Read lugbara 2 Opi 20 Bible Online

2 Opi 20 - lugbara bible

2 Opi 20

¹Ewu nde ’disi, Hezekia nga ovu azoru tu, ogogo drazaru. Nabi Isaya Amozi mvi nga emu eri vu, ’yo eri tia, Yehova ’yo ’dini, kini, Mi azi e’yo jo mini ma alia ’diyi ngonde, a’disiku mi nga dra ra, mi rua ngani ati ku.

²Hezekia nga di mile erini oja abi ruaaleru, eri zi Yehova tia kini,

³Yehova la, ma matu ’ba mi vu, mi ma ega di e’yo mani acizu mi drilia e’yo adaru ma alia asi alusi, mani e’yo ovupi onyiru mi ma miliari ’yezu indiri. Te Hezekia wu okposi mindre be.

⁴Eri eca ’dini, de nga Isaya kuni aku ma esele agaduari ku, e’yo Yehovani eca eri vu ’yozu,

⁵Mi da dri vile, mi ’yo Hezekia ambo ’ba mani ’diyi dri cepiri ma tia kini, Yehova Mungu mi a’bi Daudiniri ’yo ’dini: Ma eri zita mini ’bo, ma ne vini mindre mini ’bo, mi ne, ma nga mi ati ra; drozi o’du narisi mi nga tu uru jo Yehovaniria indi.

⁶Ma nga mi dri eli fe mudri drini towi o’du mini ’diyi ma dria. Ma nga mi pa, aku ’dori be, opi Asuriaari ma driasi, ma nga a’di ’di aku ’dori pazu, ma ma ngulupi ma e’yosi, azini ati’bo mani Daudi ma e’yosi indi.

⁷Te Isaya nga ’yo kini, Emi ’du elioefi nguluru. Yi ma ’du yi, ma ’ba apipi milia, Hezekia ma rua ma ati ani.

⁸Hezekia nga di ’yo Isaya tia kini, E’yo ngori nga ovu ma dri ecetaru ecezu Yehovani nga ma rua ati azini ecezu ma nga tu uru jo Yehovaniria drozi o’du nasiri ya?

⁹Te Isaya ’yo kini, ’Di ovu eceta Yehovani fele mi dri ecezu eri nga e’yo erini azileri ’yeri: mi le endrilendri etuni ma mu drile pa ’baza otufe dria mudri, kani ma mvi vile pa ’baza mudri ya?

¹⁰Te Hezekia nga e’yo omvi kini, Endrilendri ka mu drile pa ’baza mudri, ’di ovuni e’yo ambo ku; yo, te endrilendri ma mvi vile pa ’baza mudri.

¹¹Te nabi Isaya wu Yehova vu; eri omvi endrilendri esipi va etusi ’bo pati Ahazini etu o’bizuri ma driari vile pa ’baza mudri ani.

¹²Ewu nderis Merodaki-baladani, Baladani mvi,opi Babuloniari, pe waraga ti feta be Hezekia vu; a’disiku eri eri Hezekia ovu ndra azoru.

¹³Te Hezekia eri e’yo yini, i eri ece yi dri jo afa lonyi aje amborusiri ma ta mbazuri dria, dahabu pie, mele pie, afa aji be arikariruri pie, odu aje ambosiri pie, jo afa ombaniri ma ta mbazuri pie, afa dria ovupi jo erini afa ta mbazuri ma alia ’diyi pie; afa jo erini ma aliari, kani opi nyaza eriniriari Hezekiani ecele yi dri kuni yo.

¹⁴Vutinia nabi Isaya emu opi Hezekia vu, ’yo eri tia kini, ’Ba ’diyi ’yo a’di e’yoni ya? Yi enga ngoa ya, ecazu mi vu ya? Te Hezekia ’yo kini, Yi enga angu izua, adaru Babulonia.

¹⁵Te eri ’yo, Yi ne a’di afani jo mini ma alia ya? Te Hezekia omvi e’yo kini, Yi ne afa dria ovupi jo mani ma alia ’diyi ’bo; afa aluni jo mani lonyi ta mbazu ’diyi ma alia mani ecele yi dri kuni yo.

¹⁶Te Isaya ’yo Hezekia tia, Mi eri e’yo Yehovani:

¹⁷Mi ne, o’duni nga eca, afa dria jo mini ma alia ’diyi, azini afa dria mi a’bipini tani mbale ecazu andru ’diyi, yi nga yi wu ji Babulonia; afa aluni ngani ace ku, Yehova ’yoni.

¹⁸Anzi mini efupi mi ruaa ’diyi, mini ngale tile ’diyi ma eselia, yi nga azini ’diyi wu ji ’dale; yi nga ovu ’ba nzele ranyaru ’diyi opi Babuloniari vile jo alia.

¹⁹Te Hezekia nga ’yo Isaya tia kini, E’yo Yehovani ’yole, mini ’yole ’bori ovu onyiru. Eri ’yo vini, Eri ma ovu ’dini ku ya? ka ’yo asi anzuru azini e’yo adaru nga ovu ewu manisi ci, ’yeke.

²⁰’Yeta azini Hezekiani ’yele ’diyi, okpo erini pie dria, e’yo erini ’bile yini gazu, azini geri yini razuri edele yini yi sezu razu aku amboru ma aliari pie, yi sini yi buku opi Yudaa ’diyi ma e’yo ecezuri ma alia ku ya?

²¹Te Hezekia la i a’bipi be; te Manase mvi erini nya opi eri ma pariani.