Read lugbara 1 Suru Ma E'yo 17 Bible Online

1 Suru Ma E'yo 17 - lugbara bible

1 Suru Ma E'yo 17

¹Eri nga eca ’dini, Daudini ovuria i vile joa, ’dini Daudi yo nabi Natani tia, Mi lu ma ovu jo sile mario patisiri ma alia, te sanduku aziza Yehovaniriniri ovu ’bongo ajale ajari ma etia.

²Natani nga di ’yo Daudi ma tia, Mi ’ye e’yo dria ovupi mi asiari’i, Munguni ovule mi berisi.

³Te eri nga i ’ye ini nde ’dasi ’dini, e’yo Munguni nga eca Natani vu kini,

⁴Mi mu mi ’yo ati’bo mani Daudi ma tia kini, Yehova ’yo ’dini: Mi ngani jo si ma dri mi’i mani ovuzu aleniani ku.

⁵A’disiku ma ovuni nga jo ma alia ku engazu o’du mani Israelini ofuzurisi cazu kpere andru, te ma aci hema vusi hema vusini ra, azini bere vusi bere vusi indi.

⁶Pari dria mani acizu alenia ’ba Israelini be driaria, ma ’yo e’yo azini ’ba e’yo lipi ’ba Israelini, mani azile yi ma fe nyaka ’ba mani dri ’diyi ma azi ma tia ra ya? ’yozu kini, Emi sini jo ma dri mario patisi ku a’disi ya?

⁷Ka’dini mi di nga ’yo ati’bo mani Daudi ma tia ’dini, Yehova asikari ongulumuruni ’yo ’dinile, Ma e’du mi kabilo ma licoarisi mini kabilo oceria, ’dini mi ma ovu opiru ’ba mani Israelirii ma drilia;

⁸ma ovu ndra mi be pari mini muzuria dria, ma ja ari’ba mini ma dri mi drilia dria; ma nga ru fe mi dri ekile ’ba ambo nyaku dria ’diyi ma rule.

⁹Ma nga pari pe ’ba mani Israelini ’diyi dri, ma nga yi isi ,alenia ’dini yi ma ovu pari yi ma ngulupini ma alia, ma oja yi pari azinia dika ku; ’ba onzi ma anzi ngani vini yi eza okorile dika ku,

¹⁰ekile ndra engazu o’du mani ’ba e’yo lipi ’diyi azizu yi ma ovu ’ba mani Israelini ’diyi ma driarisirile; ma nga ari’ba mini nde dria ra. Drinisi ma olu mini kini Yehovani nga mi dri jo si ra.

¹¹Eri nga eca ’dini, o’du mini ka yi de ra mini muzu mi atapi pi vu, ma nga mi ori enga mi vutia anzi mini ma eselia, te ma nga fe opi erini ma so pa kirikiri.

¹²Eri nga ma dri jo si ra, azini ma nga oguna erini opiniri fe pa sozu ’dani ’dani.

¹³Ma nga ovu eri ma ata, eri nga ovu ma mvaru; ma ngani yiki mani ’du eri vurisi ’de ku, ekile mani ndra eri ’dule ’ba mi drilia okori vurisirile,

¹⁴te ma nga fe eri ma ri ma vile joa azini suru ma vileria ’dani ’dani, azini oguna erini opiniri nga pa so kirikiri ’dani.

¹⁵E’yo ’diyi vusi dria azini ndreta ’diri vusi dria indi, Natani ’yo di e’yo Daudi ma tia ’dini.

¹⁶Opi Daudi nga di fi ri va Yehova ma milia, ’yo ra kini, Ma a’di’i ya, Yehova Mungu la, jo mani eri a’di afani, mini ani ma ejizu drile ecazu ’dopi ya?

¹⁷Te e’yo ’diri ovu te mi milia e’yo wererule, Mungu la; a’disiku mi ’yo te e’yo ati’bo mini ma jodrini ngazu ovuzu ewu izururi ra, azini mi ega e’yo mani trotro inzita ’ba amboru ’diyinile, Yehova Mungu la

¹⁸Daudi eco e’yo ngori ’yozu mi tia dika, inzita ovupi ’yezaru ati’bo mini vuri ma e’yosi ya? A’disiku mini ati’bo mini nile ’borisi.

¹⁹Yehova la, ati’bo mini ma e’yosi, ekile mi asini lelerile, mi ’ye azi ambo ’diyi, e’yo ambo ’diyi ’bazu nizaru ani.

²⁰Yehova la, ’ba azi mileni yo, kani Mungu andini yo pe lu kiri mi’i, ekile e’yo dria amani erile ama bilesi ’diyile.

²¹Suru alu nyakua ekile ’ba mini Israelinileri ngo’i, Munguni ndra mule onzele i ma ngulupisi yi ’bazu ovuzu ’ba iniruri, mini mi ru ’bazu amboru ’yeta ambo uriuriru ’diyisi, mini suru drozu ’ba mini mini onzele Misiriasi ’diyi ma drilia ’diyi.

²²Mi ’ba ’ba mini Israelini ’diyi ovuzu ’ba mi ngulupini ’diyiru ’dani; azini mi’i Yehova, mi efu Mungu yiniru.

²³Yehova la, mi fe e’yo mini ’yole ati’bo mini ma e’yosi azini jodri erini ma e’yosi ’diyi ma so pa kirikiri ’dani, te mi ma ’ye yi ekile mini te ’yole ’borile fo!

²⁴Azini mi fe ru mini ma so pa kirikiri, ovuzu inzizaru ambo ’dani ’dani, kini, Yehova asikari ongulumuruniri eri Mungu Israelini, e, Mungu Israeliniri’i; azini Daudi ati’bo miniri ma jodrini pa so kirikiri mi ma miliani.

²⁵Mungu mani la, mini e’yo ecele ati’bo mini dri ’dini kini mi nga erini jodri idri rarisi; e’yo ’disi eri onyiru ati’bo mini ma asia e’yo zizu mi tia ani.

²⁶Te di curu’do, Yehova la, mi Mungu’i, mi azi afa onyiru ’diri ati’bo mini ma tia ’bo;

²⁷fe te ayiko mi asia indi asi ndriza fezu jodri ati’bo minini dri, eri ma ovu mi drilia ’dani ’dani ani; mi’i Yehova, mini asi ndriza fele drinia rarisi, eri ovu di asi ndriza be ’dani ’dani.