Read lugbara 2 Opi 12 Bible Online

2 Opi 12 - lugbara bible

2 Opi 12

¹Yehoasi e’do vini opi nyazu eli aziri Yehuni opi nyazurisi, eri nya opi eli kali su Yerusalemua. Andri erini ma ru Zibia Beerisebaari’i.

²Te Yehoasi ’ye e’yo ovupi Yehova ma milia ’yekeri ewu erinisi dria, kuhani Yehoyadani eri imbaria.

³Te pari uruleru ’diyi, nzeni yi ku; ’ba yi ede edeta azini yi ve obiese pari uruleru nde ’diyia ’dani.

⁴Yehoasi ’yo kuhani tia kini, Silingi dria afa alatararu ’diyi vile ’bani ejile jo Yehovani ma aliari, silingi lale agupi alu alu vusi ewu nderisi ’diyi pie, silingi lale ’ba dria vusi ’diyi pie, silingi dria ’ba ma asini lele fele jile jo Yehovani alia ’diyi pie,

⁵kuhani ma ’du ’ba alu alu yini nile ’diyi ma driasi; yi ma ede pari jo ruaa depi de ’diyi ani pari dria e’dapi dezaru ’diyi edezu.

⁶Eri eca ’dini, eli kali iri drini na Yehoasini opi nyazurisi, isu kuhani edeni nga jo nde deza ’diyi ku.

⁷Vutinia Yehoasi omve kuhani Yehoyada, kuhani azini ’diyi be, ’yo yi tia kini, A’di e’yosi emi edeni jo deza ’diyiku ya?’Dini curu’doemi mao’du silingi ’ba emini nile ’diyi ma driasi ku, te ma fe silingi nde ’diyi azi nde deza jo nde ma ruaa ’diyi edezu.

⁸Kuhani yi a’i yini silingi ’duzu dika ’ba vu ku, a’i vini deza jo ma ruaa ’diyi edezu ku indi.

⁹Te kuhani Yehoyada nga sandu ku ’du, nga sanduku nde ma tala lu drinia, ’ba eri pari edeta edezuri ma ageia, dri ndi ’bani fizu jo Yehovanirialeruria; te kuhani pari ’bani fizuri ma agei tepi ’diyi yi nga silingi dria ’bani ejile jo Yehovania ’diyi ’ba alenia.

¹⁰Eri ovu ’dini, yi ka ne silingi ovu tre sanduku nde alia, ’ba waraga opini sipiri pi nga etu kuhani amboruri be, yi nga silingi yini isule Yehovaniri ma alia ’diyi la, nga yi o’ba jurua alia jurua alia.

¹¹Yi nga silingi ’bani yi ma nziza o’bile ’bo ’diyi ofe ’ba mbau onduouru ’diyi pi dri ’ba jo onduouru ’diyi be, yi’i azi jo Yehovani ngapi ’diyi.

¹²Yi nga fe indi ’ba biriki ’bapi ’diyi pi dri, ’ba oni gapi ’diyi be, yi fe vini mbau pi jezu oni galeri be, pari jo Yehovani ma ruaa depi de ’diyi edezu, azi dria jo nderi ma ruaari edezurisi.

¹³Te silingi ’bani ejile jo Yehovani ma aliarisi yi edeni jo Yehovani dri okelea dahaburu pi ku, akpaa acini ’diyi pie, imvu ’diyi pie, guka pie, kani afazu azini ngoni ngori meleni kani dahabuni ’diyi pie ku,

¹⁴a’disiku yi fe silingi nde ’diyi ’ba azi ngapi ’diyi dri, pari jo Yehovani ma ruaa depi de ’diyi edezu ani.

¹⁵Indi vini yi ozini ’ba yini silingi fezu yi dri, yi ma fe ani ’ba azi ngapi ’diyi dri ’diyi ma tia ku, toko ku yini ’yele kililirurisi.

¹⁶Te silingi edeta ezatani ’diyi vileri, silingi edeta e’yo onzini ’diyi vileri pie, ejini yi jo, Yehovani ma alia ku; eri ovu kuhani pini.

¹⁷Ewu nderisi Hazaeli opi Suriaari tu uru a’di ’dizu Gatu be, aga eri ra, Te Hazaeli ’ba mile ini okporu muzu Yerusalemua uru.

¹⁸Te Yehoasi opi Yudaari ’du afa dria alatararu i a’bipi Yehosafati pini ’bale ndu Yehoramu pie, i ati Ahazia pie ’diyi, yi opi Yudaa ’diyi, tualu afa alatararu i ngulupini ’diyi pi, mele dria ovupi lonyi jo Yehovaniari ma eselia ’diyi pie, azini jo opini ma alia ’diyi pie, pe yi ti Hazaeli opi Suriaari dri. ’Di ma vutia Hazaeli nga Yerusalemuni ku, mu ra.

¹⁹’Yeta azini Yoasini, e’yo erini ’yele ’diyi pie dria, yi sini yi buku opi Yudaa ’diyi ma e’yo ecezuri ma alia ku ya?

²⁰Te ati’ba erini yi otu o e’yo eri ruaa, yi fu Yoasini jo omvele Milo, geri ’bani sizu Silaaria.

²¹Te ati’ba erini Yozakari Simeati mvi pi Yehozabadi Someri mvi be, co eri kai, eri dra ra. Yi sa eri i a’bipi be aku Daudiniria, te mvi erini Amazia nya opi eri ma pariani.