Read lugbara 2 Opi 19 Bible Online

2 Opi 19 - lugbara bible

2 Opi 19

¹Eri eca ’dini, opi Hezekia ka e’yo nderi eri ra, eri asi bongo ini ra, su koliba, fi jo Yehovani ma alia.

²Eri pe Eliakimu, ’ba opi ma joa ’diyi ma driliari pi ma ti nabi Isaya Amozi mvi vu, Sebina ’ba e’yo sipiri pie, kuhani mbazaru ’diyi pie, su dria koliba yi ruaa.

³Yi ’yo eri tia, Hezekia ’yo ’dini kini, Andru ovu o’du candini, azini egazu ’ba driarini, azini drinzani; a’disiku etu anzi osizuri eca ’bo, te okpo yi osizuri yo.

⁴Kani Yehova Mungu miniri nga e’yo dria Rabisake, opi erini opi Asuriaarini tini epele Mungu idriru o’dazurini ’yole ’diyi eri ra, kani eri nga e’yo okporu omvi e’yo nde Yehova Mungu minirini erile ’diyi ma e’yosi; e’yo ’disi mi zi ’ba joloko acepi ’diyi ma e’yosi.

⁵Ati’ba opi Hezekiani ’diyi ka eca Isaya vu,

⁶Isaya nga ’yo yi tia kini, Emi ma ’yo opi emini tia, Yehova ’yo ’dini kini, Mi ru ku e’yo mini erile ’diyisi, e’yo nde ati’ba opi Asuriaarini ’diyini ma o’dazu ’diyisi.

⁷Mi ne, ma nga orindi ’ba eri alia, eri nga e’yo kuza eri, eri nga mvi angu eri ngulupinia; te ma nga fe erini ’dezu drazu seisi angu eri ngulupini ma alia.

⁸’Dini Rabisake mvi ra, eri isu opi Asuriaari a’di ’diria Libinaa; te eri eri ndra kini eri ku Lakisini ’bo.

⁹Eri ka eri e’yo Tirihaka opi Etiopiaarini, kini, Eri pe ’ba ti a’di ’dizu mi be ’bo, eri pe ojio ti dika Hezikia vu ’yozu kini.

¹⁰Emi ma ’yo ’dini Hezekia opi Yudaari ma tia, Mi fe Mungu mini, mini a’ita ’bazu aleniari ma ici mi ’yozu kini, Yerusalemu ngani ovu fezaru opi Asuriaari dri ku, ’dinini ku,

¹¹Mi ne, mi eri e’yo opi Asuriaa ’diyini ’yele angu dria ma alia yi dri jazu teketekeri ’bo.Temi nga mi pa ra ya?

¹²Adrou suru ndu nduni, ma a’bipini yi dri jale, yi Gozani pi, Harani pie, Rezefu pie, anzi Edeni ovupi ndra Telasaria ’diyi pie ’diyi, yi opa yi ndra ra ya?

¹³Opi Hamatiniri pi, opi Aripadiniri pie, opi aku Sefarivaimuari pie, opi Henaniri pie, opi vaniri pie, yi ngoa ya?

¹⁴Hezekia nga waraga nde a’i ojio ’diyi ma dria, eri la eri; te Hezekia nga tu jo Yehovaniria, aja waraga nderi Yehova ma milia.

¹⁵Hezekia zi Yehova tia kini, Yehova Mungu Israeliniri la! ripi Kerubi driari, mi ovu Mungu, adaru mi’i a’dukule, opi nyaza nyakuni dria ’diyi ma driliari’i; mi ’ba ndra ’bu pi nyaku be.

¹⁶Mi co mi bile ma vu fo, Yehova, mi eri; mi zi mi mile fo, Yehova, mi ne; mi eri e’yo ’yoza Senakeribuni, erini tini pele Mungu idriruri o’dazu ’diyi.

¹⁷Adaru Yehova, opi Asuriaa ’diyi eza suru ndu ndu angu yini ’diyi be ’bo,

¹⁸yi o’be adrou yini aci alia; a’disiku yi ovuni Mungu ku, te yi ovu kiri afa ’ba drini edele patisi azini onisi ’diyi; e’yo ’disi yi ja yi dri ’bo.

¹⁹Yehova Mungu amaniri la, ama matu ’ba mi vu, mi pa ama eri ma dria fo, ’dini suru opi nyazani nyakua ’diyi dria ma ni ani mi Yehova ovu Mungu a’dule.

