Read lugbara 2 Opi 3 Bible Online

2 Opi 3 - lugbara bible

2 Opi 3

¹Yehoramu Ahabu mvi e’do opi nyazu Israeli ma drilia Samariaa, eli mudri drini aro Yehosafati opi Yudanirini opi nyazurisi, eri nya opi eli mudri drini iri.

²Eri ’ye e’yo ovupi onzi Yehova ma miliari, te trotro ekile i ati pini ’yele andri berile ku, a’disiku eri nze pati Baalini i atini i’dile inzizaruri.

³Te eri ebi i e’yo onzi Yeroboamu Nebati mvini ’yele erini fele Israeli ma ’ye ’diyi be; eri kuni yi ku.

⁴Te Mesa opi Moabuari ovu kabilo kakau ma eri’i; eri fe opi Israelini dri kabiloanzi alifu turu alu ’ ma ’biko, azini kabiloago alifu turu alu ma ’biko indi.

⁵Eri nga eca dini, Ahabu ka dra ra, opi Moabuari nga mbu opi Israeliniri ma ruaasi amve,

⁶Ewu nderisi opi Yehoramu nga fu Samariaasi, eri oku Israeli dria.

⁷Eri mu, eri pe ’ba ti Yeho-i safati opi Yudaari vu kini, Opi Moabuari mbu ma ruaasi ’bo; mi nga mu ma be tualu a’di ’dizu Moabu be ra ya? Kini, E, ma nga mu ra; ma ovu ekile mile, ’ba mani ovu ekile ’ba minile indi, azini akanya mani ovu ekile akanya minile indi.

⁸Eri ’yo vini, Ama nga mu geri ngorisi ya? Yehoramu omvi e’yo kini, Geri angu roko Edomuariasi.

⁹’Dini opi Israelini pi mu opi Yudaari pie, opi Edomuari pie. Yi ka aci kalaasi o’du aziri ’bo, yi mvuza asikari ongulumuru ’diyi pi dri anyapa yi ma vuti bipi ’diyi be yo.

¹⁰Te opi Israeliniri ’yo ra, Eyawaye! Yehova omve opi na ’diyi yi fezu Moabu dri.

¹¹Te Yehosafati ’yo kini, Nabi Yehovani ’doa aluni yo ya, ’dini amani ecozu e’yo zizu Yehova vu eri ma tia? ’Ba alu ati’ba opi Israelinirini ’diyi ma eselia omvi e’yo kini, Elisa Safati mvini, ndra yi osupi Eliya ma driari’i ’doa.

¹²Yehosafati nga di ’yo, E’yo Yehovani ovu eri be. Te opi Israelini pi si va eri yu, Yehosafati pie, opi Edomuari pie.

¹³Te Elisa nga ’yo opi Israeliniri ma tia, kini, E’yo ama eselia mi be ngoni ya? Mi mu nabi mi ati pini mi andri be ’diyi vu. Te opi Israeliniri nga omvi kini, Yo; eri ovu Yehova opi na ’diyi okupi fezu Moabu driri’i.

¹⁴Elisa nga ’yo, Ekile Yehova asikari ongulumuruni mani pa sozu eri driliarini ovule indirile, ma ka te Yehosafati opi Yudaari ru ku, te’do ma luni mi ku, ma neni mi ku indi.

¹⁵Te curu’do mi eji ma vu ’ba o’di copiri, Eri nga eca ’dini, agu ndeni o’di coria, dri Yehovani nga eca eri ma dria.

¹⁶Eri nga di ’yo, Yehova ’yo ’dini, Emi osi ’bile kakau e’bu ’diri ma alia.

¹⁷A’disiku Yehova ’yo ’dini, Emi ngani oli pi ne ozoo be ku, te e’bu nderi nga ga tre yisi, emi nga mvu, ti emini be, anyapa emini be ani.

¹⁸Te e’yo ’di ovu Yehova ma milia e’yo wereni; eri nga vini ’ba Moabua ’diyi fe emi dria.

¹⁹Emi nga aku abi kali be okporu eza dria, aku dria onyiru tu ’diyi be, emi nga pati onyiru ’diyi ga dria, emi nga yi a’di ase dria, nga vini angu onyiru ’diyi dria eza onisi.

²⁰Eri nga eca dini o’bitisi, ekile etu edeta edezurisi, mi ne, yi efu geri engazu Edomualerurisi, te angu nde ga tre yisi ani.

²¹’Ba Moabua ’diyi dria ka eri ra kini, opi nde ’diyi emu a’di ’dizu yi be, ’ba dria ecopi eli be gombere ombani supi ’diyi, azini eli agapi ra ’diyi be, yi oku yi pa sozu lokiria.

²²Te yi nga enga o’biti kula kula, etu nga efu yi milia dizu yi dria, ’ba Moabua ’diyi nga yi nderi ndre yi drilia ekaru ekile arile.

²³Yi nga ’yo ra, ’Di arini; adaru opi ’diyi ’di a’di yi ma eselia, yi o’di yi yi eselia indi. Ka’dini curu’do, Moabu, ama nzu di afa yini opazu!

²⁴Te yi ka eca pari Israelini hema asozuria, ’ba Israelini ’diyi enga ’ba Moabua ’diyi cozu, ’dini yi nga apa yi drilia ani; yi aga muzu drile angu eseliasi ’ba Moabua ’diyi cozu ’dani.

²⁵Yi asu aku va, ’ba dria alu alu yi o’be oni nyaku onyiru dria ma alia gazu tre; yi ase yi a’di dria, yi ga pati onyiru ’diyi dria, yi ku Kiri-haresetia kiri oni a’dule, te ’ba oni o’bepi bakasi ’diyi ace eri kuru eri o’bezu onisini.

²⁶Opi Moabuari ka ne a’di ’diza aga eri ra, eri ’du ’ba omba ’bapi seisi turu aziri ’diyi o’bizu fizu yi eselesi opi Edomuari vu; te econi ku.

²⁷Eri nga di mvi ini osipi oko ndra opi nyapiri’i ’du, eri fe eri edeta vezaru abi kaliru dria. Te adra amboru di Israeli vu; yi nga opi nde ku ra, yi mvi angu yi ngulupinia.