Read lugbara 1 Suru Ma E'yo 14 Bible Online

1 Suru Ma E'yo 14 - lugbara bible

1 Suru Ma E'yo 14

¹Hiramu opi Turoari pe ojio ma ti Daudi vu, mario pati pie, onduou jo sipi ’diyi pie, onduou mbau edepi ’diyi pie, jo sizu erini.

²Daudi ni di kini Yehova ’ba i ovuzu opiru Israeli ma driliani, a’disiku suru erinirini ovule ’bazaru amboru uru ’ba erini Israelini ’diyi ma e’yosirisi.

³Daudi je oku azini yi Yerusalemua dika, eri oti agupianzi ezoanzi ’be dika.

⁴Anzi nde erini otile de eri Yerusalemua ’diyi yi ’di: Samua pi, Sobabu pi, Natani pi, Sulemani pi,

⁵Ibihari pi, Elisua pi, Elipeleti pi,

⁶Noga pi, Nefegi pi, Yafia pi,

⁷Elisama pi, Beeliada pi, Elifeleti pie dria.

⁸Te ’ba Filisitiaa ’diyi ka eri kini ’ba osu odu Daudi ma dria eri ’bazu opiru ’ba Israelini dria ma drilia ’bo, ’ba Filisitiaa ’diyi dria tu uru Daudini ndruzu; Daudi eri e’yo ’di ra, fu a’di ’dizu yi be ani.

⁹De isu ’ba Filisitiaa ’diyi yi emu fi a’di ’dizu e’bu Refaimunia ’bo.

¹⁰Daudi nga zi Mungu tia, kini, Ma nga tu uru muzu omba ’bazu ’ba Filisitiaa ’diyi be ra ya? Mi nga yi fe ma dria ra ya? Yehova ’yo eri ma tia kini, Mi tu uu; te ma nga yi fe mi dri ra.

¹¹’Dinile yi etu uru Baali-perazimua, Daudi nga yi o’di ’daa; Daudi nga di ’yo ani kini, Mungu onyo ari’ba mani ma drisi ekile yi razani angu anyolerile ’bo. E’yo ’disi yi omve di ani angu ’da ma ru Baali-perazimu.

¹²Te yi ku adrou yini ’diyi ’daa; Daudi azi e’yoni ani, yi eve yi acisi ra.

¹³’Ba Filisitiaa ’diyi fi vini a’di ’dizu e’bu alia dika.

¹⁴Daudi zi Mungu tia dika; Mungu ’yo eri ma tia, Mi ngani tu yi ma vusi uru ’dale ku; mi ja mi yi ma kalaasi, mi mu yi vu isisi pati ma drilialeru.

¹⁵Te eri nga ovu ’dini, mi ka ididi acizuri eri isisi pati sia ra, mi ma fu di a’di ’dizu yi be; Munguni mule mi drilia asikari ongulumuru Filisitiaa ’diyi ofuzurisi.

¹⁶Daudi ’ye ekile Munguni azile eri ma tiarile; yi o’di asikari ongulumuru ’ba Filisitiaa ’diyini engazu Gibeonia kpere Gezeria.

¹⁷Daudi ma ru nga di ku ani angu dria ma alia, azini Yehova fe eri ma uri fi suru dria ma dria.