Read lugbara 2 Opi 17 Bible Online

2 Opi 17 - lugbara bible

2 Opi 17

¹Hosea Ela mvi e’do opi nyazu Samariaa Israeli ma drilia eli mudri drini iri Ahazi opi Yudaarini opi nyazurisi, eri nya opi eli oromi.

²Eri ’ye e’yo ovupi onzi Yehova ma miliari, te trotro ekile opi Israelini ovupi eri drilia ’diyini ’yelerile ku.

³Salimaneseri emu uru a’di ’dizu eri be, te Hosea ofu ati’bo eriniru, ji afa feza ofezu eri dri.

⁴Te opi Asuriaari isu lokiri Hosea vu; a’disiku eri pe ojio ma ti So opi Misiriaari vu, te feni feta opi Asuriaari dri ekile erini adrile ’yele eli vusi eli vusirile ku; e’yo ’disi opi Asuriaari nga eri ’i ra, ’bazu jo arunia.

⁵’Di ma vutia opi Asuriaari mu, aci angu eseliasi dria, eri tu Samariaa, ace eri ombasi kuru kuru eli na.

⁶Eli oromi Hoseanirisi opi Asuriaari ’du Samariani, ’du Israeli ji yi Asuriaa, o’ba yi Halaa, azini yi ara Gozania Habori ma ria, azini aku Medini ma alia.

⁷Eri eca ’dini, a’disiku anzi Israelini e’yo onzi ’yele Yehova Mungu yiniri ndra yi ofupi angu Misirini ma aliasi, engazu Farau opi Misiriari ma driasiri vurisi, vini yini Mungu andini rulerisi indi,

⁸yini acile vini azita ’ba jururu Yehovani odrole amve anzi Israelini ma driliasi ’diyi ma vutiarisi, azini yini acile azita opi Israelia ’diyini o’bale ’diyi ma vutiarisi.

⁹Te anzi Israelini ’diyi ’ye ozizaru e’yo ovupi onyiru kuri Yehova Mungu yiniri vu. Yi si pari uruleru ’diyi aku yini vusi dria, engazu jo izu ’ba angu agei tepi ’diyini ovuzuria cazu aku ambo abi kaliru beria;

¹⁰yi i’di vini afa piriru inzileri pi Asera be oni ’wara dria ma dria, azini pati ibi dria ma etia indi;

¹¹’dale yi ve obiese pari uruleru ’diyia dria, ekile suru Yehovani wule yi drilia ’diyini ’yelerile. Yi ’ye e’yo onzikanyaru adra fezu ’Yehova dri,

¹²yi ’ye vini azita wura toko Yehovani ’yole, Emi ma ’ye e’yo ’diri ku, ’diyini.

¹³Te ti, Yehova nze e’yo ma eti Israeli pi vu Yuda be, nabi dria alu alu ma tisi, azini ’ba dria e’yo ndreza ndrepi ’diyi ma tisi indi, ’yozu kini, Emi ku geri onzi eminiri, emi mba azita mani pi ma ta aziza mani pie, ekile azita dria mani ndra fele emi a’bipi dri, azini mani ndra tini pele emi vu ati’ba mani nabiru ’diyi ma tisirini ’yolerile.

¹⁴Te ti, yi leni erizu ku, yi ’ba ombe yini mbazaru ekile yi a’bipini ndra Yehova Mungu yiniri a’ipi ku ’diyini ndra ombe ’bale i mbazarurile.

¹⁵Te yi o’be azita lerini, aziza erini ndra azile yi a’bipi be ’diyi pie, e’yo eti nzeza erini nzele yi dri ’diyi pie. Yi bi afa toko ma vuti, yi eca toko, yi bi suru yi ageia Yehovani ’yole yi ma ’ye ekile yini ’yelerile ku ’diyi ma vuti.

¹⁶Te yi ku azita Yehova Mungu yinirini ’diyi dria, yi ede yi dri wura mola akazaru acisirisi, adaru wura koanzini iri, yi ede vini Asera, yi inzi ongulumu ’bua ’diyi dria, yi ’ye azita Baalini.

¹⁷Azini yi ve agupianzi yini piyi edetaru ezoanzi yini be, yi ndri andri, yi ro olesi indi, yi fe yi ngulupi je pi e’yo ovupi onzi Yehova ma miliari ’yezu, adra fezu eri dri.

¹⁸E’yo ’disi adra Yehovani di okporu Israeli vu, eri onze yi eri ma miliasi; aluni aceni ku pe kiri suruti Yudani a’dule.

¹⁹Yuda mbani vini indi azita Yehova Mungu yinirini ma ta ku, te yi aci azita Israelini o’bale ’diyi ma alia;

²⁰Te Yehova ’be ori’ba Israelini ’diyi dria, ’ye yi okporu, fe yi ’ba afa opapi ’diyi dri, cazu erini yi ,’bezu i ma miliasi amveria.

