Read lugbara 1 Opi 13 Bible Online

1 Opi 13 - lugbara bible

1 Opi 13

¹Te emi ne, agu alu ’ba Munguni efu Yudaarisi e’yo Mungunisi cazu Betelia. Isu Yeroboamuni pa soria pari edeta edezuria obiese veria.

²Agu nderi oyu pari edeta edezuri ma ruaa e’yo Yehovanisi kini, Pari edeta edezuri la! Pari edeta edezuri la! Yehova ’yo ’dini: Mi ne, mvani nga osi suru Daudinia, runi nga ovu Yosia’i; eri nga kuhani pari uruleru ma agei tepi obiese vepi mi dria ’diyi ve mi dria edetaru, yi nga fala ’bani ve mi dria.

³Eri ece vini eceta o’du nderisi kini, ’Diri eceta Yehovani e’yoni ’yoleri’i: Mi ne, pari edeta edezu nderi nga i api ra, ofuta drinia ’diyi nga yi oda ra.

⁴Opi ka e’yo ’ba Mungunirini ’yoleri eri ra, erini oyule pari edeta edezu Beteliari vu, Yeroboamu eju i dri engazu pari nderiasi, kini, Mi bi eri. Te dri erini, erini ejule agu nde vuri ’wi ra, ’dini eri econi dri ini esezu i vu dika ku.

⁵Pari edeta edezu nderi api i vini indi, of uta pari nde ma driari ada yi ra, ekile eceta ’ba Mungunini fele e’yo Yehovanisirile.

⁶Te opi omvi e’yo ’yo ’ba Munguniri ma tia, Mi ’ba matu Yehova Mungu miniri vu asi ndriza a’izu, mi zi ma dri indi, ’dini ma omvi ma dri dika beni. ’Ba Munguni ’ba di matu Yehova vu ra; dri opini ovu omvizaru dika, eca ekile erini ovule okorile.

⁷Opi ’yo ’ba Munguniri tia, Mi mvi ma be tualu ande lizu jo mania, te ma nga mi dri andesoma fe.

⁸Te ’ba Munguni omvi e’yo opi tia, Mi ka ma dri jo mini ma egalepi fe ma dri ti, ma ngani fi mi be tualu ku. Ma ngani vini nyaka nya kani yi mvu angu ’doria ku;

⁹a’disiku Yehova fe ma dri azita kini, Mi ma nya nyaka ku, mi ma mvu yi ku, azini mi ma emvi geri mini muzurisi ku.

¹⁰’Dini eri mu geri azinisi, eri emvini geri ini muzu Beteliarisi ku.

¹¹Te nabi mbazauru adri ovu Betelia. Mva alu anzipi erini ma eselia emu eri vu, olu e’yo dria ’ba Mungunirini ’yele etu nderisi Betelia ’diyi; yi ’yo ata yini tia e’yo erini ’yole opi tia ’diyi indi.

¹²Yi ati ’yo yi tia, Eri mu geri ngorisi ya? Isu de anzi erini ne te geri ’ba Munguni engapi Yudaarini muzuri ra.

¹³Eri ’yo anzi ini ’diyi tia, Emi ’ba enyiriko ’bani rizu akanya driari ma dri. Yi ’ba di enyiriko akanya dria eri dri ra, eri tu ri drinia.

¹⁴Eri bi ’ba Munguniri ma vuti, eri isu eri pati kumarani ma etia; eri ’yo eri tia, Mi ’ba Munguni engapi Yudaari’i ya? Eri omvi eri tia, E, ma eri’i.

¹⁵’Yo vini eri tia, Ama emvi mi be ma vile akua nyaka nyazu.

¹⁶Eri omvi eri tia, Ma econi mvizaru mi be ku, ma econi vini fizaru mi joa ku; ma ngani nyaka nya pari ’doria ku, ma ngani yi mvu ku indi;

¹⁷a’disiku Yehova ’yo ma tia, Mi ma nya nyaka ku, mi ma mvu yi ’daa ku, mi ma oja mi emvizu geri mini te muzurisi ku indi.

¹⁸Eri ’yo eri tia, Ma alu nabini indi, ekile mile, te malaika ’yo ma tia e’yo Yehovanisi kini, Emi emvi eri be mi vile joa, ’dini eri ma nya nyaka, eri ma mvu yi ani. Te eri li inzo eri tia.

¹⁹’Dini eri mvi eri be, eri nya nyaka, eri mvu yi jo erini ma alia.

²⁰Yini riria mesa tia, e’yo Yehovani eca nabi eri omvipi geriari vu;

²¹eru oyu okposi ’ba Munguni engapi Yudaari ma tia kini, Yehova ’yo ’dini, Mini Yehova ti galerisi, azini mini azita Yehova Mungu minini azile mi tiari ma ta mbale kurisi,

²²te mi emvi ’bo, mi nya nyaka, mvu yi pari erini ’yole mi tia kini, Mi nya nyaka ku, mi mvu yi ku -ria ’bo mi avu ngani ca mi a’bipi ma nyadria ku.

²³Eri eca ’dini, erini nyaka nyaria azini yi mvuria ’boria, eri ’ba enyiriko akanya dria eri dri, adani nabi erini omvileri dri.

²⁴Erini muria geria, eri fu dri kami be, kami ci eri ra, ’be avu erini geria, akanya so pa eri ageia, kami so pa avu ageia indi.

²⁵Te mi ne, ’ba azini aga ’dale, ndre di avuni laria geria, ne vini kamini pa soria avu nderi ageia. Yi mu e’yo nde olu aku nabi mbazaururini ovuzuria.

²⁶Nabi eri omvipi geriari ka e’yo nderi eri ra, eri ’yo, ’Di ’ba Munguni Yehova ma ti gapi siri’i; e’yo ’disi Yehova fe eri kami dri ani, kami ci eri, fu eri, ekile e’yo Yehovani erini ’yole eri tiarile.

²⁷Eri ’yo anzipi tia kini, Emi ’ba ma dri enyiriko, akanya driari. Te yi ’ba enyiriko akanya driari ra.

²⁸Eri mu, isu avuni laria geria, akanyani pa soria avu nderi ageia kami be. Te kami nyani avu ku, cini akanya ku indi.

²⁹Nabi ’du ’ba Munguni ma avu, ’ba eri akanya dria, eri omvi eri, ’dini eri mvi aku nabi mbazauru vileria, eri owuzu avuni sazu indi.

³⁰Eri sa avu nderi ’bile i ngulupiniria; yi owu erisi kini, Eyawaye, ma adri ye!

³¹Eri eca ’dini, ka eri sa ’bo, eri ’yo anzipi tia kini, Ma ka dra ra, emi sa ma nyadri amani ’ba Munguni sazuria; emi ’ba fala mani fala erini ageia.

³²A’disiku e’yo erini oyule okposi e’yo Yehovanisi pari edeta edezu Beteliari pi ma ruaa, jo dria ovupi pari uruleru aku Samariaa ’diyi beri nga eca ’dini ada.

³³’Di ma vutia Yeroboamu kuni geri onzi eriniri ku, te eri ope dika ’ba dria eselia kuhani pari uruleru ma agei tepiriru; ’ba ka le ra, eri ope eri ndu, ’dini kuhani ma ovu pari uruleru agei tezu.

³⁴E’yo nderi eca ezataru suru Yeroboamuniri dri, eri nzezu dri jazu nyaku driasi.