Read lugbara 1 Suru Ma E'yo 10 Bible Online

1 Suru Ma E'yo 10 - lugbara bible

1 Suru Ma E'yo 10

¹Te ’ba Filisitiaa ’diyi ’di a’di ’ba Israelini be; ’ba Israelini apa ’ba Filisitiaa ’diyi dri ra, o’de odra oni Giliboaa ra.

²’Ba Filisitiaa ’diyi dro Saulo pi ma vuti anzipi be okposi; ’ba Filisitia ’diyi ofu Yonatani pi, Abinadabu pie, Malikisua pie, anzi Saulo vile ’diyi.

³Omba nderi eca Saulo ma ruaa onzikanyaru tu, ’ba osu gbipi ’diyi isu eri ra; eri ma asi oti ’ba osu gbipi ’diyi ma e’yosi tu.

⁴Saulo nga di ’yo ’ba gombere ombani eriniri ’dupiri ma tia kini, Mi enze sei mini, mi ma so ma ani, ’ba agele liza kokoru ’diyi kazu emuzu ma inzazu ku. Te ’ba gombere ombani erini ’dupiri leni ku, erini ovule uri be turisi. Ka’dini Saulo nze di i ma sei ra, ’be sinia.

⁵’Ba gombere ombani Saulo vileri ’dupiri ka ndre Saulo dra ’bo, nze vini sei i vileri ’dinile, ’be i sinia, dra ra.

⁶’Dini Saulo pi odra, anzi be na tro; ’ba eri vile joa ’diyi odra dria eri be tualu.

⁷’Ba Israelini dria ovupi e’bu alia ’diyi ka ndre yi apa ra ’dini, azini Saulo pi anzi erini be odra ’bo, yi ku aku amboru yiniri ra, apa ra; ’ba Filisitiaa ’diyi emu di adri ’ba nde ’diyi ma pariani.

⁸Dru ’dini, ’ba Filisitiaa ’diyiru emuria ’ba yini ofule ’diyi ma bongo otruria, yi isu Saulo pi ma avu o’de anzipi be oni Giliboa ma dria.

⁹Yi otru afa suza erini, yi ’du eri ma dri, afa ombani erini be, yi pe ’ba ma ti angu Filisitiaria kala vusi dria, e’yoni ojizu wura inzile inzi yini edele ’diyi vu, azini ’ba ’dale ’diyi vu, le’yoni ekuzu.

¹⁰Yi nga di afa eri vile ombani ’diyi o’ba adrou yini ’diyi ma joa, epa eri ma dri Dagoni vile joa.

¹¹Te ’ba dria Yabesi-gileadia diyi ka e’yo dria ’ba Filisitiaa ’diyini ’yele Saulo ma ruaa ’diyi ma e’yo eri ’bo,

¹²’ba asi teza be ’diyi enga dria ra, yi o’du Saulo pi ma avu anzipi be, cii yi Yabesia, sa fala yini kumara pati Yabesiari ma etia, nyani nyaka o’du aziri ku.

¹³’Dini Saulo dra azi onzi erini ’yele Yehova vurisi, a’disiku erini e’yo Yehovani ma ta mbale kurisi, azini vini erini e’yo amaza ndale ’ba orindi onzi beri ma tia e’yo zizu tiniarisi indi,

¹⁴azini erini Yehovani zile’i kurisi; eri fu eri ani, oja suru fezu Daudi Yese mvi dri.