Read lugbara 1 Opi 7 Bible Online

1 Opi 7 - lugbara bible

1 Opi 7

¹Te Sulemani si jo eri ngulupini eli mudri drini na, eri de jo erini dria.

²Eri si jo nderi pati oce Lebanoniarinisi; oconi ovu wuale turu alu,’walani wuale kali towi, oco edrezarini wuale kali na, eri ovu sizaru pati marioni i’dile dri sozaru bereto susi ’diyi ma dria, pati osiza marioni be pati nde i’dile ’diyi ma dria.

³Eri ovu a’buzaru uru pati osiza marionisi, pati osiza marioni kali su drini towi olale pati i’dile i’di ’diyi ma dria, oti osiza ’diyi mudri drini towi, mudri drini towi dri soza alu alu vusi,

⁴Derisa ma pati ovu mileko na, derisa kala azinia ’diyi pi ovu otizaru derisa kala azinia ’diyi be pamileko na.

⁵Jotile piyi dria ovu kililiru oji kokoru pati derisani be dria, azini derisa kala azinia ’diyi pi ovu otizaru derisa kala azinia ’diyi be pamileko na.

⁶Eri ede jobileko eti pati i’dile i’di ’diyisi; oconi wuale kali towi, walani wuale kali na; jobileko eti ovu eri drilia pati i’dile i’di ’diyi be, pari ’bani fizuri ovu drilenia indi.

⁷Eri ede jobileko eti ogunaniri pari erini ngazu e’yo lizuriru, adaru jobileko eti e’yo lizuri; te eri a’bu eri pati osiza marionisi engazu jo ale vari ma kala aluria cazu kpere kala aziniria.

⁸Te jo eri ngulupini ngazu adrizu aleniari, adaru irii azini jobileko eti nde ma eseliari’i, ovu edezaru ’dinile indio Sulemani si vini jo ekile jobileko eti ’dorile Farau zi erini ’dule oku iniruri dri.

⁹Jo ’diyi dria ovu sizaru oni ajeambosi ’diyisi, adaru oni onzele edele tro tro, tro tro, olile eli si be nzangararurisi alialeru azini amveleru ’diyisi, engazu jo ma eti varia cazu oni abi dria uru ’diyia, amveleru eri ovu ’dini indi cazu irii amboruria.

¹⁰Eri ’ba jo ndu oni ajeamboru ’diyisi, adaru oni amboru tu oco be wuale mudri azini wuale aro ’diyisi.

¹¹Te drinia uruleru oni ajeambosi ’diyi indi, oni onzele edele trotro, trotro ’diyi pi pari marioni be.

¹²Te irii amboru ovupi ageinia driari ovu sizaru oni opale opa ’diyisi otizaru mileko na, azini mileko alu pati osiza marionisi; ekile irii alialeru jo Yehovanirinile, azini jobileko eti jo ndenirile.

¹³Te opi Sulemani pe ’ba ti Hiramuni ejizu Turoarisi.

¹⁴Eri ovu oku awuzioru suruti Nafutaliniari ma mvi, atini ndra ’ba Turoari, onduou mola dipiri; eri ovu ’ba gapi i onduasi tre, eyo vazai indi, onduo azi molani dria ’yepiri, Eri emu opi Sulemani vu, eri ’ye azi erini dria.

¹⁵Eri ede afa molaru iri piriru, izu yini ovu wuale mudri drini aro, ombo yini ma o’biza bakasiri wuale mudri drini iri yi alu alu.

¹⁶Eri ede dri iri mola akazaru acisirisi, ’bazu afa molaru piriru iri ’diyi ma dria; dri aluri ma oco ovu wuale towi, aziniri ma oco wuale towi indi.

¹⁷Eri ede ekile baka obile embarurile, azini ekile anziriku ecile nyororile, ’bazu afa molaru piriru ’diyi ma dria; dri aluri ma dria aziri, dri aziniri ma dria aziri indi.

