Read lugbara 1 Opi 22 Bible Online

1 Opi 22 - lugbara bible

1 Opi 22

¹Eli na omba Suria pi ma eselia Israeli be yo.

²Te eri eca ’dini eli narisi, Yehosafati opi Yudaari esi va opi Israeliniri vu.

³Te opi Israeliniri ’yo ati’ba erini ’diyi tia, Emi nini ku, Ramoti-gileadi ovu aku amani, te ama ovu e’yere, ama ’duni eri opi Suriaari ma driasi ku ya?

⁴Eri ’yo Yehosafati tia, Mi le mu ma be omba ’bazu Ramoti-gileadi be ra ya? Te Yehosafati ’yo opi Israeliniri ma tia, Ma ovu ekile mile, ’ba mani ovu ekile ’ba minile, akanya mani ovu akanya minile.

⁵Te Yehosafati ’yo opi Israeliniri ma tia, Ma zi mi tia, mi ndru andru e’yo Yehovani raka.

⁶’Di ma vutia opi Israelini oku nabiyi tualu, yi ovu ekile ’ba turu sule, eri ’yo yi tia, Onyiru ma ma mu a’di ’dizu Ramotigileadi be, kani ma ma mu ku ya? Te yi ’yo, Mi mu; a’disiku Yehovani nga eri fe opi ma dria.

⁷Te Yehosafati ’yo ra, kini, Nabi azini Yehovaniri indi yo ya, ’dini ama ma zi e’yo tinia ya?

⁸Opi Israelini ’yo Yehosafati ma tia, Ace ’ba alu amani ecole e’yo zile Yehova tia geri eri vurisiri ra, eri Mikaya mila mvi’i; te ma ngu eri onzi, a’disiku eri adrini e’yo mani olu onyiru aluni ku, te onzi ’dani. Yehosafati ’yo, Opi ma ’yo ’dini ku fo.

⁹Opi Israelini nga di asikari ambo omve, nga ’yo tinia kini, Mi eji Mikaya mila mvini mbele.

¹⁰Te opi Israelini pi Yehosafati opi Yudaniri be, bongo suza opiniri be yi ruaa, yi ri alu alu oguna opini dria irii pari ’bani fizu kalitile Samarianiria; te nabi dria ovu e’yo te ngapi ecapiri oluzu yi drilia.

¹¹Te Zedekia Kenaana mvi ede ini o’yu ayaru, eri ’yo ra, Yehova ’yo ’dini kini, O’yu ’diyisi mi nga ’ba Suriaa ’diyi omi vile cazu yini dri jaria.

¹²Te nabi dria yi ondri e’yo ’dinile, yi ’yo, Mi tu Ramoti-gileadia, mi nga ovu drilebaru; te Yehovani nga eri fe opi ma dria.

¹³Ojio mupi Mikayani omvepiri ’yo ’dini eri tia kini, Mi ne, curu’do nabi yi e’yo ’yo opi ma tia dria onyiru, ti alusi; ma zi mi tia, onyiru e’yo mini ma ovu ekile ’ba ’dayi ma azini ’yolerile, mi ’yo e’yo onyiru.

¹⁴Te Mikaya ’yo, Ekile Yehovani ovule idrirurile, e’yo Yehovani ’yole ma tiari ma nga e’yo nderi ’yo’i.

¹⁵Te eri ka eca opi vu ’bo, opi ’yo eri tia, Mikaya la, onyiru ama ma mu Ramoti-gileadia a’di ’dizu, kani ama ma mu ku ya? Te eri omvi tinia, Mi tu, mi nga ovu drilebaru, te Yehovani nga eri fe opi ma dria.

¹⁶Te opi ’yo eri tia, Ma e’yo azi mi tia okposi pale si ya, e’yo azini ’yozu ma tia ku pe kiri mi ma ’yo e’yo adaruri ru Yehovanisi’i?

