Read lugbara 2 Opi 23 Bible Online

2 Opi 23 - lugbara bible

2 Opi 23

¹Te opi nga di ’ba tipe, yi oku ’ba ’wara Yudaa ’diyi dria eri vu, ’ba ’wara Yerusalemua ’diyi be.

²Opi tu uru jo Yehovaniria, ’ba dria Yudaa ’diyi pie, ’ba Yerusalemua ’diyi pie, ’ba kuhaniru ’diyi pie, ’ba nabiru ’diyi pie, ’ba dria, were ’diyi be, ambo ’diyi be; eri la yi bilia e’yo dria ovupi buku azizani yini isule jo Yehovani ma aliari ma alia ’diyi ra.

³Te opi so pa pati i’diza vu, eri azi aziza Yehova drilia, acizu Yehova vutia azita erini pi ma ta mbazu, e’yo eti nzeza erini ’diyi pie, e’yo erini azile ’diyi pie asi driasi azini orindi driasi, e’yo azizani ovupi sizaru buku nderi ma alia ’diyi edrezu; te ’ba dria yi so pa yi ecizu aziza nderi ma alia.

⁴Te opi fe azita kuhani ambo Hilikia pi dri kuhani ovupi esele iriri ma alia ’diyi pie, ’ba pari ’bani fizuri ma agei tepi ’diyi pie, afa dria edele Baali pi dri, Asera pie, ongulumu ’bua ’diyi pieri ofuzu hekalu Yehovaniasi amve; eri eve yi Yerusalemu ma tia amve, angu Yi Kidroniari ma ria, omvu of uta yini ji Betelia.

⁵Eri onze kuhani wura tokoni opi Yudaa ’diyini o’bale obiese vezu pari uruleru aku Yudaa ’diyia, azini Yerusalemu ageia ’diyia ’diyi raj onze vini indi ’ba obiese vepi Baali pi dri, etu pie, mba pie, ’bi’bio amboru pie, ongulumu ’bua ’diyi pie ’diyi.

⁶Eri ofu vini Aserani Yehova ma joa, Yerusalemuasi amve yi ara Kidronia, eve eri yi ara Kidroni ma tia, odi eri ecazu furaru, ayi eri ’ba saaru ma nyadria,

⁷Eri asu jo agupi ali o’bapi agupi azinisi ’diyini ovupi jo Yehovani ma alia ’diyi va, pari okuni adrizu bongo cazu o’izu Asera dri ’diyi.

⁸Eri ofu kuhani dria aku Yudaa ’diyiasi, eri eza vini pari uruleru kuhanini obiese vezu, engazu Gebaa cazu Beeri-sebaa ’diyi; eri onyo vini pari uruleru kalitilia, ovupi pari ’bani fizu kalitile Yosua ambo aku ndeariniria, ovupi dri ejia kalitile ’bani fizu aku ndea ’diyi, asu yi va.

⁹Te kuhani pari uruleru ’diyia ’diyi tuni pari edeta edezu Yehovani Yerusalemuaria ku, te yi nya mikate akufi kokoruri yi adripi eselia.

¹⁰Eri eza vini Tofetini ovupi e’bu Hinomu anzipiniri ma aliari, ’dini ’ba aluni econi agupimva kani zamva erini vezaru edetaru Moleki dri ku.

¹¹Eri onze akanya opi Yudaa ’diyini opele ovuzu etuni ’diyi, yi ovu pari ’bani fizu jo Yehovaniaria, Natani-meleki ’ba jo driliari ma jo ovupi opi vile jo vu ogogori ma ageia; eri eve vini gari opele etu dri ’diyi acisi.

¹²Te pari edeta edezu ovupi jo uruleru Ahaziniri ma dria, opi Yudaa’diyini edele ’diyi, azini pari edeta edezu Manaseni edele iriidri iri jo Yehovania ’diyi ma alia ’diyi, opi asu yi va, onyo yi nyingiriki, omvu ofuta yini, ji oda yi Kidroni alia.

¹³Te pari uruleru Yerusalemu ma kalaa etuni efurialeruria, ovupi oni ezataniri ma kala uruleruria, Sulemani opi Israelinirini edele Asitoreti adrou onzikanyaru ’ba Sidonia ’diyiniri pi dri, Kemosi adrou onzikanyaru Moabuniri pie, Milikomu adrou onzikanyaru Amoni anziniri pie, opi eza yi ra.

¹⁴Eri onyo vini afa i’dile inzizaru ’diyi nyingiriki, eri oli Aserani va, fe pari yini ga tre ’ba avu falasi.

¹⁵Te pari uruleru Beteliari, azini pari uruleru Yeroboamu Nebati mvi fepi ndra Israelini e’yo onzi ’yezurini edeleri, eri asu pari edeta edezu nderi pi va pari uruleru be; eri ve pari uruleru nderi, odi onini furaru, ve Aserani indi.

¹⁶Te Yosia ka i oja, eri ne nyadri ovupi oni nde ma dri mbiliria ’diyi; eri pe ’ba ti fala nyadri alia ’diyi onzezu, ve yi pari edeta edezuri ma dria, eri eza eri, ekile e’yo Yehovani, ’ba Munguni ndra e’yo ’diyi olupirini olulerile.

