Read lugbara 1 Suru Ma E'yo 16 Bible Online

1 Suru Ma E'yo 16 - lugbara bible

1 Suru Ma E'yo 16

¹Yi eji di sanduku Munguni ra, ’ba eri hema Daudini asole eriniri ma alia agadua; fe edeta vezaru azini edeta asi anzuruni Mungu ma milia.

²Daudi ka edeta vezaru azini asi anzuruni ’diyi fe de ’bo, eri fe asi ndriza ’ba nde ma dria Yehova ma rusi.

³Fe vini ’ba Israelini alu alu dri, agupi piyi dri okuyi be, enya olemi alu alu, za be za be, zabibu ’wiza ombale ngulu ngulu ’diyi alu alu indi.

⁴Eri ope ’ba Levini ma azi azi ngazu sanduku Yehovani ma drilia, e’yo erini egazu, awa’difo fezu, Yehova ma ru inzizu indi, eri Mungu Israeliniri’i.

⁵Ambo yi ma driliari Asafu’i, vutinia Zekaria’i, Yeyeli pi, Semiramoti pi, Yehieli pi, Matitia pi, Eliabu pi, Benaya pi, Obedi-edomu pi, Yeyeli pie dria, ongo ngozu afa zaburi ngozuri pisi o’di be; Asafuni indi aya co o’duko urusi;

⁶Benaya pi Yahazieli be, atalau edeta edepi ’diyi, yi ovu guka be ’dani ’dani sanduku aziza Mungunirini ma drilia.

⁷Ka’dini o’du ’dasi Daudi e’do oko inzita ’bani awa’difo fezu Yehova driri azizu, Asafu pi dri adripi be.

⁸Emi fe awa’difo Yehova dri fo! E Emi ma omve eri ma ru; emi ’ba ’yeta erini ma ovu nizaru suru ma eselia fo!

⁹Emi ngo ongo eri dri, emi ngo ongo inzitaniri eri dri; emi ma ’yo dria azi osutaru erini ’diyi ma e’yo’i!

¹⁰Emi enya emi ru erini alatararuri ma alia; ’ba Yehovani ndapi ’diyi ma asi ma ovu ayikosi!

¹¹Emi ma nda Yehovani okpo eriniri be; emi nda eri ma andreti ’dani ’dani.

¹²Emi ma ega azi erini osutaru! erini ’yele ’bo ’diyi ma e’yo, tali osutaru erini ’diyi azini e’yo liza efupi eri ma tilia ’diyi be indi,

¹³emi ori ati’bo erini Israelini ’diyi la, emi’i anzi Yakoboni erini opele ’diyi!

¹⁴Eri Yehova Mungu amaniri’i; e’yo liza erini ’diyi ovu nyaku ma alia dria.

¹⁵Emi ma ega aziza erini ma e’yo ’dani ’dani, e’yo nde erini azile cazu a’bianzi alifu alu vuri,

¹⁶aziza erini azile Iburahimu beri, azini oyo erini Isaka beri;

¹⁷eri ’ba e’yo nde ’diri ma ovuri Yakobo dri azitaru, azini Israeli dri aziza ’dani ’daniriru,

¹⁸’yozu kini, Ma nga angu Kananini fe mi dri, awazu emini awurusoru.

¹⁹O’du ndra emini ovuzu agupi ma kalafe be lamirurisi; ada, o’du ’dasi emi were tu, emi ndra nga ani’bani angu nde ma alia;

²⁰yi aci abasi araa suru vusi suru vusi, engazu angu opi aluni nyaleria cazu ’ba azini vu.

²¹Te eri a’ini ’ba aluni yi ’yezu onzi ku; ada, eri ega opi ma dria yi ma e’yosi,

²²kini, Emi ma elo ’ba mani odu osuzu yi ma dria ’bo ’diyi ku, azini emi ma ’ye nabi mani ’diyionzi ku!

