Read lugbara 1 Suru Ma E'yo 15 Bible Online

1 Suru Ma E'yo 15 - lugbara bible

1 Suru Ma E'yo 15

¹Daudi si jo ndu ndu i dri aku amboru Daudini ma alia; ede vini pari sanduku Munguni dri, aso hema eri dri indi.

²Daudi ’yo di ani kini, ’Ba aluni ma ’du sanduku nde Munguniri ku te kiri ’ba Levini a’dule, Yehovani yi opele sanduku ini o’duzu azini azi ngazu i dri ’dani ’danirisi.

³Daudi oku ’ba Israelini dria Yerusalemua sanduku Yehovani ejizu i pari erini edele eri driria.

⁴Te Daudi nga Aroni anzipi piyi oku ’ba Levini be dria tualu:

⁵engazu anzi Kohatini ma eseiia, Urieli ’ba yi dri cepiri pi adripi erini ’diyi be turu alu drini kali iri;

⁶engazu anzi Merarini ma eselia, Asaya ’ba yi dri cepiri pi adripi erini diyi be turu iri drini kali iri;

⁷engazu anzi Gerisomuni ma eselia, Yoeli ’ba yi dri cepiri pi adripi erini ’diyi be turu alu drini kali na;

⁸engazu anzi Elizafanini ma eselia, Semaya ’ba yi dri cepiri pi adripi erini ’diyi be turu iri;

⁹engazu anzi Hebironini ma eselia, Elieli ’ba yi dri cepiri pi adripi erini ’diyi be kali aro;

¹⁰engazu anzi Uzielini ma eselia, Aminadabu ’ba yi dri cepiri pi adripi erini ’diyi be turu alu drini mudri drini iri.

¹¹Daudi omve atalau edeta edepi ’diyi Zadoki pi Abiatari be, azini ’ba Levini Urieli pi, Asaya pie, Yoeli pie, Semaya pie, Elieli pie, Aminadabu pie dria,

¹²’yo yi ma tia, Emi ’ba ’wara ori’ba ’ba Levini ma a’bipini ma drilia ’diyi; emi ’ba emi alatararu emi adripi be, emi ma eji ani sanduku Yehova Mungu Israelinirini pari mani edele eri driri ma alia beni.

¹³Emini ndra eri ejile okorisi kurisi, Yehova Mungu amaniri anyo ani ama rugbu ’di, amani eri ndale azita vusi kurisi.

¹⁴Ka’dini atalau edeta edepi ’diyi ’ba Levini pie ede yi alatararu sanduku Yehovani ejizu, eri’i Mungu Israeliniri’i.

¹⁵Anzi Levini nga di sanduku Munguni ’du yi ma gbudria pati erini ’diyisi, ekile Musani azile e’yo Yehovani ’yo1eri vusirile.

¹⁶Daudi nga ’yo ’ba ’wara ’ba Levini ma dri cepi ’diyi ma tia adripi yini ongo ngopi ’diyi azizu afa yini ongo ngozu ’diyi be, afa zaburi ngozuri pi, o’di pie, aya cole cori pie, yi ma otre o’dukosi uru azini yi ma enga o’duko yini uru ayikosi ani.

¹⁷E’yo ’disi ’ba Levini yi pe Hemani Yoeli mvi pi; azini adripi erini ma eselia Asafu Berekia mvi pie; azini adripi yini ma eselia anzi Merarini Etani Kusaya mvi pie;

¹⁸te ’ba ’diyi be tualu yi pe adripi yini tindi iriri Zekaria pi, Beni pie, Yaazieli pie, Semiramoti pie, Yehieli pie, Uri pie, Eliabu pie, Benaya pie, Maaseya pie, Matitia pie, Elifelehu pie, Mikineya pie dria, azini Obedi-edomu pi Yeyeli be, ’ba jotile agei tepi ’diyi.

¹⁹Ka’dini yi pe di ’ba ongo ngopi ’diyi Hemani pi Asafu pie, Etani be, aya molaru cozu o’duko urusi;

²⁰azini yi pe Zekaria pi, Azieli pie, Semiramoti pie, Yehieli pie, Uri pie, Eliabu pie, Maaseya pie, Benaya pie, ongo ngozu afa zaburi ngozu o’duko Alamotini vusirisi;

²¹yi ’ba Matitia pi, Elifelehu pie, Mikineya pie, Obediedomu pie, Yeyeli pie, Azazia pie, ’ba dri cezu o’di o’duko Seminitini vusirisi.

²²Kenania ’ba ambo ’ba Levini so pa ongo ma driliani; eri ’ba imba ongosini, erini ovule onduarurisi.

²³Berekia pi Elikana be, azi yini lotile ma agei tezu sanduku ma e’yosi.

²⁴Sebania pi, Yosafati pie, Netaneli pie, Amasai pie, Zekaria pie, Benaya pie, Eliezeri pie, yi atalau edeta edepi ’diyi, yi guka vu sanduku Munguni ma driliani. Obedi-edomu pi Yehia be yi jotile ma agei te sanduku ma e’yosini.

²⁵Ka’dini Daudi pi ’ba ’wara ’ba Israelini pie, ’ba asikari alifu dri cepi ’diyi be, mu di sanduku aziza Yehovanirini eji engazu Obedi, edomu vile joa ayiko be.

²⁶Te eri nga eca ’dini, Mungu ka ’ba Levini sanduku aziza Yehovanirini ejipi ’diyi ma aza ko ra, yi oso monio aziri kabiloago aziri be edetaru Yehova dri.

²⁷Daudi su bongo ndrizaru mile be nyiriri, ’ba Levini sanduku ejipi ’diyi pie dria, ’ba ongo ngopi ’diyi pie, Kenania ’ba ongo imbapiri pie, ’ba ongo ngopi ’diyi be; Daudi su de koti alinaru edele bongo mile be nyiririsiri i ma ruaa ci.

²⁸’Dinile ’ba Israelini dria eji di sanduku aziza Yehovanirini oyuta pisi, o’duko ejelekoni pie, guka amboru ’diyi pie, aya cole cori pie, otrezu o’duko urusi, afa zaburi ngozuri cozu okposi o’di pie dria.

²⁹Eri nga eca ’dini, o’du sanduku aziza Yehovanirini ecazu aku amboru Daudiniarisi, Mikali Saulo zi endre angu derisasi, ndre opi Daudini ongo turia azini aviria; onzo eri i asia ra.