¹⁷Te eri ’yo, Ma ne Israeli dria erezaru oni dria, dille kabilo ’ba yi ocepi kokoru ’diyile; te Yehova ’yo, ’Ba ’diyi ovu opi kokoru, onyiru yi dria alu alu ma mi asi anzu be jo yinia.

¹⁸Opi Israelini ’yo Yehosafati tia, Ma ’yoni te mi tia ku, eri ngani e’yo mani olu onyiru ku, kiri onzi’i ku ya?

¹⁹Te Mikaya ’yo, E’yo ’disi mi ma eri e’yo Yehovani: ma ne Yehovani riria oguna opini eriniri ma dria, ongulumu ’bua ’diyini pa soria eri ageia eri dri ndia azini eri dri ejia;

²⁰te Yehova ’yo, A’dini nga Ahabuni obeni, erini tuzu Ramoti-gileadia ani ya? Te aluri ’yo ’doni, aziniri ’yo ’dini.

²¹Te orindi alu efu pa sozu Yehova drilia, ’yozu, Ma nga eri obe ma’i.

²²Yehova ’yo eri tia, E’yo ngosi ya? Eri ’yo kini, Ma nga fu ovu orindi inzoru nabi erini ’diyi ma tilia dria. Te Yehova ’yo, Mi nga eri obe,mi nga eri aga indi; mi fu, mi ’ye ’dini.

²³’Dini curu’do mi ne, Yehova ’ba orindi inzoru nabi mini ’diyi ma tilia dria; Yehova ’yo e’yo mini onzi ’bo.

²⁴Vutinia Zedekia Kenaana mvi si ogogo, sa Mikayani o’boloa, eri ’yo kini, Orindi Yehovani nga ma vusi geri ngorisi ’yozu mi tia ya?

²⁵Te Mikaya omvi e’yo kini, Mi ne, mi nga e’yo nderi ne o’du mini ngazu fizu jo alialeruria mi zizurisi.

²⁶Te opi Israelini ’yo, Emi bi Mikayani, emi omvi eri vile Amoni ambo aku amboru ma dri cepiri pi vu opi mvi Yoasi be;

²⁷emi ’yo, Opi ’yo ’dini, Emi ’ba agu ’dori jo arunia, emi fe eri dri enya candiniri yi mvuza candiniri be kiri’i, cazu kpere etu mani emuzu asi anzu beria.

²⁸Te Mikaya ’yo, Mi ka nga emvi asi anzu be, de di ’do Yehova ’yoni e’yo ma tisini ku. Eri ’yo indi, Emi eri, emi suruti dria!

²⁹’Dini opi Israelini pi Yehosafati opi Yudaniri be, yi tu di Ramoti’gileadia ra.

³⁰Opi Israelini ’yo Yehosafati tia kini, Ma nga bongo toko su ’ba kazu ma nizu ku, ma nga mu fi ombaa, te mi su bongo mi vile opiniri’i. Opi Israelini su di bongo toko ’ba kazu i nizu ku, fi ombaa ra.

³¹Te opi Suriaari fe azita ambo kali na drini iri ovupi asikari gari vile ’diyi ma drilia ’diyi dri kini, Emi ’di a’di ’ba toko ’diyi be ku, ’ba ambo ’diyi be ku, kiri opi Israelini be a’dule.

³²Eri eca ’dini, ambo asikari gari vile ’diyi ma drilia ’diyi ka Yehosafatini ne ’bo, yi ’yo, Adaru ’di opi Israeliniri’i. ’Dini yi oja yi ogogo a’di ’dizu eri be; te Yehosafati ga lulu.

³³Eri nga eca ’dini, ambo asikari gari vile ’diyi ma drilia ’diyi i ka ne eri opi Israelini yo, yi oja yi vile, ku eri drozu ja.

³⁴Te agu alu, nzo osu ini, eri gbi opi Israelini aniakosi pari gombere ayaru ombaniri ma tini ecizuria; e’yo ’disi eri ’yo i asikari gari erini ma ti dropiri ma tia, Mi oja mi kalaa, mi ofu ma a’diasi amve, a’disiku gbi ma mgbi ra.

