Read lugbara 1 Opi 18 Bible Online

1 Opi 18 - lugbara bible

1 Opi 18

¹Eri eca ’dini, o’du kakau ma vutia, e’yo Yehovani eca Eliya vu eli narisi kini, Mi mu, mi ece mi ngulupi Ahabu ma milia; te ma nga ozoo ma ti pe nyakua ra.

²Te Eliya mu i ngulupi e’dazu Ahabu ma milia. De liki okporu ’de Samariaa.

³Te Ahabu omve Obadia ’ba aku erinia ’diyi ma driliari. (Te Obadia ru Yehovani tu;

⁴Yezebeli ka nabi Yehovani ’diyi ofu, Obadia o’du nabi turu alu, ozi yi kali towi kali towi onigulia, eri fe yi dri nyaka pi yi mvuza be.)

⁵Te Ahabu ’yo Obadia tia, kini, Mi aci angu andrizu dria, cazu yi a’di tia dria azini yi raza tia dria; kani ama nga iribi isu akanya pi dri yi opazu akanya farasiru be ani ’dini, anyapa amani kazu odrazu dria ku.

⁶’Dini yi awa angu esele iri yi dri acizu eri alia dria; Ahabu mu kala aluria eri’i a’dule, azini Obadia mu kala aziniria eri’i a’dule.

⁷Te Obadiani muria geria, mi ne, Eliya fu dri eri be; te Obadia ni eri ra, eri ’de va, su i mile nyakua, kini, ’Diri mi’i ya, opi mani Eliya?

⁸Eri omvi e’yo eri tia, ’Do ma’i. Mi mu, mi ’yo opi mini tia kini, Mi ne, Eliyani ’doa.

⁹Te eri ’yo ra, Ma eza a’di e’yoni ya, mini lezu ati’bo mini fezu Ahabu dri ma fuzu ya?

¹⁰Ekile Yehova Mungu minini ovule indirile, suru kani opi nyaza opi manini ’ba ti pezu mi ndazu alenia kuni yo; yi ka ’yo, Eri ’doa yo, eri fe opi nyaza nderi kani suru nderi ma so oyo ’yozu kini, yi isuni mi ku ada.

¹¹Te curu’do mi ’yo, kini, Mi mu, mi ’yo opi mini tia, Mi ne, Eliyani ’doa.

¹²Te eri nga eca ’dini, mani mi kuzu ’boria, coti Orindi Yehovani nga mi ’du pari mani nile kuria; ’dini ma ka ca e’yo olu Ahabu tia, eri ka nga eco mi isu ku, eri nga ma fu, te ma’i ati’bo mini, ma ru Yehovani gbu mvaasi.

¹³’Ba eceni opi mani dri e’yo mani ’yele ewu Yezebelini nabi Yehovani ofuzurisiri ku ya? E’yo mani ’ba nabiru Yehovani turu alu awazu kali towi kali towi yi ozizu onigulea, nyaka fezu yi dri yi mvuza beri ku ya?

¹⁴Te curu’do mi ’yo kini, Mi mu, mi olu opi mini tia, Mi ne, Eliyani ’doa; te eri nga ma fu ra.

¹⁵Te Eliya kini, Ekile Yehova asikari ongulumuruni mani pa sozu eri driliarini ovuzu indirile, ma nga ma ngulupi e’da eri milia andru.

¹⁶’Dini Obadia mu i isuzu Ahabu be, eri olu e’yo ndereri tia; azini Ahabu mu i isuzu Eliya be.

¹⁷Eri eca ’dini, Ahabu ka Eliyani ne ’bo, Ahabu ’yo eri tia kini, ’Di mi’i, ’ba Israeli dri candi fepiri’i ya?

¹⁸Eri omvi eri tia kini, Ma feni Israeli dri candi ma’i ku; te mi’i, suru mi atiniri pie, emi fe emi’i, a’disiku emini azita Yehovani kule, emini Baali ma vuti bilerisi.

¹⁹Te curu’do mi pe ’ba ti, mi oku Israeli pi dria ma vu oni Karimeli dria, nabi Baalini turu su drini kali towi ’iliyi pie, nabi Aserani turu su ripi mesa Yezebelini ma tia nyaka nyapi ’diyi pie dria.

²⁰’Dini Ahabu pe ’ba ti anzi Israelini vu dria, eri oku nabiyi dria tualu oni Karimeli dria.

²¹Eliya esi i ogogo ’ba dria vu, ’yo ra, Emi nga aci goligoliru asisile irileirile be izu ngopi ya? Yehova ka ovu Mungu, emi bi eri ma vuti; ka Baali’i, emi bi eri ma vuti’i. Te ’ba ongulumuru omvini e’yo eri tia aluni ku.

²²’Di ma vutia, Eliya ’yo ’ba ongulumuru tia, kini, Ma’i, adaru ma ace nabi Yehovaniru a’dukule ma’i; te nabi Baalini yi turu su drini kali towi.

²³Yi ma fe amani tiago iri; eco yi ma pe yi ma ngulupi dri tiago alu, ma oli eri, ma odro eri eja dria, te ma edu aci etinia ku; te ma nga tiago aziniri ede, nga eri odro eja dria, ngani aci edu etinia ku.

