Read lugbara 1 Opi 1 Bible Online

1 Opi 1 - lugbara bible

1 Opi 1

¹Te opi Daudi ovu ’ba dezani eli be kakau; yi ka bongo su ruania ti, ruani drini ani ku.

²E’yo ’disi ati’ba erini ’yo eri tia, Eco onyiru ma nda zamva opi mani amboruri dri, eri ma so pa opi drilia eri agei tezu; eri ma la mi agatia, ’dini opi mani amboruri ma rua ma dri ani.

³’Dini yi nda zamva ndrizaru angu dria ma alia cazu kpere lokiri Israelinia, te yi isu Abisagi ’ba Sunamuni yi eji eri opi vu.

⁴Zamva nderi ovu ndrizaru tu; eri te opi ma agei, te opi lani erisi ku.

⁵Te Adoniya Hagiti mvi ’ba i ngulupi uru, ’yozu, Ma nga ovu opiru ma’i; eri ede i ngulupi dri gari pi asikari akanya dria ’diyi pie, ’ba kali towi nzupi eri drilia ’diyi pie.

⁶De ata erini egani ndra eri ma dria aluni ku, ’yozu kini, Mi ’dini a’di e’yo ’ye ya? Eri ’ba ndrizani tu; osi eri Abisalomu ma vutia.

⁷Eri eci ti Yoabu Zeruiya mvi be, azini kuhani Abiatari be; te yi bi Adoniya ma vuti eri aza kozu ani.

⁸Te kuhani Zadoki pi, Benaya Yehoyada mvi pie, nabi Natani pie, Simei pie, Rei pie, ’ba okporu Daudi vile ’diyi pie, yi fini Adoniya piyiru ku.

⁹Te Adoniya nga kabilo ofu, ti ’pie, anyapa osoru ’diyi pie, oni Zoheletini ovupi Eni-rogeli ageiaria; omve i adripi dria, opianzi pie, ’ba Yudaa ovupi opi vile ati’baru ’diyi be dria,

¹⁰te awuni nabi Natanini omve ku, Benaya pie, ’ba okporu ’diyi pie, adri Sulemani pie.

¹¹Te Natani ’yo Bati-seba Sulemani andri tia, Mi erini nga e’yo Adoniya Hagiti mvini opi nyazu opi lamani Daudini nikokoruri ku ya?

¹²Awa’dini kirikiri mi emu, mi ku ma mi dri ondua fe, ’dini mi eco mi ngulupi ma idri pazaru, Sulemani mi mvi ma idri be indi.

¹³Mi mu di, mi fi opi Daudi vu, mi ’yo tinia, Opi mani amboruri la! Mi soni ndra oyo ati’bo okuru mini tia kini, Sulemani mi mvini nga opi nya ma vutiani, eri nga ri oguna opiniri ma driani ku ya? Ka’dini Adoniyani opi nyani a’disi ya?

¹⁴Mi ne, mini e’yo ’diyi ’yoria opi be ’dini, ma nga fi mi ma vutisi alu indi, ma nga fe e’yo mini ’yole ’diyi ma so pa kilili.

¹⁵Bati-seba nga di fi jo aliza ma alia opi vu (te opi nde de de suru suru ’bo, azini Abisagi ’ba Sunamuari ovu eri agei teria),

¹⁶Batiseba nga avu va opini inzizu. Opi ’yo tinia, Mi le a’dini ya?

¹⁷Eri omvi eri tia, Opi mani, mi soni ndra oyo ati’bo okuru mini tia kini, Sulemani mi mvini nga opi nya ma vutiani, eri nga ri oguna opiniri ma driani, ku ya?

¹⁸Te mi ne, curu’do Adoniyani opi nyani; te mi’i, opi mani amboruri, mi nini e’yo nderi ku.

