Read lugbara 1 Opi 19 Bible Online

1 Opi 19 - lugbara bible

1 Opi 19

¹Te Ahabu ece Yezibeli dri e’yo dria Eliyani ’yele ’bori, ece indi e’yo erini nabi dria ofuzu seisiri.

²’Di ma vutia, Yezebeli pe ojio ma ti Eliya vu ’yozu, Adrou ma ’ye ma vu ’dini, ma ’ye azini di, ma ka mi idri fe ovuzu ekile yi ma alu ma idrile de dru etu ’doni ku.

³Eliya ka e’yo nderi ndre, eri nga, eri apa ra, ’dini eri kazu drazu ku beni, eri ca Beeri-seba aku Yudaaria, eri ku ati’bo erini ’dale.

⁴Te eri ngulupi mu acizu etuzu o’du alu roko dria, mu ri pati wereari ma etia; eri a’i dra i dri kini, Fu dri ma dri ’dipi ’bo; Yehova la, mi ’du curu’do idri mani ra; a’disiku ma agani ma a’bipi onyisi ku.

⁵Eri la va o’du kozu pati ekile urukoleri ma etia; te mi ne, malaika elo eri, ’yo eri tia kini, Mi nga, mi nya.

⁶Eri lu, te mi ne, enya ovuzaru aciolusiri ovu eri ma drilia ogogo, imvu yi be alenia indio Eri nya, eri mvu, la va dika.

⁷Te malaika Yehovani eca dika pale iri, elo eri, ’yo ra, Mi nga, mi nya, aci kazu mi okpo ndezu ku.

⁸Te eri enga, eri nya, eri mvu, eri mu okpe erini isule nyaka nderisirisi etu kali su, ini kali su, cazu Horebu oni Munguniria.

⁹Te eri ca ’dale onigulea, la ’dale, te mi ne, e’yo Yehovani eca eri vu, ’yo eri tia, Mi ’doa a’di ’ye ya Eliya?

¹⁰Eri omvi kini, Ma ovi ndra a’ya be tu Yehova Mungu asikari ongulumuruniri ma e’yo ecazu curu’do; a’disiku anzi Israelini yi ku aziza mini ’bo, yi ogu pari edeta edezu mini ’diyi va ’bo, yi ofi nabi mini ’diyi seisi ’bo; te ma’i adaru ma ace ma’i a’dukule, te yi ndru ma fuzu.

¹¹Te eri ’yo, M fu amve, mi so pa oni dria Yehova drilia. Te mi ne, Yehova aga, akuluku amboru okpo be, osi on amboru, onyo oni kataru ’diyi nyingiriki Yehova drilia, te Yehova ovuni oli nderi ma alia ku; oli ma vutia ovakiani, te Yehova ovuni oya kia ma alia ku;

¹²oyakia ma vutia acini, te Yehova ovuni aci nderi ma alia ku; aci ma vutia, o’duko were e’yereni.

¹³Te eri eca ’dini, Eliya ka eri ra, eri ombe mile ini bongo ’beza inisi, eri fu pa so amve onigule nderi ma tilia. Te mi ne, o’duko eca eri vu kini, Mi ’doa a’di ’ye ya, Eliya?

¹⁴Eri ’yo kini, Ma ovu ndra a’ya be tu Yehova Mungu asikari ongulumuruniri ma e’yosi ecazu curu’do; a disiku anzi Israelini yi ku aziza mini ’bo, yi ogu pari edeta edezu mini ’diyi va ’bo, yi ofu nabi mini seisi ’bo; te ma’i, adaru ma ace ma’i a’dukule; te yi ndru ma fuzu.

¹⁵Te Yehova ’yo eri tia, Mi mu, mi mvi geri mini roko Damasikiarisi; te mi ka ca ’dale ra mi ma osu odu Hazaeli ma dria eri ’bazu opiru Suriaa;

¹⁶te mi ma osu odu Yehu Nimisi mvi ma dria, eri ’bazu opi Israeliniriru; te mi ma osu odu Elisa Safati mvi, engapi Abeli-meholaari ma dria ovuzu nabiru mi ma paria.

¹⁷Te eri nga eca ’dini, ’ba apapi Hazaeli ma seisiri Yehuni nga funi, te ’ba apapi Yehu ma seisiri Elisani nga funi.

¹⁸Te ma nga ’ba alifu aziri Israeli eselia ’diyi ku ma ngulupiniru, kumuti dria yi osipi va Baali drilia ku ’diyi, ti dria eri zipi o’bolo ndruzasi ku ’diyi.

¹⁹’Dini eri nga ’daasi, eri isu Elisa Safati mvini, erini nga ’yaria ti o’ile iri iri kali iri drini su ’diyi be i drilia, te eri ovu ti iri vile ’diyi be. Te Eliya eca eri vu ra, ’be bongo ’beza o iniri eri dria.

²⁰Eri ku ti yi, eri nzu Eliya ma vutisi, eri ’yo kini, Ma matu ’ba mi vu mi fe ma ma mu ma ati pi zi ma andri be o’bolo ndruzasi, vutinia ma nga mi vuti bi. Eri ’yo eri tia, Mi mvi dika; te ma ’ye te mi vu a’dini ya?

²¹Eri ku eri vuti bikokoru, mvi, ’du ti iri o’ile kulumbusi ’diyi, oli yi ra, a’di za yini afa tini sele diyisi, eri fe ’ba dri, yi nya ra. Vutinia eri enga, eri mu Eliya ma vutisi, eri ko eri ma aza.