Read lugbara 2 Opi 10 Bible Online

2 Opi 10 - lugbara bible

2 Opi 10

¹Te Ahabu ovu anzi be kali aziri Samariaa. Te Yehu si waraga, pe yi ti Samariaa ’ba opiru Yezireelia ’diyi dri, adaru ’ba ’wara ’diyi pi dri ’ba anzi Ahabuni ezopi ’diyi be, kini,

²Opi emini ma anzi piyini ovuzu emi berisi, azini gari akanya pie yini ovuzu emi berisi, aku kali okporu be ’diyi pie, afa a’di ’dizu ’diyi pie, waraga ’dori ka nga ca emi vu ’bo,

³coti emi ma ama opi emini ma anzi ma eselia ’ba agapi onyisi dri fupi ciri, emi ma ’ba eri oguna atini ma dria, emi ma ’di a’di opi emini ma suruti dri.

⁴Te yi ru tu, yi ’yo kini, Mi ne, Opi iri ’diyi soni pa eri drilia ku, ama nga pa so ngoni ngoni ya?

⁵Te ’ba ’ba azi ngapi joa ’diyi ma driliari pi, ’ba aku driliari pie, ’ba ’wara ’diyi pie, ’ba anzi ezopi ’diyi pie, yi pe ’ba ti Yehu vu ’yozu kini, Ama ovu ati’ba mini, ama nga e’yo dria mini azile ama tiari ’ye ra. Ama ngani ’ba aluni ’ba opiru ku; te mi ’ye erini ovule mi milia onyirurile.

⁶Te Yehu nga di waraga iriri si yi dri ’yozu kini, Emi ka fi ma vualeru, emi ka le e’yo mani azileri eri ra, emi o’du opi emini ma anzi ’diyi ma dri, emi emu ma vu Yezireelia dru etu ’dipi. Te opi ma anzi kali aziri ’diyi, yi ovu ’ba ’wara aku ndea yi ezopi ’diyi be.

⁷Te eri eca ’dini, waraga ka eca yi vu ’bo, yi o’du opi ma anzi kali aziri ’diyi, ofu yi, o’ba dri yini kekele alia, pe yi ti Yehu vu Yezireelia.

⁸Te ojio nga eca eri vu ’yozu kini, Eji opianzi ma dri ’do. Eri nga ’yo kini, Emi o’ba yi nguluru tindi iri kalitile ’bani fizuria cazu o’bitisi.

⁹Eri nga eca ’ dini o’bitisi, eri fu ra, so pa, ’yo ’ba dria tia kini, Emi ovu kililiru. Te ma’i, ma oro e’yo opi mani ma ruaa, ma fu eri; te agu ’ba ’diyi ofupi driari a’di’i ya?

¹⁰Emi ma ni di e’yo Yehovani ’yoleri, Yehovani ’yole suruti Ahabuni ma e’yosi ’diyi ma eseliari aluni ngani ’de nyakua pirini ku; te Yehova ’ye e’yo erini ndra ’yole ati’bo erini Eliya ma tisiri ’bo.

¹¹’Dini Yehu ofu ’ba dria suruti Ahabuni acepi Yezireelia ’diyi, ’ba ’wara erini dria ’diyi pie, agyi erini pie, kuhani erini ’diyi pie, eri kuni yi ma alu eri dri ku,

¹²’Di ma vutia eri enga, ko dri mu Samariaa. Erini ovuria geria pari ’ba kabilo ocepi ’diyini kabilo ’biko lizuria,

¹³Yehu nga dri fu Ahazia opi Yudaari ma adripi be, eri ’yo ra, Emi a’dikoni ya? Yi omvi eri tia kini, Ama ovu Ahazia ma adripi, ama mu si va opi anzipi zizu oku opi okuri vileri ma anzipi be.

¹⁴Eri nga ’yo ra, Emi obi yi mile be. Te yi nga yi obi mile be ra, nga yi ofu ’bile pari ’ba kabilo ocepi ’diyini kabilo ’biko lizuriaria, adaru, ’ba kali su drini iri ’diyi, kuni yi aluni ku.

¹⁵Eri ka pari ’da ku ra, eri isu Yehonadabu Rekabu mvi erini emuria dri furia eri be; eri zi eri ci ci, zi eri tia kini, Asi mini ovu onyiru ma vu ekile ma asini ovule onyiru mi vurile ra ya? Te Yehonadabu nga omvi eri tia kini, E, ’dini. Yehu kini, Ka’dini, mi eju mi dri ma vu. Eri eju dri erini eri vu, eri nga eri ese uru gari alia.

¹⁶Eri ’yo kini, Mi mu ma be, mi ne asi draza mani Yehova ma e’yosiri’i. ’Dini eri fe erini acizu gari erini ma alia.