¹⁸’Dini eri ede afa molaru piriru ’diyi ra; anziriku aluri ma dria eci ekilaza iri, dri ovupi afa piriru ’diyi ma dria ’diyi a’buzu; eri ’ye ’dini indi dri aziniri dri.

¹⁹Te pati i’diza jobileko etia ’diyi ma dri ovu wuale su, edezaru onyiafaru ojo fusi wuale su.

²⁰Ede vini dri afa piriru ’diyi ma dria uru, ogogo pari i lipi nguluru emba tiaria; pomegranateni yi ovu turu iri otizaru dri aziniri ma ageia kuru.

²¹Eri edre afa piriru ’diyi jobileko eti hekalunia; eri edre dri ndiari, ’da runi Yakini’i; eri edre dri ejiari, ’da runi Boazi’i.

²²Afa pa sopi piriru ’diyi ma dri ovu edezaru onyiafaru ojofusi. ’Dini afa pa sopi piriru ’diyi ma azi de i ’di.

²³Eri ede miri ma otaka mola akazaru acisirisi, engazu ti aluria cazu ti aziria ovu wuale mudri, oconi edrezari wuale towi, ede eri vururu; tini o’bile bakasi kururi wuale kali na.

²⁴Ongbu ovu ti erini ma etia kuru kuru dria, ongbu mudri wuale alu vusi miri nde acezu kuru; ongbu ’diyi ovu otizaru esele be iri, yi ede yi mola akazarusi o’du yini miri nde edezurisi.

²⁵Eri so pa endrilendri edele tiagoni mudri drini iri ’diyi ma ngukua, na ’diyi lu andraleru, na azini ’diyi lu pari etuni ’derialeru, na azini ’diyi lu uruleru, na acepi ’diyi lu pari etuni efurialeru; miri nde ri yi ma ngukua uru, osu yi ma oro vutinialeru.

²⁶Tini ma teza ovu driale alu; tini nyozaru imvu tile, ekile ojo funi ayilerile; eco yi okozu alenia obi alifu iri.

²⁷Eri ede afa etini ’bazu ’diyi mudri molasi; oconi wuale su, walani wuale su, oco edrezari wuale na.

²⁸Azi afa etini ’bazu ’diyi ma ruaari ’dini; ede yi esele be esele be, a agofe eselenia,

²⁹pari agofe o’bazu ’diyi ma eselia endrilendri kamini, azini tini, azini kerubini. Agofe ’diyi ma dria uru afa calanaru indi, te pari kami piyini tiago beri ma etia nyoro kale onyiafaru ’diyi ovu ’izaru indi.

³⁰Afa etini ’bazu ’diyi dria ovu pa omberu be su molani, afa sule alamaru pani ecizu ’diyi molani indi; pa su ’diyi afa si trakaru ’diyi obini, ede afa si trakaru ’diyi molasi awala rua ojizuri ma etia, nyoro kale ka onyiafaru ’diyi be ejelenia.

³¹Awala nde ma ti ovu dri zopi uru wuale aluri ma alia; tini ovu vururu afa calanaru ma tile, alini wuale alu ali be; obi vini wura onyiafaru tinia indi, azini esele yini ovu ojiru kala be su, ovuni vururu ku.

³²Pani su omberu ’diyi ovu esele nde ’diyi ma etia; afa sule alamaru pani ecizu ’diyi ovu afa etini ’bazuri ma ruaa; pa alu ma zoza wuale alu ali be.

³³Ye ede pani omberu ’diyi ekile gari ombaniri ma pale; afa osule alamaru pani ecizu ’diyi pi, afa trale omberu ’diyi pie, afa osule ombeni mbazu ’diyi pie, afa ’bile be agadua ’diyi pie, ede yi dria mola akazarusi.

³⁴Afa si trakaru ’diyi su ovu pari su kalani yi ecizuria; afa si trakaru ’diyi yi ovu ’bazaru rua alu afa etini ’bazu ’diyi be.

