Read lugbara 2 Opi 24 Bible Online

2 Opi 24 - lugbara bible

2 Opi 24

¹Ewu erinisi Nebukadineza emu uru, azini Yehoyakimu eca ati’bo eriniriru ovuzu ’dini eli na; ’di ma vutia eri oja i, mbu eri ma ruaasi amve.

²Te Yehova pe asikari ongulumuru ’ba Kalidea ’diyini pi ma ti a’di ’dizu eri be, asikari ongulumuru ’ba Suriaa ’diyini pie, asikari ongulumuru ’ba Moabua ’diyini pie, asikari ongulumuru Amoni anzini ’diyi pie, eri pe yi ti Yudaa eri dri Jazu, ekile e’yo Yehovani erini ’yole ati’ba erini nabiru ’diyi ma tisirile.

³Adaru e’yo nderi eca Yuda ma dria azita Yehovani azileri ma e’yosi, yi nzezu eri ma miliasi, e’yo onzi Manasenisi, dria ekile erini ’yelerile,

⁴indi vini erini ari adale e’yo kokoru akarisi; a’disiku eri ga Yerusalemuni tre ari ’ba e’yo koko ’diyinisi, te Yehova leni i e’yo onzi erini wuzu ku.

⁵’Yeta azini Yehoyakimuni, e’yo erini ’yele ’diyi pie dria, yi sini yi buku opi yudaa ’diyi-me’eyo ecezuri ma alia ku ya?

⁶Yehoyakimu la i a’bipi be, te mvi erini Yehoyakini nya opi eri ma pariani.

⁷Te opi Misiriari funi dika angu eriniasi ku, a’disiku opi Babuloniari o’du angu opi Misiriarini engazu Yi Misiriaria cazu kpere yi ara Ufiratea dria.

⁸Eli Yehoyakinini ovu mudri drini aro erini e’dozu opi nyazurisi, eri nya opi mba na Yerusalemua. Andri erini ma ru Nehusita, Elinatani Yerusalemuaari zi’i.

⁹Te eri ’ye e’yo ovupi onzi Yehova ma miliari, ekile dria atini ’yelerile.

¹⁰Ewu nderisi ati’ba Nebukadineza opi Babuloniarini ’diyi etu uru Yerusalemua, ace eri ombasi kuru.

¹¹Te Nebukadineza nga eca aku nderia, ati’ba erini ’diyini eri acezu ombasiria;

¹²te Yehoyakini opi Yudaari eri ngulupi pi nga efu opi Babuloniari vu, andri erini pie, ati’ba erini ’diyi pie, opi erini ’diyi pie, ’ba amboru erini ’diyi pie. Te opi Babuloniari ’du eri aruru eli aro eru opi nyazurisi.

¹³Eri wu lonyi dria jo Yehovani ma alia ’diyi pi, lonyi opi ma jo alia ’diyi be, eri oli afazu meleni Sulemani opi Israelinirini edele hekalu Yehovani ma alia ’diyi dria ekile Yehovani ’yolerile.

¹⁴Eri ’du Yerusalemuni dria, ’ba opiru ’diyi pie dria, ’ba ombaru ’diyi pie dria, adaru ’ba ati’baru alifu mudri ’diyi pie, onduou ’diyi pie dria, ’ba oka dipi ’diyi pie dria, aluni aceni ku pe kiri ’ba toko tokoa angu nde alia ’diyi.

¹⁵Eri ’du Yehoya-kinini ji Babulonia; te opi ma andri pi, oku opini ’diyi pie, ’ba amboru erini ’diyi pie, ’ba opiru angu ndea ’diyi pie, eri o’du yi Yerusalemuasi jizu Babulonia ati’baru.

¹⁶Te agupi dria okporu ’diyi, yi ’ba alifu aziri, onduouru ’diyi ’ba oka dipi ’diyi be yi alifu alu, yi ’ba dria okporu ecopi a’di ’dipi ’diyi, opi Babuloniari eji ’ba nde ’diyi Babulonia ovuzu ati’baru.

¹⁷Te opi Babuloniari ’ba Yehoyakini ati ma adri Mataniani opiru eri ma paria, eri oja ru erini Zedekia’i.

¹⁸Eli Zedekiani ovu kali iri drini alu erini e’dozu opi nyazurisi, eri nya opi eli mudri drini alu Yerusalemua. Andri erini ma ru Hamutali, Yeremia Libinaari zi’i.

¹⁹Eri ’ye e’yo ovupi onzi Yehova ma miliari, ekile e’yo dria Yehoyakimuni ’yelerile.

²⁰Adra Yehovanisi eri eca ’dini Yerusalemu pi ma alia Yuda be, ecazu Yehovani yi ’bezu i miliasiria.