Read lugbara 1 Opi 9 Bible Online

1 Opi 9 - lugbara bible

1 Opi 9

¹Eri eca ’dini, Sulemani ka de jo Yehovani pi sizu jo opini pie, afa dria Sulemanini lele ’yele ’diyi pie ’bo,

²Yehova e’da i Sulemani ma milia pale iriri, ekile ndra erini i e’dale eri vu Gibeoniarile.

³Te Yehova ’yo eri tia, Ma eri zita mini zile matu ’baza be ma miliari ’bo; ma ’ba jo mini sile ’dori alatararu ’bo, ru mani ’bazu alenia ’dani ’dani; ma mileni azini ma asini nga ovu ’daa etuzu ’dani ’dani.

⁴Te mi’i, mi ka nga aci ma drilia asi adarusi azini e’yo kililirusi ekile mi ati Daudini acilerile, ’yezu dria ekile mani azita fele mi dririle, e’yo mani azile ’diyi ma ta mbazu e’yo liza mani be,

⁵ka’dini ma nga fe oguna opi nyaza mini Israeli ma driliari ma so pa ’ dani ’ dani, ekile mani ndra azile mi ati Daudi tiarile, ’yozu kini, ’Ba mini ngani ece rizu oguna Israeliniri ma dria ku.

⁶Te emi ka nga emi oja ma vuti bizu ku, emi’i kani anzi emini, emi ka azita mani ma ta mba ku e’yo mani azile mani ’bale mi drilia ’diyi pie, te emi ka mu azi ngazu Mungu azini ’diyi vu, yi inzizu,

⁷ka’dini ma nga Israeli nze angu mani fele yi dririasi ra; azini jo ’dori mani ’bale alatararu ma rusiri ma nga eri ’be ma miliasi ra; te e’yo Israeliniri nga adri o’dukoru azini ajidimaru suruti ma eselia ani beni.

⁸jo ’dori ka ovu izu ngopi ti, ’ba dria alu alu ngapi agapi kalanisiri nga osu osu, nga eri onzi; te yi nga ’yo, Yehova ’ye angu ’dori ’doni azini jo ’dori ’doni a’di e’yosi ya?

⁹Te yi nga e’yo omvi ’yo kini, A’disiku yi ku Yehova Mungu yini ra, eri’i yi a’bipi ofupi angu Misiriniasiri, yi ebi yi Mungu azini vu, yi inzizu, azi ngazu yi dri; e’yo ’disi Yehova eji ocoko ’diyi dria yi ma ruaa ani.

¹⁰Eri eca ’dini eli kali irini agaria ’boria, ewu Sulemanini jo iri ’diyi, adaru jo Yehovani azini jo opini sizu ’borisi,

¹¹te Hiramu opi Turoari fe Sulemani dri pati marioni, pati masani pie, mele pie dria erini lelerile,dini opi Sulemani fe Hiramu dri aku kali iri angu Galilinia ’diyi.

¹²Te Hiramu efu Turoasi aku Sulemanini fele eri dri ’diyi andrizu, te feni ayiko eri ma milia ku.

¹³Eri ’yo ra, Mi fe ma dri ’doni a’di akuni ya, ma adri la? Omve yi angu Kabulini cazu kpere andru.

¹⁴Isu de Hiramu pe ndra ’ba ti mele onziru turu alu drini kali iri ’diyi jizu opi dri.

¹⁵E’yo fepi opi Sulemanini ’ba okuzu azi ngazu azitasiri eri ’di, oku yi jo Yehovani sizu, jo eri ngulupini pie, Milo pie, abi oniru Yerusalemuni pie, Hazori pie, Megido pie, Gezeri pie dria.

¹⁶Isu de Farau i opi Misiriari tu uru Gezerini bizu vezu acisi ’bo, eri ofu ’ba Kananini ovupi aku nderi ma alia ’diyi ’bo, fe aku nde i zi Sulemani ma oku ma dri yamararu;

¹⁷e’yo ’disi Sulemani si Gezerini dika. Eri si vini Betihoroni valeruri pie,

¹⁸Baalati pie, Tamari roko driari pie, angu nde ma alia,

¹⁹aku dria Sulemanini lonyi ta mbazu alenia ’diyi pie, aku gari omba vile ’diyini pie, aku ’ba nzupi akanya dria ’diyini pie, afa dria Sulemani ma asini lele sile Yerusalemua ’diyi pie, Lebanonia ’diyi pie, azini angu dria erini nyaleri ma alia ’diyi pie dria.

²⁰Te ’ba joloko dria acepi Amorini ’diyi, ’ba Hitini ’diyi pie, ’ba Perizini ’diyi pie, ’ba Hivini ’diyi pie, ’ba Yebusini ’diyi pie, yi’i ovupi anzi Israeliniru ku ’diyi-

²¹anzi yini awupi angu nde alia anzi Israelini ecole ndra dri jale dria ku ’diyi-Sulemani oku ’ba ’diyi okposi azi ngazu ati’baru, yi ovu ’dini ecazu kpere andru.

²²Te anzi Israelini eselia, Sulemani ’bani ati’ba ku; te eri ’ba yi ’ba a’di ’dipiriru, ’ba eri ma agei tepiriru, azini opi eriniru, azini ’ba ambo asikari driliariru, ’ba gari ombani ma driliariru, azini ’ba nzupi akanya dria ’diyi ma driliariru.

²³’Ba ’wara agapi azi Sulemanini drilia ’diyi ovu turu towi, yi ovu ’ba azi ngapi ’diyi ma drilia.

²⁴Te Farau zi efu aku Daudiniasi emuzu uru jo Sulemanini sile eri driria;di ma vutia eri si Milo.

²⁵Te pale na eli alu alu vusi Sulemani fe ndra edeta vezaru pi edeta asi anzuruni be pari edeta vezu erini edele Yehova driri ma dria, obiese vele veri be tualu, Yehova drilia. ’Dini eri de jo nderi ra.

²⁶Te opi Sulemani ede ndra oguru ongulumuru Ezioni-geber, Eloti ageia, Miri Ekaru ma tiaria, angu Edomunia.

²⁷Te Hiramu pe ati’ba erini ovupi onduouru oguru ti opepi, e’yo mirini nipi ’diyi, oguru nde ’diyi be, tualu ati’ba Sulemanini pie;

²⁸yi ca Ofiria, yi e’du ’dale mele onziru turu su drini kali iri; yi eji eri opi Sulemani vu.