²³Emi ma ngo ongo Yehova dri, emi ’ba nyakua ’diyi dria! Emi ma ece pata eriniri o’du vusi o’du vusi.

²⁴Emi ma olu diza erini ma e’yo suru ma eselia, emi ma olu azi osutaru erini ’diyi ma e’yo ’ba dria ma eselia!

²⁵Yehovani ovule ambo, ecopi inzizaru turisi; ’ba ma ru vini eri indi Mungu dria ma drilia.

²⁶A’disiku adrou suru nde ’diyini yini ovule dria wura tokonirisi; te Yehova ’ba ’bu piyini.

²⁷Inzita pi diza be ovu eri ma drilia; okpo pi ayiko be ovu pari eriniri ma alia.

²⁸Emi fe Yehova dri, emi enyati suruni ’diyi, emi fe diza pi okpo be Yehova dri fo!

²⁹Emi fe diza nderi Yehova dri, ecopi eri ma rusiri’i; emi eji afa feza, emi emu eri ma drilia! Emi ma inzi Yehovani rua ndriza e’yo alatararurinisi;

³⁰mi rua ma ya eri ma milia ya ya, mi wudrikuru dria; fe nyaku so pa ringbi indi ojakokoru ’bo.

³¹’Bu pi ma ovu ayiko be, nyaku ma onzi ayikosi, yi ma ’yo suru ma eselia, Yehovani angu nyani!

³²Miri pi ma ono, afa gapi alenia ’diyi be; amvu dria ma ovu nyonasi, afa alenia ’diyi be dria!

³³Pati oce talaa ’diyi nga di ongo ngo ayikosi Yehova ma milia ani, erini ngale emule nyaku ma e’yo lizurisi.

³⁴Emi ma fe awa’difo Yehova dri, erini ovule onyirurisi fo, asi ndriza erinirini ovule ’dani ’danirisi!

³⁵Te emi ma ’yo: Mi pa ama, Mungu pata amanirini la! Mi oku ama tualu, mi ari ama suru dri, amani awa’difo fezu ru mini, alatararori dri, i amani agazu ayikosi inzita mini! ma alia.

³⁶Yehova ma ovu asi ndrizaru, Mungu Israeliniri’i, engazu ’dani ’dani cazu kpere ’dani’dani! i Ba dria nga di Amena ’yo, Yehovani inzizu.

³⁷Ka’dini eri ku Asafu pi adripi be sanduku aziza Yehovanirini ma drilia, azi ngazu sanduku nde ma drilia ’dani ’dani ekile o’du alu alu ma azini ovulerile;

³⁸ku vini i Obedi-edomu pi adripi be kali azia drini aro; vini Obedi-edomu Yedu-: tuni mvi pi Hosa be ovuzu ’ba jotile agei tepi ’diyiru.

³⁹Ku vini Zadoki atalau edeta edepiri pi adripi erini atalau edeta edepiru ’diyi be hema Yehovani ma drilia, pari uruleru Gibeoniaria,

⁴⁰edeta vezaru ’diyi edezu Yehova dri pari edeta vezaru edezuri ma dria o’biti vusi ondre vusi ’dani ’dani, ekile e’yo dria ovupi sizaru azita Yehovani ma alia erini azile Israeli ma tia ’diyini lelerile.

⁴¹’Ba ovupi yi be ’diyi Hemani pi Yedutuni pie, ’ba acepi ’bani opele e’dale rusi rusi ’diyi be awa’difo fezu Yehova dri, asi ndriza erinirini ovule ’dani ’danirisi.

⁴²Azini ’ba ovupi yi be ’diyi Hemani pi Yedutuni be, yi ovu guka pie, aya cole co ’diyi pie ’ba otrepi o’duko urusi ’diyi dri, ovu vini o’di be indi ongo Munguni ongozu. Anzi Yedutunini, eri ’ba yi ovuzu kalitilea.

⁴³’Ba dria nga di esele co muzu yi vile jo vusi jo vusi; Daudi indi atri dri vile asi ndriza fezu jo iniri dri.