¹⁹Eri ofu ti, anyapa osoru ’diyi pie, kabilo kakau ’diyi pie ’bo, omve vini opianzi dria, kuhani Abiatari pie, Yoabu ’ba asikari ongulumuru dri cepiri pie ’bo; te eri omveni Sulemani ati’bo miniri ku.

²⁰Te mi’i, opi mani amboruri la, Israeli dria yi mile ’ba mi vu, ’dini mi ma ece yi dri ’ba ngapi ripi opi mani amboruri ma oguna ma dria eri vutiari.

²¹Ka, ’dini yo, eri nga eca ’dini, opi mani amboruri ka nga o’du ko tualu a’bi erini be ’bo, yi nga ama omve mva mani Sulemani be ’ba onziru.

²²Te mi ne, erini nga e’yo ’yoria opi be, nabi Natani eli ra,

²³Yi ’yo opi tia kini, Mi ne, nabi Natani eca ’di. Ka eli opi drilia ’bo, eri avu va opi drilia, su dri va nyakua.

²⁴Te Natani ’yo ra, Opi mani amboruri la, mi ’yo mi’i, Adoniyani nga fu opiru ma vutia, eri nga ri oguna opini maniri ma driani, ya?

²⁵A’disiku andru eri si va, eri ofu ti, anyapa osoru ’diyi pie, kabilo kakau ’diyi pie ’bo, eri omve opianzi dria, Yoabu ’ba asikari ongulumuru dri cepiri pie, kuhani Abiatari pie; te mi ne, yi ovu nyaria azini mvuria eri drilia, ’yozu, Opi Adoniya ma rua ma adri ala ’dani.

²⁶Te ma’i ati’bo mini, kuhani Zadoki pie, Benaya Yehoyada mvi pie, Sulemani ati’bo mini pie, eri omveni ama ku.

²⁷E’yo ’diri opi mani amboruri ’yeni ya, de mi awuni ece ati’ba mini dri ’ba ngapi ripi opi mani amboruri ma oguna ma dria eri ma vutiari ku ya?

²⁸Te opi Daudi omvi e’yo ra, Mi omve mani Bati-sebani. ’Dini eri eli opi ma milia, pa sozu opi ma drilia.

²⁹Te opi so oyo kini, Ekile Yeho-vani ovule idrirurile, eri’i ma orindi onzepi candi dria ma aliasiri,

³⁰adaru ekile mani oyo sole ndra mi tia ru Yehova Mungu Israelirurisirile, ’yozu, Sulemani mi mvi nga opi nya ma vutiani ada, eri nga ri oguna maniri ma dria ma pariani; adaru ma nga ’ye ’dini andru.

³¹Bati-seba nga di avu va, su drini va nyakua opini inzizu, ’yozu, Opi mani amboru Daudi ma rua ma adri ala ’dani ’dani!

³²Te opi Daudi ’yo ra, Mi omve mani kuhani Zadoki pi, nabi Natani pie, Benaya Yehoyada mvi pie. Te yi eca opi drilia.

³³Te opi ’yo yi tia, Emi ji ati’ba opi emi vilerini ’diyi emi be tualu, emi fe ma mvi Sulemani ma tu akanya ma ngulupi vileri ma dria, emi ji eri va Gihonia;

³⁴te kuhani Zadoki pi nabi Natani be, ma osu odu eri dria ’dale eri ’bazu opiru Israeli ma drilia; emi nga di guka vu, ’yozu kini, Opi Sulemani ma rua ma ovu ala ’dani!

³⁵’Di ma vutia, emi ma etu eri ma vutia, eri nga emu ri oguna mani ma dria; a’disiku eri nga ovu opiru ma pariani; ma pe eri opiru Israeli pi nyazu Yuda be.

³⁶Te Benaya Yehoyada mvi omvi e’yo opi tia, Awa’dini! Yehova, Mungu opi mani amboruriniri ma ’yo ’dini indi.

