Read lugbara 1 Opi 17 Bible Online

1 Opi 17 - lugbara bible

1 Opi 17

¹Te Eliya ’ba Tisibini, ’ba ani’baru Gileadia ’diyi ma eselia, ’yo Ahabu tia kini, Ekile Yehova Mungu Israelini mani pa sozu drileniarini ovule indirile, andrali pi ozoo be ngani ovu eli ’doyisi ku, te kiri ma ka nga e’yo ’yo ma’i ka.

²E’yo Yehovani eca eri vu kini,

³Mi nga ’doasi, mi oja mi etuni efurialeru, mi zi mi yi raza Keriti Yoridani driliari ma tia.

⁴Eri nga eca ’dini, mi nga yi raza nderi mvu, azini ma fe azita koreke dri ’bo yi ma fe nyaka mi dri ’dale.

⁵’Dini eri mu ra, eri ’ye ekile yehovani ’yolerile; eri mu ovu yi raza Keriti Yoridani driliari ma tia.

⁶Te koreke cii eri dri enya zasi o’bitisi, azini enya zasi ondresi; eri mvu yi raza nderi.

⁷Eri eca ’dini vile were, yi raza nderi nga nzu ra, ozooni ’dile angu nderi ma alia kurisi.

⁸E’yo Yehovani eca eri vu kini,

⁹Mi nga, mi mu Zarepati aku Sidoniaria, mi ovu ’dale. Mi ne, ma azi oku awuzioru ’daleri mi aza kozu nyakasi.

¹⁰’Dini eri nga, eri mu Zarepatia; erini ecaria aku nderi ma kalitilia, mi ne, awuzi ovu ’dale eja owuria; eri omve eri kini, Ma matu ’ba mi vu, mi eji ma dri yi were kerena alia mvuzaru.

¹¹Te erini muria yi ejiria, eri omve eri kini, Ma matu ’ba mi vu, mi eji ma dri enya were mi dria indi fo.

¹²Eri omvi e’yo kini, Ekile Yehova Mungu minirini ovule indirile, ma ovuni enya olemi be gaa aluni ku, kiri anyafura were driega alua afazu aliari pi odu were otekua aliari be; mi ne, ma eja iri ’diyi omvu, ’dini ma mvi ani nyaka nderi a’di ma dri mva be, ama di nya ra, ama dra ndo,

¹³Eliya ’yo eri tia, Mi ru ku; mi mu ’ye mini ’yolerile; te di mi ede ma dri enya olemi were oko fo, mi eji ma dri, vutinia mi ’ye emi dri mi mvi be.

¹⁴A’disiku Yehova Mungu Israelini ’yo ’dini, Anyafura ngani i de afazu aliasi ku, odu ngani i de otekua aliasi ku indi, ecazu kpere o’du Yehovani ozoo fezu nyakuarisi.

¹⁵Eri mu ’ye ekile Eliyani ’yolerile; te eri’i, Eliya pie, ’ba eri vile joa ’diyi be, yi nya o’du kakau.

¹⁶Anyafura deni i afazu aliasi ku, azini odu deni i otekua aliasi ku indi, ekile e’yo Yehovani ’yole Eliya ma tisirile.

¹⁷E’yo ’diyi ma vutia eri eca ’dini, azo bi mva oku jo e’i nderi vileri; azo ’ye eri okporu oga i si, ’dini ava erini fu ra.

¹⁸Eri ’yo Eliya tia kini, E’yo amani mi be ngoni ya, mi ’ba Munguni la? Mi eca ma vu e’yo onzi mani ma e’yo egazu dika, azini mva mani fuzu’i ya?

¹⁹Eliya omvi eri tia, Mi fe ma dri mva mini. Eri e’du mva oku nderi ma agatiarisi, eri tu eri be jo uruleru erini lazuria, eri ela eri gbolo i ngulupiniri ma dria.

²⁰Eri wu Yehova vu kini, Yehova Mungu mani la, mi ji candi oku awuzio mani lazu eri vile joari ma dria, mvi erini fuzu ya?

²¹’Di ma vutia eri a’bu i mva dria paleko na, eri wu Yehova vu, kini, Yehova Mungu mani la, ma matu ’ba mi vu, mi fe orindi mvani ma emvi eri alia dika.

²²Te Yehova eri o’duko Eliyaniri ra; orindi mvani emvi eri alia dika, eri eca idriru dika ani.

²³Te Eliya e’du mva nderi, esi eri be jo uruleruriasi va jo adari alia, fe eri andri dri; te Eliya ’yo kini, Mi ne, mi mvari idriru ’di.

²⁴Oku nderi ’yo Eliya tia kini, Curu’do ma ni ada mi ovu ’ba Munguni, azini e’yo Yehovani ovuni mi tiliari eri e’vo adani.