Read lugbara 1 Opi 12 Bible Online

1 Opi 12 - lugbara bible

1 Opi 12

¹Rehoboamu mu Sekemua, a’disiku Israeli dria ca Sekemua eri ’bazu opiru.

²Eri eca ’dini, Yeroboamu Nebati mvi ka e’yo nderi eri ra (a’disiku eri ovu ndra nga Misiria pari erini apazu nzuzu opi Sulemani ma miliarisi, Yeroboamu nde adri Misiria,

³te yi pe ’ba ti eri omvezu), Yeroboamu emu ’ba ongulumuru Israelini be dria, yi ’yo Rehoboamu tia kini,

⁴Mi ati ’ba ndra kulumbu ewaru ama dria, ’dini curu’do mi ’du azi ewaru mi atini, azini kulumbu nzizaru erini ’bale ama driari ma nziza fo, te ama nga azi nga mi dri beni.

⁵Eri ’yo yi tia, Emi mu nga te pale na, emi emu ma vu dika. ’Ba nde ’diyi mu di ra.

⁶Opi Rehoboamu nga di e’yo nderi ama tualu ’ba mbazaru pa sopi ndra i ati Sulemani drilia ewu erini ovuzu nga idrirurisi ’diyi be, kini, Emi ama e’yo ngoni ya, emini ngale fele ma driri omvizu ’ba ’doyi ma tia ya?

⁷Yi nga di e’yo omvi eri tia kini, Mi ka nga ovu ’ba ’diyi ma ati’boru andru, azi ngazu yi dri, e’yo omvizu yi tia, e’yo onyiru ’yozu yi be, ka’dini yi nga ovu ati’ba mini ’dani ’dani.

⁸Te eri ku e’yo amaza ’ba mbazaru ’diyini yini amale fele eri driri, te eri ama e’yo tualu karile zopi tualu eri be, pa sopi eri drilia ’diyi be.

⁹Eri zi yi tia kini, Emi fe e’yo amaza ngoni ya, ama ma omvi e’yo ’ba ’doyi tia ya? Yi ’yo ma tia kini, Mi ’du kulumbu mi atini ’bale ama driari ma nziza fo!

¹⁰Te karile aziru zopi eri be ’diyi omvi e’yo eri tia kini, Mi ma ’yo ’dini ’ba e’yo ’yopi mi be ’diyi ma tia. ’Ba ’diyi ’yo ra, Mi ati ’ba ndra kulumbu nzizaru ama dria, te mi ’du nzizani ama dri fo! ’Ba e’yo ’yopi ’dini ’diyi ma tia mi ma ’yo ’dini, Drimva gana maniri ovu oseru aga ma ati ma o’du ra.

¹¹Ma ati ’ba ndra kulumbu nzizaru emi dria, te ma nga kulumbu emini ma nziza adro drinia dika curu’do. Ma ati co ndra emi enyirikosi, ma di nga emi co otunukuasi.

¹²’Dini Yeroboamu piyi eca Rehoboamu vu ’ba ongulumuru be o’du narisi, ekile opini azilerile kini, Emmi emu dika ma vu o’du narisi,

¹³Te opi omvi e’yo ’ba ’diyi tia ti okporusi, eri ku e’yo amaza ’ba mbazaru ’diyini amale eri driri ja,

¹⁴eri ’yo yi tia ekile karileni amalerile, kini, Ma ati ’ba ndra kulumbu nzizaru emi dria, te ma nga kulumbu emini ma nziza adro drinia dika; ma ati co ndra emi enyirikosi, te ma nga emi co otunukuasi.

¹⁵’Dini opi erini e’yo ’ba nde ’diyini ku; e’yo nde eca ’dini Yehovani ’yelerisi, e’yo Yehovani ’yole Ahiya ’ba Siloari ma tisi Yeroboamu Nebati mvi ma tiari ma so pa ani beni.