³⁷Ekile Yehovani ovule ndra opi mani amboruri berile, eri ma ovu Sulemani be trotro indi, ma ’ba oguna eriniri amboru aga opi mani amboru Daudiniri ma oguna ra.

³⁸’Dini kuhani Zadoki, nabi Natani pie, Benaya Yehoyada mvi pie, ’ba Keretia, ’diyi pie, ’ba Peletia ’diyi pie, nga di si va, yi fe Sulemani ma ri akanya opi Daudi vileri ma dria, yi ji eri kpere Gihonia.

³⁹Te kuhani Zadoki ’du ti o’yu odu be Hema aliasi, osu eri Sulemani dria. Yi vu guka ra; te ’ba dria yi ’yo ra, Opi Sulemani ma rua ma adri ala ’dani!

⁴⁰’Ba dria nga tu eri ma vutisi, yi vu ejeleko, yi otre ayikosi tu, ’dini nyaku osi i otreta yinisi ani.

⁴¹Te Adoniya pi omu dria ovupi eri be ’diyi be, yi eri otrena nderi yini nyaka nyazu dezu ’boria. Te Yoabu ka o’duko gukani eri, eri nga ’yo ra, O’yona efupi aku amboa ’diniri ma efini ngoni ya?

⁴²De erini nga e’yo ’diri ’yoria, mi ne, Yonatani kuhani Abiatari ma mvi eca; te Adoniya ’yo ra, Mi efi, a’disiku mi ’ba onyiruni, e’yo kuza onyiru ejipiri.

⁴³Te Yonatani omvi e’yo Adoniya tia kini, Opi amani Daudi ’ba Sulemani opiru ’bo ada;

⁴⁴opi pe kuhani Zadoki pi ma ti eri be, nabi Natani pie, Benaya Yehoyada mvi pie, ’ba Keretia ’diyi pie, ’ba Peletia ’diyi pie; azini yi ’ba eri muzu akanya opi vileri ma dria;

⁴⁵te kuhani Zadoki pi nabi Natani be, yi osu odu eri dria Gihonia eri ’bazu opiru ’bo; engazu ’dale yi tu uru ayikosi, ’dini aku amboru nderi ga tre o’yonasi. ’Diri o’duko emini erileri’i.

⁴⁶Sulemani ri di oguna opi nyazuri ma dria ’bo.

⁴⁷Indi vini ati’ba opi vile ’diyi eca opi amani amboruri Daudini inzizu, ’yozu, Onyiru Mungu mini ma ’ba ru Sulemanini ma ku aga ru miniri ra, oguna eriniri ma ovu amboru aga oguna miniri ra. Te opi eri avu va pari erini lazuri ma dria.

⁴⁸Opi ’yo ’dini indi, Yehova Mungu Israeliniri ma ovu inzizaru, erini ’ba alu fele rizu oguna mani ma dria andru, mani ndrele ma milesirisi.

⁴⁹Omu dria Adoniya vile ’diyi ma rua nga di ya ya, yi enga uru, ere yi dria dria muzu geri yinia ra.

⁵⁰Te Adoniya ovu urisi Sulemani ma e’yosi; te eri enga ra, mu pari edeta edezuri ma o’yu bi ci.

⁵¹Te ’ba yi ’yo Sulemani tia, Mi ne, Adoniya ovu urisi opi Sulemani ma e’yosi; te mi ne, eri bi pari edeta edezuri ma o’yu ra, ’yozu kini, Opi Sulemani ma so oyo ma tia oko raka, kini eri ngani ati’bo iniri li seisi ku.

⁵²Sulemani ’yo ra, Eri ka i e’da ’ba baru, dribi erini aluni ngani e’de nyakua ku; te yi ka e’yo onzi isu eri alia, eri nga dra ra.

⁵³’Dini opi Sulemani eri pe ’ba ti, yi osi eri va pari edeta edezuriasi. Eri emu, eri avu va opi Sulemanini inzizu; te Sulemani ’yo eri tia, Mi mu jo minia.