¹⁷Eri ka ca Samariaa, eri ofu ’ba Ahabuni acepi Samariaa ’diyi dria, cazu erini yi dri jazu driaria, ekile e’yo Yehovani ’yole Eliya tiarile.

¹⁸Te Yehu nga ’ba dria okutu alu, ’yo yi tia kini, Ahabu nga ndra azi Baali dri were; te Yehuni nga azi nga eri dri tu.

¹⁹E’yo ’disi emi omve di nabi Baalini ’diyi dria ma vu, ’ba dria eri inzipi ’diyi pie, kuhani erini ’diyi pie dria; ’ba aluni ma ece ku, a’disiku ma ovu edeta ambo be fezu Baali dri; ’ba ecepi rari ngani ovu idriru ku. Te Yehu ’ye e’yo nderi lokirisi, ’dini eri nga ’ba Baaliniinzipi ’diyi ma dri ja dria.

²⁰Te Yehu nga ’yo kini, Emi eku okuta inzizaru Baali driri ma e’yo. Yi eku e’yo nderi ani.

²¹Te Yehu pe ojio ti suruti Israelini ma eselia dria; ’ba Baalini inzipi ’diyi emu dria, ’dini ’ba aluni acepi emukokoruri yo. Yi fi jo Baalini ma alia, jo Baalini ga tre ani engazu kala alua cazu kala aziniria.

²²Eri ’yo ’ba bongo agei tepiri ma tia, Mi eji bongo ’ba Baalini inzipi ’diyi dri dria. Eri eji bongo yi dri ani.

²³Yehu pi nga di fi jo Baalini ma alia, Yehonadabu Rekabu mvi be; eri nga ’yo ’ba Baalini inzipi ’diyi ma tia kini, Emi nda, emi ne ati’bo Yehovani ma ovu emi eselia aluni ku, ki ’ba Baalini inzipi ’diyi.

²⁴’Di ma vutia eri fi edeta fezu edeta vezaru be. Te isu Yehu ope ’ba kali aro ’diyi pa sozu amve ’bo, ’yozu kini, ’Ba fepi ’ba alu ’ba mani fele emi dri ’diyi ma eseliarini apazu rari, idri eriniri nga ovu agu nde ma idri ma paria.

²⁵Eri nga eca ’dini, eri ka edeta veza fe de ’bo, Yehu nga ’yo ’ba agei tepi ’diyi pi tia mbele, ambo yi drilia ’diyi be kini, Emi fi yi ofu; emi ku aluni ma apa ku. Yi nga yi oli seisi, ’ba agei tepi ’diyi ambo yi drilia ’diyi pie nga yi o’be amve, yi nga fi jo Baalini aliza aleruri ma alia,

²⁶yi ofu pati i’dile inzizaru jo Baalini ma alia ’diyi, eve yi ra.

²⁷Yi onyo pati i’dile inzizaru Baaliniri va, yi asu jo Baaliniri va indi, yi ’ba eri ovuzu jo azavuniriru, ecazu kpere andru.

²⁸’Dini Yehu ini ndra Baalini Israeli ma eseliasi ra.

²⁹Te Yehu ojani e’yo onzi Yeroboamu Nebati mvini ’yeleri, erini fele Israelini ’yele, koanzi meleru Betelia azini Dania ’diyi kuzu ku.

³⁰Te Yehova nga ’yo Yehu tia kini, Mini ’yele onyiru e’yo ovupi ’yeke ma milia ’yezu, azini mini suruti Ahabuni ’yele dria ekile ovupi ma asiarilerisi, a’bianzi mini cazu suria nga ri oguna Israeliniri dria.

³¹Te Yehu ’bani asisile ini dria acizu azita Yehova Mungu Israeliniri ma alia ku; eri kuni e’yo onzi Yeroboamuni ’yeleri, erini fele Israelini ’yele ’diyi ku.

³²Ewu nderisi Yehova ’ba angu Israelini omvi were. Angu Israelini ma eselia dria, Hazaeli aga yi ombasini:

³³engazu Yoridania etuni efurialeruria, angu Gileadini dria, angu ’ba Gadia ’diyiniri pi, ’ba Rubenia ’diyiniri pie, ’ba Manasea ’diyiniri pie, engazu Aroeri ovupi e’bu Arinoni ma aliaria, adaru Gileadi pi Basani be.

³⁴’Yeta azini dria Yehuni, e’yo erini ’yele ’diyi pie dria, okpo erini pie dria, yi sini yi buku opi Israelini ’diyi ma e’yo ecezuri ma alia ku ya?

³⁵Te Yehu la i a’bipi be, yi sa eri Samariaa. Te mvi erini Yehoahazi nya opi eri ma pariani.

³⁶Te ewu Yehuni opi nyazu Israeli ma drilia Samariaari ovu eli kali iri drini aro.