Read lugbara 2 Samueli 9 Bible Online

2 Samueli 9 - lugbara bible

2 Samueli 9

¹Daudi nga ’yo kini, ’Ba alu ori’ba Sauloni ma eselia ace nga ra ya, ’dini ma eco asi ndriza ecezu eri vu Yonatani ma e’yosi?

²Te ati’bo alu ovu Saulo ma joa, runi Ziba’i, te yi omve eri Daudi vu; opi zi eri tia, Mi Ziba’i ya? Eri ’yo eri tia, Ati’bo miniri eri’i.

³Opi nga ’yo, ’Ba azini aceni nga ori’ba Sauloni ma eselia ku ya, ’dini ma eco asi ndriza Munguni ece eri vu? Ziba nga ’yo opi tia, Ace nga mva Yonatanini alu; pa emi acozaru.

⁴Opi ’yo eri tia, Eri ngoa ya? Te Ziba nga ’yo opi tia, Mi ne, eri ovu Makiri Amieli mvi vile joa Lo-debaria.

⁵Opi Daudi nga di ’ba ti pe eri ejizu engazu Makiri Amieli mvi vile joa Lodebariarisi.

⁶Te Mefiboseti Yonatani Saulo mvi ma mvi, eca Daudi vu, eco i va, su mile ini va nyakua, inzita fezu. Te Daudi ’yo, Mefiboseti! Eri omvi e’yo, Mi ne, ati’bo miniri ’do.

⁷Daudi ’yo eri tia, Mi ru ku; te ma nga asi ndriza ece mi dri mi ati Yonatani ma e’yosi, ma nga angu dria ndra mi a’bi Sauloni ’diyi omvi mi dri; te mi nga nyaka nya mesa mani ma tia ’dani ’dani.

⁸Eri fe inzita, kini, Ati’bo miniri a’dini, ’dini mini oce draza maleri nezu ya?

⁹Vutinia opi nga Ziba ati’bo Sauloni omve, ’yo eri tia, Afa dria ndra ovupi Sauloni ori’ba erini ’diyi be driari, ma fe eri opi mini ma mvi dri.

¹⁰Te mi’i, anzi mini pie, ati’ba mini pie, emi nga amvu ’ya eri dri, emi nga afa amvuari eji, ’dini opi mini ma mvini ma ovu nyaka be, nyazaru; te Mefiboseti opi mini ma mvini nga nyaka nya mesa mani ma tia ’dani. Te Ziba ovu agupianzi be mudri drini towi, azini ati’ba be kali iri,

¹¹Ziba nga ’yo opi tia, Ati’bo minini nga ’ye dria ekile opi manini azile ati’bo erini tiarile. Te opi ’yo, Mefibosetini nga nya mesa mani ma tia ekile anzi mani ma azile,

¹²Te Mefiboseti ma mvi karilaururi indi, runi Mika’i. Te ’ba dria Ziba ma joa ’diyi ovu Mefiboseti ma ati’baru.

¹³’Dini Mefiboseti ovu Yerusalemua; te eri nya ’dani mesa opini ma tia. Te eri ma pa aco iri tro.