Read lugbara 1 Opi 10 Bible Online

1 Opi 10 - lugbara bible

1 Opi 10

¹Te opi okuru Sebaari ka e’yo kuza Sulemanini ru Yehovanisiri eri ra, eri emu eri o’bizu zita ewarusi.

²Eri eca Yerusalemua ’ba kakau be, yi eji afa eri ma vutisi, ngamia afa aji be arikariru ejipi ’diyi be, mele kakau pie, oni ajeambosi ’diyi pie; te eri ka eca Sulemani vu eri nze eri tia e’yo ovupi eri ma asiari dria.

³Te Sulemani ece e’yo erini zile ’diyi dria; e’yo aluni opini ndepi ra, erini ecole ecele eri dri kuri yo.

⁴Te opi okuru Sebaari ka ondua Sulemanini pi ne jo erinisileri pie,

⁵nyaka mesa erini ma driari pie, riza ’ba erinini pie, azi agei teza ’ba azi ngapi eri dri ’diyini pie, bongo yini pie, ati’ba okelea erini fepi mesaa ’diyi pie, geri erini tuzu fizu jo Yehovani ma aliari pie dria, ava erini oti ra.

⁶Te eri ’yo opi tia, E’yo mani erile angu ma ngulupini ma alia, ’yeta mini pisi ondua mini beri, yi ovu e’yo kuza adaruri.

⁷Te ti, ma a’ini ndra e’yo nderi ku, de nga ma emuni nezu ma milesi ku; te mi ne, yi eceni ma dri e’yo nde ma aliniri nga ku; te ondua mini pi lonyi mini be yi aga e’yo kuza mani erile ndrari ra.

⁸Ayiko ’ba mini ’diyi dri! Ayiko ati’ba mini pa sopi mi drilia ’dani ondua mini eripi ’diyi dri!

⁹Inzita ma ovu Yehova Mungu mini vu, mi avani eri valerisi erini mi ’bazu oguna opini Israeliniri ma driarisi! Yehovani Israelini lele ’dani ’danirisi, eri ’ba mi opiru, e’yo lizu kililiru, e’yo onyiru ’yezu.

¹⁰Te eri fe opi dri mele onziru turu alu drini kali iri, azini afa arikariru tu ’diyi pie kakau, oni ajeambosi ’diyi pie; afa arikariru ongulumuru tro tro opi okuru Sebaarini fele opi Sulemani dri ’diyile ecani dika aluni ku.

¹¹Te indi vini oguru ongulumuru Hiramuni mele ejipi engazu Ofiriasiri, yi eji pati sandalini kakau tu Ofiriasi oni aje ambosi ’diyi be.

¹²Te opi ede pati sandali ’diyi jo Yehovani ma agoferu, opi vile jo ma agoferu indi, ede vini eri o’diru azini o’di zaburi ngozuriru ’ba ongo ngopi ’diyi dri; pati sandalini ’diyile ecani dika ku, ’ba neni nga vini ’dinile ku ecazu kpere andru.

¹³Te opi Sulemani fe opi okuru Sebaari dri afa dria erini lele ’diyi, afa dria erini a’ile ’diyi, afa Sulemanini fele lonyi opini ma eseliasi ’diyi ma dria. ’Dini eri oja i, mvi i vile angua, erii ati’ba ini be.

¹⁴Te mele ecapi Sulemani vu eli alusiri ma nziza ovu mele onzi turu azia kali azia drini azia,

¹⁵azini drinia orodri azini ’ba afa ozipi ’diyi pini ejileri, ’ba afa jepi ’diyi pie, opi dria ’ba yi osapi suru azini ma eselia ’diyini pie, ’ba ’ba dri cepi angu ndea diyi pie dria.

¹⁶Opi Sulemani ede gombere amboru turu iri mele dile dirisi; mele ovupi gombere alu alu ma aliari ovu sekeli turu azia.

¹⁷Azini eri ede gombere turu na mele dile dirisi; mele ovupi gombere ’diyi alu alu ma aliari ma o’bizani nziza na; te opi o’ba yi jo oce Lebanoniarini ma alia.

¹⁸Azini opi ede vini oguna amboru ewasisi indi, eri a’bu ruani mele alatararu agapirisi.

¹⁹Pari otiza mileko azia tuzu uru ovu eri drilia, drini ngukuari ovu nguluru, dri opirikala ovu kala ’doria ’daria indi, wura kami irini yi so pa dri opirikala nde ’diyi ma kalaa.

²⁰Te wura kamini mudri drini iri ovu pari otiza alu alu mileko aziari ma dria kala ’dasi kala ’disi. Oguna ’dileni suruti opi nyaza azinia aluni ku.

²¹Okelea dria Sulemanini ovu meleni, azini vini imvu dria ovupi jo oce Lebanoniarini ma alia ’diyi yi ovu mele alatararuni; aluni ovuni dahaburu ku, a’disiku ewu Sulemaninisi eri ovu ’ba ma milia afa tokole.

²²Opi ovu oguru ongulumuru Tarisisini be acizu yi mirini dria, tualu oguru ongulumuru Hiramuni be. Pale alu eli vusi, oguru ongulumuru Tarisisini nde ’diyi adri eca, mele ejizu, dahabu pie, ewasi pie, emgbeleke pie, aria sobi be taya ndrizaru ’diyi pie.

²³’Dini opi Sulemani aga opi nyakua ’diyi dria lenyisi azini onduasi ra.

²⁴Te wudrikuru dria nda ovuzu Sulemani ma milia, ondua erini erizu, ondua Munguni ’bale eri ma asiari.

²⁵Yi dria alu alu eji feta yini, imvu dahaburu piyi imvu meleru be, bongo pie, afa suza ombani pie, afa aji be arikariru pie, akanya pie, akanya farasiru pie, eli vusi eli vusi yi eji afa yini ma kalafe ’dipi.

²⁶Te Sulemani oku ndra gari ombani piyi asikari nzupi akanya dria ’diyi be; gari erini ombani ’diyi ovu ndra alifu alu drini turu su, asikari nzupi akanya dria ’diyi ovu alifu mudri drini iri, erini o’bale aku gari ombani ’diyia azini Yerusalemua indi opi vu ’diyi.

²⁷Opi fe dahabuni ecazu Yerusalemua onile, pati marioni kakau ekile pati elioru zopi angu ’dalaria ’diyile.

²⁸Akanya Sulemanini yi akanya engapi Misiriasi ’diyi; ’ba afa opini jepi ’diyi a’i yi nguluru nguluru, yi ofe yi ngulu vusi ngulu vusi.

²⁹Aje gari ombani omvezu engazu Misiriasiri ovu sekeli dahaburu turu azia, aje akanyani turu alu kali towi; ’dini yi eji yi opi Hitini ’diyi dri dria, azini opi Suriani ’diyi dri ’ba nde ’diyisi.