni ovuzu opiru ama driliarisi, mi ovu ndra ’ba Israeli ofupiri azini ofipiri mi’i; te Yehova ’yo mi tia, Mi nga ovu ’ba suru mani Israeli ma ta mbapiri, mi nga ovu vini opiru Israeli ma drilia.

³’Dini ’ba ’wara Israelini ’diyi dria eca opi vu Hebironia; te opi Daudi eri azi e’yo aziza yi be Hebironia Yehova ma milia, yi osu odu Daudi ma dria eri ’bazu opiru Israeli ma drilia.

⁴Eli Daudini ovu kali na erini e’dozu opi nyazurisi, eri nya opi eli kali su.

⁵Eri nya opi Yuda ma drilia Hebironia eli aziri drinia mba azia; eri nya vini opi Yerusalemua Israeli pi ma drilia Yuda be eli kali na drini na.

⁶Te opi pi mu Yerusalemua ’ba erini ’diyi be, a’di ’dizu ’ba Yebusini ’diyi be, ’ba ovupi angu nderi ma alia, ’yopi Daudi tia kini, Mi ngani efi ’ doa ku, re ’ba mile koko ’diyi pi nga mi oga ’ba acozaru ’diyi be-yini egaria kini, Daudi econi efizaru ’doa ku-’diyi.

⁷Te ti, Daudi ’du pari okporu Zionini, adaru eri aku Daudiniri.

⁸Etu ndesi Daudi ’yo ra, ’Ba lepi ’ba Yebusini fupiri ma tu yi gerisi ’ba acozaru ’diyi pi cozu ’ba mile odrazaru ’diyi be, yi ari’ba Daudiniru ’diyi. E’yo ’disi yi ’yo ra, ’Ba mile odrazaru piyi ’ba acozaru be econi fizaru jo alia ku.

⁹Te Daudi nga ovu pari okporu nderi ma alia, yi omve eri aku Daudini. Te Daudi si aku ambo nderi kalaa dria engazu Miloa cazu aku nde alia.

¹⁰Te Daudi ma ru nga ku ambo dika dika, a’disiku Yehova Mungu asikari ongulumurunirini ovule eri berisi.

¹¹Te Hiramu, opi Turoni pe ndra ojio ti Daudi vu pati marioni pi be, onduou mbau sipi ’diyi pie, onduou jo sipi ’diyi pie; yi si jo Daudi dri.

¹²Te Daudi ni Yehova ’ba i okporu opiru Israeli ma drilia, azini eri edre opi nyaza ini amboru ’ba erini Israeli ma e’yosi.

¹³Te Daudi ’du oku ati’baru azini piyi oku azini ’diyi be Yerusalemuasi, erini emvizu Hebironiasiri ma vutia; yi oti Daudi dri agupianzi azini, ezoanzi azini be.

¹⁴Anzi ’ tile eri dri Yerusalemua ’diyi ma ru ’di: Samua pi, Sobabu pi, Natani pi,Sulemani pi,

¹⁵Ibihari pi, Elisua ’ pi, Nefegi pi, Yafia pi,

¹⁶Elisama pi, Eliada pi, Elifeleti pie.

¹⁷’Ba Filisitiaa ’diyi ka eri kini, yi osu odu Daudi dria ovuzu opiru Israeli ma drilia ’bo, ’ba Filisitiaa ’diyi nga mu dria uru Daudini ndazu; te Daudi eri e’yo nderi ra, eri si va pari okporuria.

¹⁸Te isu ’ba Filisitiaa ’diyi eca, ere yi e’bu Refaimuaria ’bo.

¹⁹Te Daudi zi Yehova tia kini, Ma ma mu uru ’ba Filisitiaa ’diyi vu yi ya? Mi nga yi fe ma dri ra ya? Te Yehova ’yo Daudi tia, Mi mu; a’disiku ma nga yi fe mi dri ra ada.

²⁰Te Daudi ca Baali-perazimua, te Daudi aga yi ’dale; eri ’yo ra, Yehova anyo ari’ba mani ma driliasi ’bo, ekile yi tizani nyaku anyolerile. E’yo ’disi yi ’da pari nderi ma ru Baali-perazimu’i.

²¹Te ’ba Filisitia ’diyi yi ku wura toko yini inzile ’diyi ’dale, te Daudi pi ’ba erini ’diyi be o’du yi, ji indi.

²²Te ’ba Filisitiaa ’diyi yi emu uru dika, ere yi e’bu Refaimuaria.

²³Te Daudi ka zi Yehova tia, eri ’yo, Mi mu uru ku; mi oja mi yi ngukuasi, mi nga ca yi vu pati ’dayi ma drilia.

²⁴Eri nga eca ’dini, mi ka awuni eri patisia ekile ididile, mi enga mbe1e, a’disiku Yehova fu mi drilia ’bo, asikari ongulumuru ’ba Filisitiaa ’diyini ’diyi ofuzu.

²⁵Te Daudi ’ye ’dini, ekile Yehovani azile leri dririle, eri oco ’ba Filisitiaa ’diyi engazu Gebaa cazu kpere Gezeria.