³⁵Afa etini ’bazu ’diyi ma dria mola trale etisikole vurururi indi, zozani ururi wuale agaa; afa eti ’bazuri ma agofeni piyi eseleni ’diyi be ovu eri be rua aluru.

³⁶Agofeni piyi ma ruaa eseleni ’diyi be, eri obi wura kerubi pini, kami pie, itu pie, ekile pari nderini ecolerile, o’i nyoro kale ka onyiafaru ’diyi ageinia dria,

³⁷Eri ede afa etini ’bazu mudri ’diyi ’dini; ede yi dria tro tro, o’bizaru tro tro, azini rua be tro tro.

³⁸Eri ede awala rua ojizuri mudri molasi; awala aluni yi osu obi kali su, lawala alu alu ma o’biza wuale su, afa letini ’bazu mudri ’diyi ovu awala be yi dria, yi dria alu alu.

³⁹Eri ’ba afa etini ’bazu ’diyi, towi jo kala dri ndiaria, azini towi jo kala dri ejiaria; eri ’ba miri jo kala dri ndia etuni efurialeruria geri uruleruria.

⁴⁰Te Hiramu ede awala ’diyi, pauni pie, okeleni pie. ’Dini Hiramu de azi erini ’yele opi Sulemani dri jo Yehovani ma aliari dria;

⁴¹afa iri pa sopi piriru ’diyi, drini fupi amve imvule afa pa sopi piriru ’diyi ma dria ’diyi pie, emba iri ovupi afa iri pa sopi piriru ’diyi ma dri imvule ’diyi a’buzu ’diyi pie;

⁴²pomegranate turu su emba iri ma ruaa ’diyi pie, pomegranate ma otiza iri emba alu alu ma ruaa, afa pa sopi piriru ’diyi ma dri imvule ’diyi a’buzu;

⁴³azini afa etini ’bazu mudri ’diyi pie, awala mudri afa eti bazu ’diyi ma dria ’diyipie;

⁴⁴azini miri nderi pi, tiago mudri drini iri miri etia ’diyi be.

⁴⁵Imvu ’diyi pi, pau ’diyi pie, okeleni ’diyi pie, afa Hiramuni edele opi Sulemani dri jo Yehovani ma alia ’diyi dria ovu ’bazaru mola trile tririsi,

⁴⁶Opi ’ba mola nde aka acisi angu senderu Yoridaniaria, nyaku odriru Sukoti pi ma eselia Zaretani beriari ma alia.

⁴⁷Te Sulemani awuni afa nde ’diyi ma nziza o’bi dria ku, yini ovule karakarau turisi; yi econi mola nderi ma nziza nizaru ku.

⁴⁸’Dini Sulemani ede afa ovupi jo Yehovani ma alia ’diyi dria ra: ede pari edeta edezu meleruri pi, mesa mikate ecezani ovuzu driniari be melesi;

⁴⁹ede vini tala pari e’ye ecezani ma drilia ’diyi mele alarusi, towi dri ndia, towi dri ejia; pati fu pie, tala ’diyi pie, akpani ’diyi pie dria melesi;

⁵⁰okelena pie, afa aciolu ’duzu ’diyi pie, okeleni pie, kabileni pie, ajikoa aciolu ’bazu ’diyi pie, ede yi mele alarusi; ede aya jotile ekpazu ’diyi melesi, jo alialeru adaru pari alatararu turi ma tile ekpazu, jo ma ngulupi hekalu ma adari ma tile ekpazu indi, melesi.

⁵¹Azi dria opi Sulemanini ’yele jo Yehovania ’diyi de i ’dipi. Te Sulemani eji afa Daudi i atini ’bale ndu ’diyi, adaru dahabu pie, mele pie, afazu pie, ofi yi pari lonyi ma ta mbazu jo Yehovani ma aliaria.