Read lugbara 1 Opi 16 Bible Online

1 Opi 16 - lugbara bible

1 Opi 16

¹E’yo Yehovani eca Yehu Hanani mvi vu Baasa ma e’yosi ’yozu,

²Mani mi e’dule uru irifura ma aliasi, mi ’bale opiru ’ba mani Israeli ma driliarisi, te mi aci geri Yeroboamuni ma alia, mi fe ’ba mani Israeli ’ye onzi, adra engazu ma asia e’yo onzi yinisi,

³mi ne, ma nga Baasani ini teke teke suru erini be ra, ma nga fe suru mini ma ovu ekile suru Yeroboamu Nebati mvinirile.

⁴’Ba Baasani odrapi akua ’diyi, oce yi nga nyani, ’ba erini odrapi nyamua amve ’diyi, aria ’bua ’diyi nga nyani.

⁵’Yeta azini dria Baasani, e’yo erini ’yele ’diyi pie dria, okpo erini pie, yi sini yi buku opi Israelini ’diyi ma e’yo sizuri ma alia ku ya?

⁶Te Baasa la i a’bipi be, sa eri Tirizaa; te mvi erini Ela nya opi eri ma pariani.

⁷Azini e’yo Yehovani eca vini nabi Yehu Hanani mvi vu Baasa ma e’yosi, azini suru erini ma e’yosi indi, e’yo iri ’diyisi: erini e’yo onzi ’yele Yehova ma milia adra erini engazu azi eri ma drini ’yelerisi, erini ovule suru Yeroboamunirilerisi, azini erini eri fule kairisi.

⁸Ela Baasa mvi e’do ini opi nyazu Israeli ma drilia Tirizaa eli kali iri drini azia Asa opi Yudanirini opi nyazurisi; eri nya opi eli iri.

⁹Te Zimiri ati’bo erini, asikari gari ombani erini ma esele awale iri ’diyi ma driliari, eri otu e’yo eri ruaa. Elani ovuria Tirizaa, erini atiria ewa mvuzasi Ariza ’ba aku Tirizaari ma driliari ma joa,

¹⁰Zimiri fi, co, fu eri kai, eli kali iri drini aziri Asa opi Yudanirini opi nyazurisi, eri nya opi eri ma pariani.

¹¹Eri eca ’dini, eri ka fi opiru ’bo, coti eri ofu suru Baasani dria; eri kuni agupimva ori’ba erini ma eselia, kani agyi erini ma eselia aluani ku.

¹²’Dini Zimiri ja suru Baasani ma dri dria, ekile Yehovani ’yole Baasa ma e’yosi nabi Yehu ma tisirile,

¹³e’yo onzi dria Baasa pini mvi erini Ela be ’diyi ma e’yosi yini ’yeleri, azini yini fele Israelini ’yele indirisi, adra Yehova Mungu Israelinirini engazu e’yo toko toko yinisi.

¹⁴’Yeta azini dria Elani, e’yo erini ’yele ’diyi pie dria, yi sini yi buku opi Israelini ’diyi ma e’yo sizuri ma alia ku ya?

¹⁵Zimiri nya ini opi Tirizaa o’du aziri a’dule, eli kali iri drini aziri Asa opi Yudanirini opi nyazurisi. Isu de ’ba ongulumuru oku yi ngonde Gibetoni aku ’ba Filisitiaa ’diyiniri ma ageia a’di ’dizu eri be.

¹⁶’Ba yi okupi ngonde a’di ’dizu ’diyi yi eri kini, Zimiri otu e’yo opi ma ruaa, fu eri indi; e’yo ’disi Israeli dria yi ’ba Omiri, ovupi asikari dria ma driliari, opiru o’du nderisi pari yini yi okuzu a’di tezuria.

¹⁷Te Omiri tu uru Gibetoniasi tualu Israeli be dria, yi ace Tirizani kuru kuru.

¹⁸Eri eca ’dini, Zimiri ka ne yi pa aku nderi ’bo, eri fi pari okporu opi vile jo ma alialeruria, eri ’ba jo ma ti i ngulupi ma dria acisi, dra ra,

¹⁹e’yo onzi erini ’yelerisi, onzi erini ’yele Yehova ma milia erini acizu geri Yeroboamuni ma aliarisi, azini e’yo onzi erini ’yele erini fele Israelini ’yele ’diyisi indi.

²⁰’Yetu azini dria Zimirini ’yele ’diyi, ’lokiri erini e’yo otuzuri pie, yi sini yi buku opi Israelini ’diyi ma e’yo sizuri ma alia ku ya?

²¹’Di ma vutia ’ba Israelini co yi ma esele iri; esele alu azini bi Tibini Ginati mvi ma vuti eri ’bazu opiru, esele aziniri bi Omiri ma vuti.

²²Te ’ba Omiri ma vuti bipi ’diyi yi aga ’ba Tibini Ginati mvi ma vuti bipi ’diyi ra; ’dini Tibini dra ra, te Omiri ovu opiruni.

²³Omiri e’do ini opi nyazu Israeli ma drilia eli kali na drini alu ewu Asa opi Yudanirini opi nyazurisi, eri nya opi eli mudri drini iri; te eri nya opi eli azia Tirizaa.

²⁴Te eri je Semeri dri oni Samariari onzi iri dahabururisi; eri si aku okporu oni nderi dria, eri ’da aku nde erini sileri ma ru Samaria, Semeri oni nderi ma e’i ma ru vusi.

²⁵Omiri ’ye e’yo ovupi onzi Yehova ma miliari, eri ’ye onzi aga ’ba dria ovupi eri ma drilia oko ’diyini ’yeleri ra.

²⁶Eri ad geri Yeroboamu Nebati mvini ma alia dria, azini e’yo onzi erini fele Israelini ’yele ’diyi ma alia indi, adra Yehova Mungu Israelinirini engazu e’yo toko toko yinisi.

²⁷Yeta azini dria Omirini ’yele ’diyi, okpo erini eceleri be, yi sini yi buku opi Israelini ’diyi ma e’yo sizuri ma alia ku ya?

²⁸Te Omiri la i a’bipi be, sa eri Samariaa; te mvi erini Ahabu nya opi eri ma pariani.

²⁹Ahabu Omiri mvi e’do ini opi nyazu Israeli ma drilia eli kali na drini aro Asa opi Yudanirini opi nyazutisi, te Ahabu Omiri mvi nya opi Samariaa Israeli ma drilia eli kali iri drini iri,

³⁰Te Ahabu Omiri mvi ’ye e’yo ovupi onzi Yehova ma miliari aga ’ba dria ovupi eri ma drilia oko ’diyini ’yeleri ra.

³¹Te ’ acizu e’yo onzi Yeroboamu Nebati mvini ma aliari ovu eri ma milia e’yo wereni, te drinia eri ’du vini Yezebeli Etibaali opi Sidoniari zini oku iniru, eri mu azi ngazu Baali dri, eri inzizu.

³²Eri si pari edeta edezuri Baali dri, jo Baalini erini sile Samariaari ma alia.

³³Ahabu ede Asera. Ahabu ’ye e’yo aka adra Yehova Mungu lsraelinirini engazu aga opi dria Israelini eri drilia oko ’diyini ’yeleri ra.

³⁴Ewu erinisi Hieli ’ba Beteliari si Yeriko; erini aku ndu ’baria, Abiramu mva erini osipi okori dra ra, erini kalitile edreria uru Segubu mva vile asizuri dra ra, ekile e’yo Yehovani erini ’yole Yosua Nuni mvi ma tisirile.