Read lugbara 2 Opi 22 Bible Online

2 Opi 22 - lugbara bible

2 Opi 22

¹Eli Yosiani ovu aro erini e’dozu opi nyazurisi, eri nya opi Yerusalemua eli kali na. Andri erini ma ru Yedida, Adaya Bozikatiari ma zi’i.

²Eri ’ye e’yo onyiru Yehova ma miliari, eri aci geri dria i a’bi Daudini acizu aleniari ma alia, ojani i kalaa dri ndia kani dri ejia ku.

³Eri eca ’dini eli mudri drini aro Yosiani opi nyazurisi, opi pe Safani Azalia Mesulamu mvi ma mvi, ’ba e’yo sipiri ma ti jo Yehovania ’yozu, kini,

⁴Mi tu uru kuhani ambo Hilikia vu, ’dini eri ma la silingi ’bani jile jo Yehovania, ’ba pari ’bani fizuri agei tepi ’diyini okule ’ba nde ’diyi vuri;

⁵onyiru yi ma fe eri ’ba azi ngapi jo Yehovania ’diyi ma drilia ’diyi dri; yi ma fe ’ba azi ngapi jo Yehovania ’diyi dri, yi ma ede pari depi jo ruaa ’diyi ani.

⁶Adaru yi ma fe onduou mbau fapi ’diyi pi ma dria ’ba jo onduouru ’diyi pie, ’ba biriki ’bapi ’diyi pie, mbau pi jezu oni gale ’diyi be, deza jo ma ruaa ’diyi edezu ani.

⁷Indi vini yi ozini yi silingi ’bani fele yi dri ’diyi ma e’yosi ku, a’disiku yini ’yele kililirurisi.

⁸Te kuhani ambo Hilikia nga ’yo Safani ’ba e’yo sipiri ma tia kini, Ma isu buku azitaniri jo Yehovani ma alia. Te Hilikia nga buku nderi fe Safani dri, eri la eri ra.

⁹Te Safani ’ba e’yo sipiri nga mvi opi vu, nga e’yo omvi opi tia kini, Ati’ba mini wu silingi ovupi jo alia ’diyi, yi fe yi ’ba ’ba azi ngapi jo Yehovani ma alia ’diyi ma drilia ’diyi dri.

¹⁰Safani ’ba e’yo sipiri olu vini opi tia kini, Kuhani Hilikia fe ma dri buku ra. Te Safani la buku nderi opi ma drilia.

¹¹Eri eca ’dini, opi ka e’yo buku azitaniri alia ’diyi eri ra, eri osi bongo ini.

¹²Te opi nga di azita fe kuhani Hilikia pi dri, Ahikamu Safani mvi pie, Akibori Mikaya mvi pie, Safani ’ba e’yo sipiri pie, Asaya ati’bo opiniri pie, ’yozu kini,

¹³Emi mu, emi zi Yehova tia ma dri, azini ’ba nde ’diyi dri, azini ’ba dria Yudaa ’diyi dri, e’yo ovupi buku yini isule ’diri ma alia ’diyi ma e’yosi; a’disiku adra Yehovani di ambo ama vu, a’bipi amani ’diyini e’yo dria ovupi buku ’dori ma alia ’diyi erile ku, e’yo ovupi sizaru ama ma e’yosi ’diyi ’yezu ku indirisi.

¹⁴’Dini kuhani Hilikia pi mu nabi okuru Hulida vu, Ahikamu pie, Akibori pie, Safani pie, Asaya pie. Eri ovu oku Salumu ’ba bongo suza ma ta mbapi, Tikiva Harihasi mvi ma mviniri (eri adri Yerusalemu ma esele iriri ma alia); te yi ’yo e’yo eri be.

¹⁵Eri ’yo yi tia kini, Yehova Mungu Israeliniri ’yo ’dini, Emi ’yo agu emi ti pepi ma vuri ma tia,

¹⁶Yehova ’yo ’dini, Mi ne, ma nga candi eji pari ’do ma dria ’ba alenia ’diyi be, adaru e’yo dria ovupi buku opi Yudaarini laleri ma alia ’diyi.

¹⁷A’disiku yini ma kulerisi, yini obiese vele Mungu azini ’diyi dri, ’dini adra mani engazu azi dria yini ’yele dri yinisirisi, e’yo ’disi adra mani nga di okporu pari ’doria, e’yo aluni ngani eri inyu ku.

¹⁸Te emi ma ’yo opi Yudaa emi ti pepi Yehovani zizuri ma tia ’dini kini, Yehova Mungu Israeliniri ’yo ’dini: E’yo mini erile ’diyi ma e’yosi,

¹⁹etu ndra mini e’yo mani ’yole angu ’dori vu ’ba alenia ’diyi be, kini eri nga eca andruru azini trizaruri erizurisi, asi minini ovule ewu ndesi menemenerurisi, mini mi ’bale va Yehova drilia, mini mi bongo osile, wuta wule mindresi ma driliarisi; ma eri mi alu ora, Yehova ’yoni.

²⁰E’yo ’disi mi ne, ma nga mi oku tualu mi a’bipi be, mi nga mu ’bile minia asi anzurusi, mile mini ngani candi mani ngale jile pari ’ dori ma driari ndre ku indio. Te vi omvi e’vo oni vu dika.