Read lugbara 2 Samueli 7 Bible Online

2 Samueli 7 - lugbara bible

2 Samueli 7

¹Eri nga eca ’dini, opini ovule jo erini ma alia, Yehovani a’di asule juru erini eri ageia ’diyi dri ava liza fezurisi,

²opi nga ’yo nabi Natani tia kini, Mi ne nga, ma ovu jo sile mario patisiri ma alia, te sanduku Munguni ovu hema alia.

³Te Natani nga ’yo opi tia, Mi mu, mi ’ye e’yo dria ovupi mi asiarile; a’disiku Yehovani mi be ci.

⁴Eri eca ’dini ini nderisi, e’yo Yehovani eca Natani vu, ’yozu kini,

⁵Mi mu ’yo ati’bo mani Daudi ma tia, Yehova kini ’dini, Mi nga jo si ma dri mani ovuzu alenia ra ya?

⁶Ma ovuni jo be ku engazu o’du mani Israeli anzi ofuzu Misiriasirisi ecazu kpere andru, te mani aciria ma ovu hema alia.

⁷Pari dria mani acizu Israeli anzi beria, ma ’yo ’ba e’yo lipi Israeli ma eselia mani yi azile ’ba mani Israelini ma ta mbazu ’diyi ma azi alu ma tia ra ya, ’yozu, Emi sini ma dri jo mario patisi ku a’di e’yosi ya?

⁸E’yo ’disi curu’do, mi nga ’yo ’dini ati’bo mani Daudi ma tia, kini, Yehova asikari ongulumuruniri ’yo ’dini, Ma e’du mi ndra nyamukoa kabilo oceria, ’dini mini ovuzu opiru ’ba mani Israeli ma drilia;

⁹ma ovu mi be pari dria mini muzuria, ma ja ari’ba mini ma dri mi drilia dria ra; te ma nga mi ru ’ba amboru ekile ’ba ambo ru kupi nyakuarile,

¹⁰Ma nga pari pe ’ba mani Israeli dri, ma nga yi i’di, ’dini yi ma ovu pari yi ngulupini ma alia, ’ba ngani yi enze dika ku; azini ’ba onzi ngani yi ’ye okposi ekile okorile dika ku,

¹¹ekile yini yi ’yele engazu ewu ’ba e’yo Jipi ’diyini ovuzu ’ba mani Israeli ma driliarisirile; ma nga vini ari’ba mini ma a’di asu ande liza fezu emi dri ra, Yehova ’yo vini mi tia, Yehovani nga ori’ba; mini ma jo si ra.

¹²O’du mini ka yi de ra, mi ka nga la mi a’bipi be, ma nga mvi mini efupi mi ruaari ’ba uru, ma nga opi nyaza erini edre ra.

¹³Eri nga jo si ma rusi, ma nga fe opi nyaza erini ma ogunani pa so ’dani ’dani.

¹⁴Ma nga ovu ata erini, azini eri nga ovu mva mani. Eri ka nga e’yo onzi ’ye, ma nga eri co kali ’banisi, cota anzi ’baninisi;

¹⁵te ma ngani yiki mani aleruri nze eri vusi, ekile mani ’yele Saulo mani nzele mi driliari vusirile ku.

¹⁶Suru mini, opi nyaza mini be yi nga ovu okporu mi drilia ’dani ’dani; oguna opi minini nga ovu okporu ’dani ’dani.

¹⁷Te Natani ’yo Daudi tia e’yo ’diyi dria, azini eceta ’diri dria.

¹⁸Opi Daudi nga di fi ri Yehova ma drilia, te eri ’yo ra, Opi Yehova la, ma a’dini, ori’ba mani yi a’dini ya, mini ma ejizu ’dopi?

¹⁹Te’di ovu nga mi milia e’yo wereni, Opi Yehova la; te mi ’yo indi ati’bo mini ma ori’ba ma e’yo ngapi ecapi ewu drozirisiri’i; ’di ovu ekile ’bani adrile ’yelerile ya, Opi Yehova la!

²⁰Te Daudi eco mi tia a’di e’yo azini ’yozu ya? A’disiku mi ni ati’bo mini ra, Opi Yehova la!

²¹E’yo ’yoza mini ma e’yosi mi ’ye e’yo amboru ’diyi dria, ekile mi ngulupi ma asini lelerile, fezu ati’bo mini ma ni e’yo ’diyi.

²²A’disiku mi ovu ambo, Yehova Mungu la; azini mileni aluni yo, Mungu azini yo kiri mi’i, ekile amani erile dria ama bilesirile.

²³Te suru azini nyakua ekile suru mini Israelileri ngori ya, suru nde Munguni muzu yi onzezu ovuzu ’ba i ngulupiniru,i ma ru ’bazu ambo, e’yo amboru ’yezu yi dri, azini e’yo uriuriru ’yezu angu yinia, ’ba mini mini onzele Misiria suru pi ma driasi adrou yini be ’diyi ma drilia?

²⁴Mi edre mi ngulupi dri ’ba mini Israeli ovuzu ’ba miniru ’dani ’dani; te mi, Yehova, eca ndra Mungu yiniru.

²⁵Yehova Mungu la,curu’do e’yo mini ’yole ’bo ati’bo mini pi ma e’yosi ori’ba erini beri, mi edre eri ’dani ’dani, mi ’ye ekile mini ’yolerile.

²⁶Mi fe ma ’ba ru mini amboru ’dani ’dani, ’yozu Yehova asikari ongulumuruniri ovu Mungu Israelini, te ori’ba ati’bo mini Daudini nga pa so mi drilia.

²⁷Yehova asikari ongulumuruni, Mungu Israeliniri la, te mi’i, mi ece ati’bo mini dri ’yozu, Ma nga jo si mi dri; e’yo ’disi eri ovu ati’bo mini ma asia zita ’dori zizu mi tia.

²⁸Te curu’do, Opi Yehova la, mi ovu Mungu, e’yo mini ’yole ’diyi Yi adaru, te mi azi e’yo onyiru ’dori ati’bo mini dri ’bo;

²⁹e’yo ’disi curu’do eri ma fe ayiko mi dri asi ndriza ’bazu ati’bo mini ma ori’ba ma dria, ’dini ma ovu ’dani ’dani mi drilia; a’disiku mi ’yo e’yo nderi ’bo, Opi Yehova la, mi fe ati’bo mini ma ori’ba ma ovu drilebaru ’dani ’dani asi ndriza minisi.