Read lugbara 1 Suru Ma E'yo 22 Bible Online

1 Suru Ma E'yo 22 - lugbara bible

1 Suru Ma E'yo 22

¹Daudi nga di ’yo kini, Jo Yehova Munguni eri ’di’i, pari edeta vezari edezu ’ba Israelini driri eri awa’di’i.

²Daudi azi aziza ani’ba ovupi Israelia ’diyi okuzu dria tualu, eri pe onduou azi ngapi onisi ’diyi ma ti muzu oni edezu jo Munguni sizu.

³Azini Daudi ede aya kakau musumariru jotile kalitilea ’diyini, azini afa eciza ’diyisi, azini mola kakau kalafe kokoru,

⁴azini mario pati kalafe lakokoru; ’ba Zidonini, azini ’ba ovupi Turoa ’diyini mario pati ejile Daudi vu kakaurisi.

⁵Te Daudi ’yo ra, Ma mvi Sulemani ovu nga mvani, ruani nga ’bele’beleru, te jo ’bani ngale sile Yehova driri ma ovu inzita be amboru tu, ru kuza be, azini dizani ma ca angu ndu ndu ma alia dria; ma nga di ani edeta ede erisi ngonde beni. E’yo ’disi Daudi ede di afa tu de nga eri drani ku.

⁶Eri nga di i ma mvi Sulemanini omve, azi tinia jo sizu Yehova dri, eri Mungu Israeliniri’i.

⁷Daudi ’yo i mvi Sulemani ma tia kini, Ka te mani egale ma asiarisi, ma le te ma ma si jo ru Yehova Mungu manini dri.

⁸’Te e’yo Yehovani eca ma vu ’yozu kini, Mi ada ari ’bani tu ambamba, mi’di a’di tu; mi ngani jo si ru mani dri ku, a’disiku mini ’ba ma ari adale nyaku dria ma ma milia turisi.

⁹Mi ndre, yi nga mva osi mi dri, eri’i ngapi ovupi ’ba ava lizaniri. Te ma nga ava liza fe eri dri ari’ba eri acepi kuru ’diyi ma drilia dria; eri ma runi ngale ovule Sulemani’irisi, azini ma nga asi anzuru pi fe asi e’yereri be Israeli dri ewu erinirisi.

¹⁰Eri nga jo si ru mani drini. Eri nga ovu mva mani, ma nga ovu ata erini, ma nga oguna erini opiniri fe pa sozu kirikiri Israeli ma drilia ’dani ’dani.

¹¹Te curu’do, ma mvi, Yehova ma ovu mi be, mi ma ’ye drilebasi, mi si; Yehova Mungu minini, ekile erini e’yo ’yole misi ’borile fo!

¹²Bani Yehova ma fe mi dri egata onduaru e’yo vaza kililiruri be, eri ma azi mi Israeli ma e’yosi indi, ’dini mi ma mba azita Yehova Mungu minini ma ta beni.

¹³’Dini mi nga ovu drileba be mi ka mi asi ’ba azita piyi e’yo liza be ndra Yehovani azile Musa ma tia Israeli ma e’yosi ’diyi ’yezu. Mi ma ovu okporu asi teza be. Mi ma ru ku; mi asi ma oti ku indi.

¹⁴Te mi ndre, candi mani ma alia ma ede jo Yehovani ma e’yosi onzi meleni alifu turu alu, azini dahabuni alifu pale alifu, azini molani ayani be karakarau nzizani lakokoru yini ovule kakaurisi; pati jo sizu ’diyi pie oni pie, ma ede yi ra, Te mi ceo afa azini o’ba drinia indi.

¹⁵Azini vini indi, mi ovu ’ba azi ngapi ’diyi be kakau: ’ba oni gapi ’diyi, ’ba oni pi ma rua edepi pati pie ’diyi pie, onduou ovupi ondua be azi ndu ndu ngazu ’diyi be dria;

¹⁶mele pi, dahabu pie, mola pie, aya pie dria, kalafeni di yo. Mi enga di ’ye, Yehova ma ovu mi be!

¹⁷Azini vini indi Daudi azi ’ba ’wara Israelia ’diyi dria ma ko i ma mvi Sulemani ma aza, ’yozu kini,

¹⁸Yehova Mungu eminiri ovuni emi be ku ya? Azini eri feni emi dri ava liza kalasi dria ku ya? Erini ’ba ovupi angu nde ma alia ’diyi fele ma dri ’borisi; azini angu nde ovu ndezaru ’bo Yehova ma drilia, azini ’ba erini ma drilia indio

¹⁹Curu’do emi ma ’ba emi asi orindi emini be Yehova Mungu eminiri ndazu. Emi lenga, emi si pari alatararu Yehova Mungunirini, sanduku aziza Yehovanirini, afazu alatararu Munguni ’diyi be, ejizu jo ’bani ngale sile ru Yehovani driri ma alia.