³⁵A’di nderi eca o’du nderisi okporu tu, te yi ati opini gari erini alia, mile erini ovu ’ba Suriaa ’diyi vuleru, cazu erini drazu ondresiria; ari bile nderiniri ra va gari etia.

³⁶Ogogo eruni ’deriaria, asikari ongulumuru e’do di cere ’be yi ma eselia dria kini, ’Ba dria alu alu ma ere yi yi ma ngtulupi ma akua-ooo, ’ba dria alu alu ma mvi angu yi ma ngulupinia-ooo!

³⁷’Dini opi dra di ra, yi ji eri Samariaa; yi sa eri Samariaa.

³⁸Yi oji gari nderi yi alio Samariaaria, te oce mbe ari erini (isu oku ali o’bapi ’diyi adri yi rua oji ’daa); ekile e’yo Yehovani ’yole ’borile.

³⁹’Yeta azini dria Ahabuni, e’yo erini ’yele ’diyi pie dria, erini sile ewasisiri pie, aku erini sile ’diyi pie, yi sini yi buku opi Israelini ’diyi ma e’yo sizuri ma alia ku ya?

⁴⁰’Dini Ahabu la i a’bipi be; te mvi erini Ahazia nya opi eri ma pariani.

⁴¹Yehosafati Asa mvi e’do ini opi nyazu Yuda ma drilia eli su Ahabu opi Israelini opi nyazurusi.

⁴²Eli Yehosafatini ovu ndra kali na drini towi erini e’dozu opi nyazurisi, te eri ovu opiru eli kali iri drini towi Yerusalemua. Andri erini ma ru Azuba, Silihi zi’i.

⁴³Eri aci geri i ati Asani ma alia dria; eri ojani i kalaa ku, eri ’ye e’yo ovupi onyiru Yehova ma miliari ra; te pari uru1eru ’diyi yi nzeni yi ku, ’ba yi ede edeta azini yi ve obiese pari uruleru ’diyia ’dani.

⁴⁴Yehosafati ede e’yo i eselia opi Israeliniri be ali asuzu.

⁴⁵’Yeta azini dria Yehosafatini ’yele ’diyi, okpo erini eceleri pie, e’yo erini a’di ’dizuri pie, yi sini yi buku opi Yudaa ’diyini e’yo sizuri ma alia ku ya?

⁴⁶Agupi ali o’bapi agupi azini be ’diyi, acepi i ati Asa ma ewusi ’diyi, eri onze yi angu nderiasi.

⁴⁷Opi ovuni ndra Edomua ku; opi wereri te ndra angu ageini.

⁴⁸Yehosafati ede ndra oguru Tarisisini ’diyi muzu Ofiria mele ejizu; te yi muni ku a’disiku oguru nde ’diyi nyo yi Ezioni-geberia.

⁴⁹Ewu nderisi Ahazia Ahabu mvi ’yo Yehosafari ma ria, Mi fe ati’ba mani ma mu tualu ati’ba mini be oguru nde ’diyi ma alia, te Yehosafati a’ini e’yo nderi ku.

⁵⁰Te Yehosafati la i a’bipi be, yi sa eri tualu a’bipi be aku i ma ati Daudiniri ma alia; te mvi ini Yehoramu nya opi eri ma pariani.

⁵¹Ahazia Ahabu mvi e’do opi nyazu Israeli ma drilia eli mudri drini aziri Yehosafati opi Yudani opi nyazurisi, te eri ovu opiru eli iri Israeli ma drilia.

⁵²Eri ’ye ndra e’yo ovupi onzi Yehova ma miliari, eri aci geri i atini ma alia, azini geri i andrini ma alia, azini geri Yeroboamu Nebati mvi fepi Israelini e’yo onzi ’yezurini ma alia.

⁵³Eri nga azi Baali dri, eri inzi eri, eri fe aoko enga Yehova Mungu Israeliniri ma asia, geri i atini ’yele ’ini ’diyisi dria.