¹⁶Te Israeli dria ka ndre opi erini e’yo yini ku, ’ba nde ’diyi omvi, e’yo opi tia kini, E’yo ama eselia Daudi pieri ngoni ya? Ama ovuni awuruso Yese mvini be aluni ku. Israeli la, emi mu hema eminia fo! Daudi, mi te mi ngulupi ma jo agei curu’do. ’Dini Israeli yi mu di hema yinia.

¹⁷Te Rehoboamu ovu opiru anzi Israelini adripi aku amboru Yudani ma alia ’diyi ma drilia.

¹⁸Opi Rehoboamu pe Adoramu ovupi opiru ’ba yini okule azi ngazu ’diyi ma driliari, te Israeli dria o’be eri onisi, dra ra, Te opi Rehoboamu nzu mbele fizu gari erini ma alia, apazu Yerusalemua.

¹⁹’Dini Israeli yi mbu suru Daudini ma ruaa amve ecazu kpere andru.

²⁰Te Israeli dria ka eri ra kini Yeroboamu emvi ’bo, yi pe ’ba ti eri omvezu fizu ’ba ongulumuru ma eselia, yi ’ba eri opiru Israelia dria ma drilia. ’Ba aluni bini suru Daudiniri ma vuti ku, pe kiri suru Yudaniri a’dule,

²¹Te Rehoboamu ka eca Yerusalemua, eri oku suru Yudaniri dria, azini suru Benyamininiri, adaru ’ba opele ombani ’diyi alifu pale turu alu kali aro, a’di ’dizu suru Israeliniri be, opi nyaza omvizu Rehoboamu Sulemani mvi ma dria.

²²Te e’yo Munguni eca Semaya ’ba Munguni vu, ’yozu kini,

²³Mi ma ’yo Rehoboamu Sulemani mvi opi Yudani ma tia, azini ’ba dria ovupi suru Yudani pi Benyaminini be ’diyi, azini ’ba acepi ’diyi ma tia dria kini,

²⁴Yehova ’yo ’dini, Emi ma tu a’di ’dizu adripi emini anzi Israelini ’diyi be ku. ’Ba dria ma mvi jo yinia, a’disiku e’yo ’dori fu ma vu. ’Dini yi eri e’yo Yehovani, yi mvi yi mu geri yinia ekile Yehovani ’yolerile.

²⁵Ewu nderisi Yeroboamu si Sekemu angu oniru Efiraimuniria, eri adri ’dale; eri fu ’dale eri si Penueli.

²⁶Te Yeroboamu ’yo i asia, Te opi nyazani nga emvi be suru Daudiniri vu;

²⁷’ba ’diyi ka nga tu edeta edezu jo Yehovani Yerusalemuari ma alia, ka’dini ’ba ’diyi yi nga asi yini oja dika opi yini vu, adaru Rehoboamu opi Yudaniri vu, te yi nga ma fu, nga mvi Rehoboamu opi Yudaniri vu.

²⁸’Dini opi ama e’yo, eri ede koanzi iri melesi. Eri ’yo ’ba nde ’diyi ma tia, Tuzu Yerusalemuari eri emi dri ewaru. Israeli la! Emi ne adrou emini, emi ofupi angu Misiriniasi ’diyi.

²⁹Eri ’ba wura kojani alu Betelia, aziniri eri ’ba Dania.

³⁰E’yo nderi eca ezataru, a’disiku ’ba nde ’diyi mu inzizu kojaa alu ma drilia, cazu kpere Dania.

³¹Eri si jo pari uruleru ’diyia, eri ope vini kuhani ’ba toko anzi Leviniru ku ’diyi ma eselia dria.

³²Te Yeroboamu ede omu amboru mba aro ma o’du mudri drini towisi, ekile omu Yudaarile, eri tu pari edeta edezuria; eri ’ye ’dini Betelia, edeta edezu koanzi erini edele ’diyi dri. Azini eri ’ba Betelia kuhani erini opele pari uruleru ’diyi ma agei tezu ’diyi ra.

³³Eri tu pari edeta edezu Beteliaria mba aro ma o’du mudri drini towisi; mba erini pele i ma asia i drisi ceniri; eri azi omu anzi Israelini ’diyi dri, eri tu pari edeta edezuria obiese vele veri vezu.