Read lugbara 2 Opi 14 Bible Online

2 Opi 14 - lugbara bible

2 Opi 14

¹Te Amazia Yoasi mvi, opi Yudaari, e’do opi nyazu eli iri Yoasi Yehoahazi mvi opi Israelini opi nyazurisi.

²Eli erini ovu kali iri ’drini towi erini e’dozu opi nyazurisi, eri nya opi eli kali iri drini oromi Yerusalemua. Andri erini ma ru Yehoadini Yerusalemuari’i.

³Eri ’ye e’yo ovupi onyiru Yehova ma miliari, te trotro i a’bi Daudini ’yelerile ku; eri ’ye dria i ati Yoasini ’yelerile.

⁴Te nzeni pari uruleru ’diyi ku; ’be yi ede edeta azini yi ve obiese pari uruleru ’diyia nga ’dani.

⁵Eri eca ’dini, eri ka ne i isu okpo opiniri i dria ’bo, mbele eri ofu ati’ba ini i atini fupi ’diyi.

⁶Te eri ofuni anzi ’ba nde ’diyini ku; ekile ovupi sizaru buku azitani Musaniri ma aliarile, ekile Yehovani azilerile kini, Ata ma ovu fuzaru anzi ma e’yosi ku, indi vini anzi ma ovu fuzaru ata ma e’yosi ku, te ’ba dria alu alu ma dra e’yo onzi yi ngulupinisi.

⁷Eri ofu ’ba Edomua ’diyi alifu mudri e’bu A’inia, eri ’du Selani ombasi, ’da runi Yokiteli’i ecazu andru.

⁸Vutinia Amazia nga ojio ma ti pe Yehoasi, Yehoahazi Yehu mvi ma mvi opi Israeliari vu ’yozu kini, Mi emu, ama one ama milia milia.

⁹Te Yehoasi opi Israeliari pe ’ba ti Amazia opi Yudaari vu ’yozu kini, Ocakayi Lebanoniari pe ’ba ti mario Lebanoniari vu, ’yozu kini, Mi fe mi zini ma mvi dri okuru; te nguru Lebanoniari aga ’dale, otu ocakayi nderi pasi.

¹⁰Adaru mi co Edomuni ’bo, asi mini ovu afusi ani. Mi enya mi e’yo nderisi, mi te angu minia; te mi le fi e’yo ’diri ma alia aka apadriru, candi isuzu, mini ngazu e’dezu Yuda be tualu a’disi ya?

¹¹Te Amazia leni e’yo eri ku. ’Dini Yehoasi opi Israeliniri tu uru, yi one yi milia milia Amazia opi Yudaari be Beti-semesi aku Yudaaria.

¹²Te Israeli aga Yuda ra, yi dria alu alu nzu hema yinia ani.

¹³Te Yehoasi opi Israeliniri bi opi Yudaari Amazia, Yehoasi Ahazia mvi ma mvini, Beti-semesia, eri ca vini Yerusalemua, asu abi kaliru ’Yerusalemuari va engazu kalitile Efiraimuniria cazu kalitile kalaaria, ekile wuale turu sule.

¹⁴Eri wu mele pi, dahabu pie, afazu dria jo Yehovaniri ma alia ’diyi pi, azini ovupi lonyi aje be ambo opi ma jo aliari ma eselia ’diyi pie, ’ba obile aruru ’diyi pie, yi mvi Samariaa.

¹⁵’Yeta azini dria Yehoasini ’yele ’diyi, okpo erini pie, e’yo erini a’di ’dizu Amazia opi Yudaari beri pie, yi sini yi buku opi Israelini ’diyi ma e’yo ecezuri ma alia ku ya?

¹⁶Te Yehoasi la i a’bipi be, yi sa eri Samariaa opi Israelini ’diyi be; te Yeroboamu mvi erini nya opi eri ma pariani.

¹⁷Amazia Yoasimvi,opi Yudaari, ovu idriru eli mudri drini towi Yehoasi Yehoahazi mvini drazuri ma vutia.

¹⁸’Yeta azini dria Amaziani ’yele ’diyi, yi sini yi buku opi Yudaa ’diyi ma e’yo ecezuri ma alia ku ya?

¹⁹’Ba yi otu e’yo eri ruaa Yerusalemua, eri apa Lakisia ani. Te yi pe ’ba ti eri ma vutisi Lakisia, fu eri ’dale.

²⁰Te yi eji eri ma avu akanya dria; sa eri Yerusalemua i a’bipi be tualu aku Daudiniria.

²¹’Ba Yudaa ’diyi dria nga Azaria ovupi eli be mudri drini aziari ’du, ’ba eri opiru ati Amazia ma paria.

²²Opini lazu i a’bipi beri ma vutia, eri nga Elatini si, omvi eri Yuda vu.

²³Yeroboamu Yoasi mvi opi Israeliniri e’do opi nyazu Samariaa eli mudri drini towi Amazia Yoasi mvi opi Yudaarini opi nyazurisi, eri nya opi eli kali su drini alu.

²⁴Eri ’ye e’yo ovupi onzi Yehova ma miliari; kuni e’yo onzi Yeroboamu Nebati mvini ’yele, fele Israelini ’yele ’diyi ku.

²⁵Eri omvi lokiri Israelini engazu pari ’bani fizu Hamatiaria cazu miri Arabaaria, ekile e’yo Yehova Mungu Israelinirini ’yole ndra ati’bo ini nabiru Yona Amitai mvi ovupi Gati-heferiari ma tisirile.

²⁶Te Yehova ne inzata Israelini onzi turi, toko ku ’ba obile ati’baru aceni aluni ku ’ba kari’baru ’diyi be, indi vini ’ba Israeli ma aza kopiri yo.

²⁷Te Yehova ’yoni ndra ku i nga ru Israelini ini ’bu etiasi; te eri pa yi Yeroboamu Yoasi mvi ma drisi.

²⁸’Yeta azini dria Yeroboamuni, e’yo erini ’yele ’diyi pie dria, okpo erini pie, e’yo erini a’di ’dizuri pie, e’yo erini Damasiki pi o’duzu Yudaasi Hamati be yi omvizu Israeli driri pie, yi sini yi buku opi Israeliniri ’diyi ma e’yo ecezuri ma alia ku ya?

²⁹Te Yeroboamu la i a’bipi be tualu, adaru opi Israelini ’diyi be, te mvi erini Zekaria nya opi eri ma pariani.