Read lugbara 2 Opi 21 Bible Online

2 Opi 21 - lugbara bible

2 Opi 21

¹Eli Manaseni ovu mudri drini iri erini e’dozu opi nyazurisi, eri nya opi eli kali towi drini towi Yerusalemua. Andri erini ma ru Hefiziba’i.

²Eri ’ye e’yo ovupi onzi Yehova ma miliari, ekile e’yo onzikanyaru ngule onzi suru Yehovani odrole anzi Israelini ’diyi ma driliasi ’diyini adrile ’yelerile.

³Te eri si pari uruleru i ati Hezekiani ezale ’diyi dika; eri si vini pari edeta edezu Baali dri ’diyi, eri ede vini Asera ekile Ahabu opi Israelinirini ndra ’yelerile, eri inzi ongulumu ’bua ’diyi dria, ’ye azita yini indi.

⁴Eri si vini pari edeta edezu ’diyi jo Yehovani ma alia, de isu Yehova ’yo ndra kini, Ma nga ru mani ’ba Yerusalemu ma alia.

⁵Eri si pari, nde edeta edezu ’diyi ongulumu ’bua ’diyi dri dria, jo Yehovani ma iriidri iri’diyia.

⁶Eri eve mva erini edetaru, eri ndri andri, eri ro olesi, eri osa i e’yo ’yezu ’ba orindi onzini ’diyi be, azini ’ba ojouru ’diyi be. Eri ’ye e’yo kakau ovupi onzi tu Yehova ma miliari adra erini engazu.

⁷Eri ’ba vini wura Aserani erini edele aya akapi acisiri, jo Yehovani e’yoni ’yole Daudi pi ma tia mvi erini Sulemani be kini, Jo ’dori ma alia, azini Yerusalemu mani pele suruti Israelini dria ma eseliari ma alia, ma nga ru mani ’ba ovuzu ’dani ’dani-ri ma alia;

⁸te ma ngani vini fe Israeli ma pa ma aba fuzu angu mani ndra fele yi a’bipi dririasi amve dika ku indi, yi ka nga asisile yini ’ba e’yo dria mani azile yi tia ’diyi pi ’yezu, azita dria ati’bo mani Musani azile ndra yi dri ’diyi be.

⁹Te yi erini ku; Manase ici yi onzi ’yezu aga suru Yehovani ndra dri jale Israeli anzi ma drilia ’diyini ’yeleri ra.

¹⁰Te Yehova ’yo e’yo ati’ba erini nabiru ’diyi ma tisi kini,

¹¹A’disiku Manase opi Yudaarini e’yo mani ngule onzi ’diyi ’yelerisi, azini erini e’yo ’yele onzi aga ’ba Amorini ovupi eri drilia oko ’diyini ’yeleri rarisi, erini fele vini Yudani e’yo onzi ’yele wura inzile erini ’diyisirisi;

¹²e’yo ’disi Yehova Mungu Israeliniri ’yo ’dini kini, Mi ne, ma nga candi eji Yerusalemu pi ma dria Yuda be ambo ’dipi, ’dini ’ba dria alu alu e’yo nderi eripiri ma bile iri tro nga ’ye yii yii.

¹³Ma nga baka Samarianiri se Yerusalemu ma dria, azini baka suru Ahabuni ’diyini afa o’bizurisi; ma nga Yerusalemu ma rua ini, ekile ’bani adrile saani inilerile, eri inizu ojazu tini opizu varile.

¹⁴Ma nga awuruso mani ma joloko acepiri o’be, nga yi fe juru yini dri, yi nga ofu afa ’bani obile obi ’diyiru, azini afa ’bani opale opa ’diyiru juru yini dri,

¹⁵a’disiku yini e’yo ovupi onzi na miliari ’yele, fezu adra mani ejizu, engazu o’du yi a’bipini efuzu Misiriasi ecazu kpere andrurisi.

¹⁶Te vini indi Manase oda ’ba ari kakau aka, cazu Yerusalemuni gazu tre engazu kala aluria cazu kala aziniria, e’yo onzi erini erini fele Yudani ’yele, ’dini yi ’ye e’yo ovupi onzi Yehova ma miliari ma dria.

¹⁷’Yeta azini Manaseni, e’yo erini ’yele ’diyi pie dria, azini e’yo onzi erini ’yeleri, yi sini yi buku opi Yudaa ’diyi ma e’yo ecezuri ma alia ku ya?

¹⁸Te Manase la i a’bipi be tualu, yi sa eri amvu jo eri ma ngulupini ma ageiaria, amvu Uzaniria; te mvi erini Amoni nya opi eri ma pariani.

¹⁹Eli Amonini ovu kali iri drini iri erini e’dozu opi nyazurisi, te eri nya opi eli iri Yerusalemua. Andri erini ma ru Mesulemeti, Haruzi Yotibaari ma zi’i.

²⁰Eri ’ye e’yo ovupi onzi Yehova ma miliari, ekile i ati Manaseni ’yelerile.

²¹Eri aci geri i atini acizuri ma aliasi dria, eri ’ye azi wura i atini azi ’yezu yi dri ’diyi dri, inzi yi indi;

²²eri ku Yehova Mungu i a’bipiniri, acini geri Yehovani ma alia ku.

²³Te ati’ba Amonini otu e’yo eri ruaa, fu opini jo eri ngulupini ma alia.

²⁴Te ’ba angu ndea ’diyi ofu ’ba dria e’yo otupi opi Amoni ma ruaa ’diyi ra, te ’ba angu ndea ’diyi ’ba Yosiani opiru eri ma paria’i.

²⁵’Yeta azini dria Amonini ’yele diyi, yi sini yi buku opi Yudaa ’diyi ma e’yo ecezuri ma alia ku ya?

²⁶Yi sa eri ’bile eri ngulupini amvu Uzaniri ma aliari ma alia; te mvi erini Yosia nya opi eri ma pariani.