Read lugbara 1 Opi 5 Bible Online

1 Opi 5 - lugbara bible

1 Opi 5

¹Te Hiramu opi Turoari, eri ka eri kini yi osu odu Sulemani ma dria ovuzu opiru ati ma paria ’bo, eri pe ati’ba ini ma ti eri vu; a’disiku Hiramu le ndra Daudini o’du dria ’dani.

²Te Sulemani pe ’ba ti Hiramu vu ’yozu,

³Mi ni ra, ma ati Daudi econi ndra jo sizaru Yehova Mungu eriniri ma rusi ku ombani ovule eri ma ageia kuru kururisi, ecazu o’du Yehovani juru ’bazu va eri ma palaaria,

⁴Te curu’do Yehova Mungu mani fe ava liza ma dri angu ma kalaasi dria ra; ari’ba yo, e’yo ecapi drileonziruri vini yo.

⁵Te mi ndre, ma ’ba asi mani jo sizu Yehova Mungu maniri ma rusi, ekile Yehovani ndra ’yole Daudi ma ati tiarile, kini, Mvi mini mani ngale ’bale oguna mini dria mi ma pariari, eri nga jo si ma rusini.

⁶Ka’dini mi azi yi ma ga pati marioni ovupi Lebanonia ’diyi ma dri; ati’ba mani nga ovu ati’ba mini be tualu; te ma nga mi dri oya ofe ati’ba mini vusi ekile e’yo dria mini ngale ’yolerile; a’disiku mi ni ’ba ama eselia aluni nipi pati gapi ekile ’ba Sidonia ’diyini nilerileni yo.

⁷Eri eca ’dini, Hiramu ka e’yo Sulemanini eri ra, eri ovu ayikosi tu, eri ’yo, Yehova ma ovu inzizaru andru, eri’i mva onduaru fepi Daudi dri ovuzu suru ambo ’dori ma driliari.

⁸Te Hiramu pe ’ba ti Sulemani vu ’yozu, Ma eri e’yo mini tini pele ma vuri ’bo; ma nga e’yo dria mini leleri ’ye pati marionisi azini pati masarusi.

⁹Ati’ba mani ’diyi nga yi eji engazu Lebanoniasi cazu miria; te ma nga yi eci tualu acizu miri dria cazu pari mini ngale ecele ma driria, ma nga fe ’ba ma ayu yi, mi nga yi isu o’du ’daa; te mi nga e’yo mani leleri ’ye nyaka fezu ’ba ma vile joa ’diyi dri.

¹⁰’Dini Hiramu fe ndra Sulemani dri pati marioni azini masani dria ekile erini lelerile.

¹¹Te Sulemani fe Hiramu dri nganu kekele alifu kali iri nyakaru ’ba eri vile joa ’diyi dri, azini lodu obi alia kali iri. Sulemani fe Hiramu dri ’dini eli vusi eli vusi.

¹²Te Yehova fe Sulemani dri ondua ekile erini azile eri tiarile; asi anzuru ovu Hiramu pi ma eselia Sulemani be; te ’ba ’diyi iri tro eci ti yi ma eselia e’yo azizasi.

¹³Te opi Sulemani oku ’ba azi ngapi ’diyi engazu Israeli dria ma alia; ’ba erini okule ’diyi yi ovu alifu kali na.

¹⁴Eri pe yi ma ti Lebanonia, ’ba alifu mudri elezu mba alu alu vusi; mba alu yi ovu Lebanonia, mba iri yi ovu akua; Adoniramu ovu ’ba okule azia ’diyi ma drilia.

¹⁵’Ba Sulemanini teri ojipi ’diyi yi ovu alifu kali aziri, ’ba oni nzepi oni ruaa ’diyi yi ovu alifu kali aro;

¹⁶drinia ’ba ’wara Sulemanini azi drilia ’diyi ovu alifu na drini turu na, yi ovu ’ba azi ngapi ’diyi ma drilia.

¹⁷Ekile opini azilerile yi onze oni amboru aje ambosi ’diyi, ’dini jo ndu ’bazu ani oni Yini ruani edele ’diyisi.

¹⁸’Dini ’ba Sulemanini jo sipi ’diyi azini ’ba Hiramuni jo sipi ’diyi, azini ’ba Gebalia ’diyi, yi opa oni nde ’diyi ma rua, yi ede pati osiza ngonde oni be jo nderi sizu.