²¹Eri nze Israeli suru Daudiniasi; te yi ’ba Yeroboamu Nebati mvini opiru. Te Yeroboamu oja Israeli yi nzezu geri Yehova ma vuti bizuriasi, ’fezu yi dri e’yo onzi amboru ’yezu.

²²Anzi Israelini ad e’yo onzi dria Yeroboamuni ’yele ’diyi ma alia; yi kuni e’yo nde ’diyi ku,

²³ecazu Yehovani Israeli nzezu i miliasiria, ekile erini ’yole ati’ba erini nabiru dria ’diyi ma tisirile. ’Dini Israeli ovu nzezaru angu yi ma ngulupiniriasi cazu angu Asuriaria, ovuzu ’dale cazu kpere andru. Ba andini ejizu Samariaari

²⁴Te opi Asuriaari eji ’ba Babulonia ’diyi pi, Kutaa ’diyi pie, Avaa ’diyi pie, Hamatia ’diyi pie, Sefarivaimua ’diyi pie, eri ’ba yi aku Samariaa ’diyi ma alia anzi Israelini ’diyi ma paria; yi ’du Samariani ovuzu angu yiniru, yi adri aku angu nderini ’diyi ma alia.

²⁵Eri eca ’dini, yini e’dozu adrizu ’daleria yi runi Yehovani ku; e’yo ’disi Yehova pe kami pi ma ti yi eselia yi ma azini ’diyi ocizu kai kai.

²⁶E’yo ’disi ’yo opi Asuriaari tia kini, Suru mini jile ’bale aku Samariaa ’diyi ma alia ’diyi, yi nini Mungu angu nderiniri ma azita ku; e’yo ’disi eri pe kami pi ma ti yi eselia, te mi ne, yi oci yi kai kai yini Mungu angu nderiniri ma azita nile kurisi.

²⁷’Di ma vutia, opi Asuriaari azi e’yo kini, Emi pe kuhani alu kuhani emini obile jile engazu ’dale ’diyi ma eseliari; emi fe eri ma mu ovuzu ’dale, Mungu angu nderiniri ma azita imbazu yi dri.

²⁸’Dini kuhani alu yini ndra bile jile Samariaasiri nga emu ovuzu Betelia, eri imba yi Yehovani ruzu.

²⁹Te ti, suru dria yi ede adrou yi ngulupini, yi o’ba yi jo pari uruleru ’diyini ma alia, nde ’ba Samariaa ’diyini ndra sile ’diyi, suru dria alu alu ’ye ’dini aku yini ovuzu alenia ’diyi ma alia.

³⁰’Ba engapi Babulonia ’diyi ede Sukoti-benotini, ’ba engapi Kutaa ’diyi ede Nerigalini, ’ba engapi Hamatia ’diyi ede Asimani,

³¹’ba engapi Avaa ’diyi yi ede Nibihazini pi Taritakini be; ’ba engapi Sefarivaimua ’diyi ve anzi yini aci alia Adrameleki pi dri Anameleki be, yi adrou Sefarivaimuni’diyi.

³²Yi ru vini Yehovani indi, yi ope yi ngulupi dri ’ba ndu ndu yi eselia ovuzu kuhaniru pari uruleru ’diyia, edeta edezu yi dri jo ovupi pari urulerua ’diyi ma alia.

³³Yi ru Yehovani, yi nga azi adrou yi ngulupini ’diyi dri indi, ekile suru nde ’bani yi bile jile yi eseliasi ’diyini adrile ’yelerile.

³⁴Ecazu kpere andru yi ’ye ekile yini ’yele okurile. Yi runi Yehovani ku, yi ’yeni vini azita sizaru yini ku, e’yo liza yini pie, azita pie, e’yo Yehovani ndra azile Yakobo erini runi ’dale Israeli’iri ma anzi driri pie.

³⁵Te Yehova azi ndra aziza yi be, fe ndra azita yi dri kini, Emi ma ru Mungu andini ’diyi ku, emi ma osi vini kumuti yi drilia ku, ma nga azi yi dri ku, ma ede edeta yi dri ku indi;

³⁶te emi ma ru Yehova ndra emi ofupi angu Misirinia okpo amborusi, dri erini ejulerisiri’i; emi ma osi kumuti eri drilia, emi ma ede edeta eri dri indi.

³⁷Te emi ma mba azita sizaru erini sile ndra emi dri ’diyi pi ma ta yi ’yezu ’dani ’dani, e’yo liza pie, azita pie, e’yo erini azileri pie. Emi ma ru Mungu andini ku,

³⁸azini emi ma avi aziza mani azile emi beri ku. Emi ma ru Mungu andini ku,

³⁹te emi ma ru Yehova Mungu eminiri, eri nga emi opa ari’ba emini ma driasi dria.

⁴⁰Te ti, yi erini ku, yi ’ye ’dani yini ’yele okuri1e.

⁴¹’Dini suru ’diyi ru ndra Yehovani, te yi nga azi wura opale opa yini inzile ’diyi dri; anzi yini ’ye ’dini indi, azini anzi yini ma anziekile yi a’bipini ’yelerile, yi ’ye ’dini ecazu kpere andru.