¹⁷’Di ma vutia eri ’yo, Oni sile nyadriru mani nele ’dari ovu a’dini ya? ’Ba aku ndeni ’diyi ’yo eri tia kini, Eri ovu nyadri ’ba Mungunirini, eri’i engapi Yudaa, ndra e’yo mini te ’yele pari edeta edezu Beteliari vu ’diyi olupiri’i.

¹⁸Eri ’yo, Emi ku eri; ’ba aluni ma nze fala erini ku. E’yo ’disi yi ku fala erini, fala nabi engapi Samariaarini be.

¹⁹Pari uruleru aku Samariaa ’diyia, opi Israelini edele ndra adra Yehovani engazu ’diyi, Yosia onze jo pari ndea ’diyi dria, eri ’ye yi vu trotro ekile erini ’yele Beteliarile.

²⁰Eri ofu kuhani ovupi pari urulerua ’dale ’diyi dria pari edeta edezu ’diyi ma dria, eri eve fala ’bani yi ma dria. ’Di ma vutia eri mvi Yerusalemua.

²¹Te opi nga azi ’ba dria tia kini, Emi ma mba omu agaza ’badrilesiri ma ta Yehova Mungu eminiri dri, ekile e’yo ovupi sizaru buku azizaniri ma aliarile,

²²Adaru omu agaza ’ba drilesiri ovuni ta mbazaru ’dinile ku engazu ’ba e’yo lipi Israeli dri ’diyi ma ewusi, kani ewu opi Israelini ’diyi pini opi Yudaa ’diyi be ’diyisi dria;

²³te yi mba omu agaza ’ba drilesi ’dori ma ta Yerusalemua eli mudri drini aro Yosiani opi nyazurisi.

²⁴Indi vini Yosia onze ’ba oleouru ’diyi pi ’ba ojouru ’diyi be, wura terafiniruri pie, wura toko inzile ’diyi pie, afa onzikanyaru isule angu Yudani ma alia angu Yerusalemuni beria ’diyi dria, ’dini eri ma edre e’yo ovupi sizaru buku kuhani Hilikiani isule jo Yehovaniari ma alia ’diyi.

²⁵Eri drilia opi azini erile, i ojapi Yehova vu asi driasi azini orindi driasi azini okpo driasi, ekile azita Musani ’yolerileri aluniyo; eri ma vutia opi aluni erileni efuni ku indi.

²⁶Te ti, Yehova oi ani i adra okporu i olipi nzanza dipi Yuda vu, Manaseni e’yo onzi ’yele adra erini engazurisiri kuzu ku.

²⁷Te Yehova ’yo kini, Ma nga Yudani nze ma miliasi ekile mani Israelini nzele ’borile, ma nga vini aku Yerusalemu mani pele ’dori pi o’be, jo mani ’yole ndra eri ma e’yosi kini, Ru manini nga ovu ’daa-ri be.

²⁸’Yeta azini dria Yosiani, e’yo erini ’yele ’diyi pie dria, yi sini yi buku opi Yudaa ’diyi ma e’yo ecezuri ma alia ku ya?

²⁹O’du erini ma eselia Farau-neko opi Misiriari mu uru yi ara Ufiratea a’di ’dizu opi Asuriaari be. Opi Yosia mu a’di ’dizu eri be; te Farau-neko ka eri ne ra, eri fu eri Megidoa ra.

³⁰Ati’ba erini ji avu erini gari alia, engazu Megidoa cazu Yerusalemua, yi sa eri ’bile eri ngulupini ma alia. Te ’ba angu ndea ’diyi ’du Yehoahazi Yosia mvini, osu odu drinia, ’ba eri opiru ati ma paria.

³¹Yehoahazi ovu eli he kali iri drini na erini e’dozu opi nyazurisi, eri nya opi mba na Yerusalemua. Andri erini ma ru Hamutali, Yeremia Libinaari ma zi’i.

³²Eri ’ye e’yo ovupi onzi Yehova miliari, tro tro a’bipi erini ’diyini ’yele driarile,

³³Te Farau-neko nga eri ’i aruru Ribila angu Hamatiaria, eri ma nya ani opi Yerusalemua ku beni, azini eri li angu nderi dria onzi dahabuni fezu turu alu, onzi alu meleni be.

³⁴Te Farau-neko ’ba Eliakimu Yosia mvini opiru eri ati Yosia ma paria, eri oja vini ru erini ovuzu Yehoyakimu’i. Te eri ji Yehoahazini ’daa; eri ca Misiria, dra ’daa.

³⁵Te Yehoyakimu fe dahabu nde pi Farau dri mele nde be; te eri li silingi ’ba angu ndea ’diyi ma dria, fezu ekile azita Farauni azilerile. Eri ’du dahabu pi mele be ’ba angu ndea ’diyi ma dria alu alu ekile lile alu alu yi driarile, eri fezu Farau-neko dri beni.

³⁶Eli Yehoyakimuni ovu kali iri drini towi erini e’dozu opi nyazurisi, te eri nya opi eli mudri drini alu Yerusalemua, Andri erini ma ru Zebida, Pedaya Rumaari zi’i.

³⁷Eri ’ye e’yo ovupi onzi Yehova ma miliari, ekile i a’bipini ’yele driarile.