Read lugbara 1 Suru Ma E'yo 18 Bible Online

1 Suru Ma E'yo 18 - lugbara bible

1 Suru Ma E'yo 18

¹E’yo ’diri ma vutia eri nga eca ’dini, Daudi ofu ’ba Filisitiaa ’diyi ra, nde yi ombasi indi, eri opa Gatu pi aku erini ambo ambo ’diyi be dria ’ba Filisitiaa ’diyi ma driarisi ra.

²Eri ofu ’ba Moabuni indi; ’ba Moabuni nga ani yi oja ati’baru Daudi dri, nga afa feza fe indi.

³Daudi fu vini Hadarezeri opi amboru Zobaari cazu kpere Hamatia, erini siria i ma suru ’baria okporu yi ara Ufirate ma tia.

⁴Daudi opa gari ombani eri vu alifu alu, azini ’ba nzupi akanyasi ’diyi alifu aziri, asikari acipi pasi ’diyi alifu kali iri pie; Daudi oli akanya garini dria ma pa isu, te eri ku azini turu alu gari ombani sezu.

⁵’Ba Suriaa ovupi Damasikia ’divi ka emu Hadarezeri opi amboru Zobaari ma aza kozu, Daudi ofu ’ba Suriani ’diyi alifu kali iri drini iri.

⁶’Dini Daudi o’ba di asikari aku agei tepi ’divi Suria Damasikiaria ci; azini ’ba Suriani ’diyi oja yi ati’baru Daudi dri, eji afa feza. Azini Yehova fe Daudini agazu pari erini muzuria dria.

⁷Daudi opa gombere ombani edele melesi ndra ovupi ati’ba Hadarezerini ma ruaa ’diyi dria ejizu Yerusalemua.

⁸Azini engazu Tibihatia, azini Kunia, aku ambo ambo Hadarezerini ’diyi, Daudi o’du mola kakau tu; mola ndesi Sulemani ede ani miri molaru pi, idiafe pie, afazu molaru ’diyi be dria.

⁹Tou opi amboru angu Hamatiari ka eri kini Daudi ofu Hadarezeri opi Zobaari ma asikari dria ’bo,

¹⁰eri pe i mvi Hadoramu ma ti opi Daudi vu eri zizu avasi, asi ndriza fezu eri dri, erini omba ’bale Hadarezeri be yi ofule rarisi; Hadarezerini ndra omba ’bale Tou berisi. Eri eji afazu wura ndu ndu be edele melesi, dahabusi, molasi ’diyi indi.

¹¹Afazu ’diyi opi Daudi ’ba yi ndu, fezu Yehova dri, tualu dahabu mele be erini opale engazu suru dria vu ’diyi be; opa ndra Edomu pia, Moabu pie, anzi Amonini pie, ’ba Filisitiaa ’diyi pie, Amaleki be dria.

¹²Isu de vini Abisai Zeruya mvi ofu ’ba Edomuni E’bu A’inia ’ba alifu mudri drini aro.

¹³Eri o’ba asikari angu agei tepi ’diyi Edomua ci; ’ba Edomua ’diyi dria oja ani yi ati’ba Daudiniru. Yehova fe Daudini agazu pari erini muzuria dria. ’Ba azi ngapi Daudi dri ’diyi

¹⁴Daudi nya di angu opiru ’ba Israelini ma drilia dria; eri li e’yo, eri ’ye e’yo kililiru ’ba erini vu dria.

¹⁵Yoabu Zeruya mvi ovu de asikari ma driliani; azini Yehosafati Ahiludi mvi ovu de ini ’ba e’yo osipi bukuariru;

¹⁶Zadoki Ahitubu mvi pi Abimeleki Abiatari mvi be, yi atalau edeta edepi ’diyi; Savisani ’ba e’yo osipiri;

¹⁷azini Benaya Yehoyada mvi ovu ’ba Keretini piyi ma drilia ’ba Peletini be; azini anzi Daudini yi ovu ’ba amboru opi ma ageia.