²⁴Te emi ma omve adrou emini ma ru, azini ma riga Yehova ma ru omve; te Mungu e’yo omvipi, aci fepi rari, eri Mungu’i. ’Ba ongulumuru dria omvi e’yo kini, Mi ’yo ’yeke.

²⁵Te Eliya ’yo nabi Baalini ’diyi, tia, Emi pe tiago alu emi dri, emi ede eri oko emini ovule trerisi; emi omve adrou emini ma ru, te emi edu aci etinia ku.

²⁶Yi ’du tiago yini fele yi driri, yi ede eri, yi omve ru Baalini engazu o’bitisi cazu etu agaa, ’yozu, Baali la, mi eri ama fo! Te o’duko yo, ’ba e’yo omvipini yo. Te yi ombu pari edeta edezuri yini edeleri ma ageia.

²⁷Eri nga eca ’dini etu agaduarisi Eliya ogu yi kini, Emi oyu okposi, a’disiku eri adrouni, kani eri ovu e’yo egaria, kani eri mu kala azinia, kani eri mu ada, kani eri o’du ko yani, emi ma oru eri.

²⁸Te yi oga lulu, yi oli yi rua eli pisi aju be yini adrile ’yelerile, cazu arini egbiria okporu yi ruaaria.

²⁹Eri eca ’dini, etu agaduari ka aga ’bo, yi otre ’dani cazu etu edeta ondreniri fezuria, te o’duko aluni yo; ’ba e’yo omvipini aluni yo, ’ba e’yo nde egapini yo indi.

³⁰Te Eliya ’yo ’ba ongulumuru ma tia dria, Emi esi ogogo ma vu; te ’ba dria esi ogogo eri vu ra. Eri ede pari edeta edezu Yehovani, yini asule vari dika.

³¹Te Eliya o’du oni mudri drini iri, Yakobo ndra e’yo Yehovani ecazu eri vu kini, Ru mini nga ovu Israeli’i-ri ma anzi ma suruti ma kalafe vusi.

³²Oni nde ’diyisi eri odro pari edeta edezuri ru Yehovanisi. Azini eri si ’bile pari edeta edezuri ma kalaasi kuru, ecopi afazu oriefi o’bizuri tre tre iri.

³³Eri oti eja, eri opi tiago nderi, odro eri eja dria. Eri ’yo, Emi oko yi obia tre tre su ma alia, emi osu yi nde edeta vezari ma dria, eja dria indi.

³⁴Te eri ’yo, Emi ’ye pale na; te yi ’ye paleko na.

³⁵Yi nderi eri ra pari edeta edezuri ma ageia dria, ga ’bile nderi ma alia tre indi.

³⁶Eri eca ’dini, etu edeta ondreniri fezurisi, nabi Eliya esi ogogo, eri ’yo ra, Yehova Mungu Iburahimuni, azini Isakani, azini Israeliniri la, mi fe ’ba ma ni andru mi ovu Mungu Israeli eseliari’i, azini ma ovu ati’bo mini, azini ma ’ye te e’yo ’diyi dria e’yo minirisi.

³⁷Mi eri ma, Yehova la, mi eri ma, ’dini ’ba ’doyi ma ni ’dini kini, mi Yehova mi ovu Mu ngu’i, azini mi omvi asi yini dika ’bo.

³⁸’Di ma vutia, aci Yehovani e’de, ve edeta vezari pi eja pie oni pie, irifura pie rukuruku, ombe yi ’bile tekari ma alia dria ra.

³⁹’Ba dria ka e’yo nderi ne ’bo, yi o’de va o’bukuru; yi ’yo, Yehova eri Mu-ngu’i; Yehova eri Mungu’i.

⁴⁰Eliya nga ’yo yi tia, Emi obi nabi Baalini ’diyi; emi ku aluni ma apa ku. Te yi obi yi ra; Eliya ji yi va yi raza Kisoni ma tia, eri ofu yi ’dale.

⁴¹Te Eliya ’yo Ahabu tia, Mi nga, mi nya, mi mvu; ozoo amboru ’ba no ’bo.

⁴²’Dini Ahabu mu uru nyazu, azini mvuzu. Te Eliya tu uru oni Karimeli ma dria; eri avu va nyakua, su i andreti va kumuti eselia.

⁴³Eri ’yo ati’bo ini ma tia, Mi tu uru,milu mirivuleru. Eri tu uru, lu ra, kini, Afa aluni ’daa yo. Te Eliya ’e’yo, Mi mu dika pale aziri.

⁴⁴Eri eca ’ dini, erini muria pale aziririsi eri ’yo, Mi ne, iriti efu miri ma dria ganaru ekile ’ba ma drile. Eri ’yo ra, Mi tu uru, mi ’yo Ahabu tia kini, Mi lede gari mini, mi si oni driasi va, ozoo kazu geri mini ogazu ku.

⁴⁵Ace were eri eca ’dini, ’bu ma mile eca iniru iriti pisi oli be, ozoo amboru ’eli ra. Te Ahabu mu garisi, nzu Yezireelia.

⁴⁶Te dri Yehovani ovu Eliya dria; eri anzu i opile, nzu Ahabu drilia cazu pari erini fizu Yezireeliaria.