²⁰Isaya Amozi mvi nga di ’ba ti pe Hezekia vu, ’yozu kini, Yehova Mungu Israeliniri ’yo ’dini kini, Zita mini zile ma tia Senakeribu opi Asuriaari ma e’yosiri, ma eri ’bo.

²¹’Di e’yo Yehovani ’yole eri ma e’yosiri’i, kini: Zioni zi i ecipi agupi be nga kuri- eri ngu mi onzi, eri onzo mi ogutasi; Yerusalemu zieri dri oya misi.

²²Mi fe drinza a’di vu, mi o’da a’di’i ya? Mi enga mi o’duko uru, mi ’ba mile mini uru afusi a’di vu ya? Mungu alatararu Israeliniri vu!

²³Ojio mini ’diyi ma tisi mi o’da Yehovani ’bo, mi ’yo vini indi, Ma nga tu gari mani o’biru ’diyi be oni ma dri mbili ’diyia, Lebanoni ma angu agaduari alia; ma nga pati izu marioru erini ’diyi ga va, azini pati erini masaru ’diyi indi; ma nga fi pari erini re turi ma alia, amvu erini oceru nyaka kapi turi ma alia.

²⁴Ma ga ’bile yini ’bo, ma mvu yi ndu ndu ’diyi ’bo, ma nga yi ara Misirini dria ’diyi anga ma pa agelesi.

²⁵Mi erini e’yo mani asisile mani ’bazu drio e’yo nderi ’yezuri ku ya? Engazu ndra drio ma otu ma asia e’yo mani ngale ’yele curu’dori, ’dini mi nga aku amboru okporu abi be kaliru ’diyi oja andruru.

²⁶E’yo ’disi ’ba alenia ’diyi ovu adazaru, yi ovu urisi tu, nini yi nga a’di ’yeri ku; yi ovu ase asearile, ekile ibiko ibirile, ekile ase engapi jo driarile, ekile anya ’wipi bibirurile.

²⁷Te ma ni riza mini pi efuza mini pie, fiza mini pie, adra okporu mini ma vuri pie.

²⁸Mini adra okporu ’bale ma vurisi, afu mini ma e’yoni ecale ma biliarisi, e’yo ’disi ma nga ewu mani so mi omvua, ma nga aya mani ’i mi tilia, ma nga mi oja geri mini efuzuriasi.

²⁹’Di nga ovu ecetaru mi dri: eli ’dorisi mi nga nyaka efupi i drisiri nya’i, eli irisi nyaka efupi nyaka nde ’diyi ma vutiari’i; te eli narisi emi ma ri ori, ma anya, ma sa nga zabibuni, ma nya efi yini ani.

³⁰Te ’ba jolokoru acepi yi papi suru Yudani ma eselia ’diyi, yi nga ola yini so va dika, yi nga vini efi ’ya uru indi.

³¹Te ’ba acepi ’diyi nga fu Yerusalemuasi, ’ba apapi ’diyi nga fu Zioniasi. Asi aciru Yehovani nga e’yo ’di ’yeni.

³²E’yo ’disi Yehova ’yo ’dini opi Asuriaari ma e’yosi, kini, Eri ngani si va aku ’doria ku, eri ngani vini ’ye gbi ’daa ku, ngani vini ca vunia gombere be ku, ngani nyaku oku apiferu ageinia ku.

³³Eri nga mvi geri nde erini muzurisi indi, te eri ngani fi aku ’dori ma alia ku, Yehova ’yo ’dini.

³⁴Te ma nga a’di ’di aku ’dori pazu, ma ma ngulupi ma e’yosi, azini ati’bo mani Daudi ma e’yosi indi.

³⁵Eri nga eca ’dini, ini nderisi malaika Yehovani efu, eri fu ’ba alifu turu alu kali aro drini towi pari ’ba Asuriaa ’diyini hema asozuri ma eselia; te ’ba ka enga o’bitisi, mi ne, ’ba nde ’diyi dria ovu avuru.

³⁶Te Senakeribu opi Asuriaari nga di enga dri kozu, mvizu ovuzu Nineyea.

³⁷Eri eca ’dini, erini inziria jo adrou erini Nisirokiniri ma alia, Adrameleki pi Sarezeri be yi riga eri fu seisi, nga apa angu Araratia. Te Esari-hadoni mvi erini nga opi nya eri ma pariani.