Read lugbara 1 Suru Ma E'yo 28 Bible Online

1 Suru Ma E'yo 28 - lugbara bible

1 Suru Ma E'yo 28

¹Daudi oku ’ba ’wara Israelini ’diyi dria Yerusalemua, ’ba ’wara suruni ’diyi pie, ’ba enyati ’ba azi ngapi opi dri amutisi ’diyi ma dri cepi ’diyi pie, ’ba ’ba alifu ma dri cepi ’diyi pie, ’ba ’ba turu ma dri cepi ’diyi pie, ’ba afa dria opi vile ’diyi ma drilia anzi erini be ’diyi pie, ’ba ’ba dri cepi ’diyi pie, ’ba okporu ’diyi pie, adani ’ba dria okporu asi teza be ’diyi pie dria.

²Vutinia opi Daudi so pa uru, ’yo ra kini: Emi eri e’yo ma tia, ma adripi, azini ’ba mani ’diyi. Ma’iruni, ma osu ndra ma asia jo ava lizani sizu sanduku aziza Yehovanirini dri, pari Mungu amanirini pa ’bazuri dri indio Ma ovu ndra ngonde jo nde sizu ra ’bo,

³te Mungu ’yo ma tia kini, Mi ngani jo si ru mani dri mi’i ku, a’disiku mini ovule ’ba a’dinirisi, azini mini ari ’bani adalerisi.

⁴Te ti, Yehova Mungu Israeliniri epe ndra ma engazu ori’ba dria ma atini ma eselia ovuzu opiru Israeli ma drilia ’dani ’dani; erini Yudani pele ovuzu ’ba ’ba dri cepiriru ’borisi; te suru Yudani ma eselia eri pe ndra ori’ba ma atini, azini anzi ma atini ’diyi ma eselia eri ovu ayikosi ma ’bazu opiru ’ba Israelini dria ma ’drilia.

⁵Azini anzi mani dria ’diyi ma eselia (Yehovani anzi fele ma dri kakaurisi) eri pe ma mvi Sulemani’i rizu oguna opi Yehovaniri ma dria i Israelini ma drilia.

⁶’Yo vini ma tia kini, Sulemani mi mvini nga jo pi si ma dri iriidri beni, mani eri pele ovuzu ma mvaru ’borisi, te ma nga ovu eri ma ataru.

⁷Te ma nga opi nyaza erini fe pa sozu kirikiri ’dani, eri ka nga ovu asi adarusi azita mani piyi ’yezu e’yo liza mani ’diyi be, ekile o’du ’disirile.

⁸E’yo ’disi, ’ba Israelini dria ma milia, ’ba Yehovani yi okupi ’diyi, azini Yehova ma milia indi, emi ndre azini emi ndru azita dria Yehova Mungu eminirini; ’dini emi ma nya angu onyiru ’diri afa eminiru beni, azini emi nga eri ku awitaru anzi emini ’diyi dri emi vutia ’dani ’dani beni.

⁹Te mi’i, ma mvi Sulemani la, mi ma ni Mungu mi atiniri, mi ma nga azi eri dri asi kililirusi azini asisile avarusi ceni indi; Yehovani asi ’bani dria ndale, azini e’yo ’bani asisile drole drinia yi asia egatasi ’diyi valenirisi. Mi ka eri ndru ra, mi nga eri isu ra; te mi ka eri ku ra, eri nga mi ’be amve iriti.

¹⁰Mi ma ovu di mile be ani, Yehovani mi pele sizu pari alatararu turi dririsi; mi ovu di okporu, mi ’yeo

¹¹Vutinia Daudi nga i mvi Sulemani dri jobileko hekaluni pi ma wura fe, jo erini azini ’diyi pie, jo erini pari lonyi ta mbazu ’diyi pie, jo ale aliza erini uruleru ’diyi pie, jo ale erini alealeru ’diyi pie, pari oguna yikinirini pie dria;

¹²fe wura dria Orindini ecele eri dri ’diyi, jo Yehovani ma iriidri ’diyi pini, jo dria ageinia ’diyi pie, pari lonyi jo Mungunirini ma ta mbazu ’diyi pie, pari afa alatararu fele Mungu dri ’diyi ma ta mbazu alenia ’diyi pie dria;

¹³’dinile indi amuti atalau edeta edepi ’diyinisi, ’ba Levini pie, azini azi ngaza dria jo Yehovani ma aliari pie, afazu azi ngazu jo Yehovani ma alia ’diyi pie dria.

¹⁴Eri o’bi mele afazu meleni ’diyisi nziza yiniri vusi, afazu dria azi ndu ndu ngazu ’diyisi; eri o’bi dahabu afazu edele dahabusi ’diyisi nziza yiniri vusi, afazu dria azi ndu ndu ngazu ’diyisi.

¹⁵O’bi vini indi mele nzizasi talapati meleru ’diyisi, tala yini were ’diyi be, nziza yiniri vusi nziza yiniri vusi, talapati driasi tala erini were ’di yi be; azini ’dinile indi talapati dahaburu ’diyisi eri o’bi dahabu nzizasi nzizasi, talapati dria alu aluni, tala erini were ’diyi be, ayuza tala nde alu aluni ma azita vusi.

¹⁶Azini eri o’bi mele nziza vusi mesa mikate ecetarurini ’diyisi, mesa vusi dria alu alu, o’bi dahabu mesa dahaburu ’diyini indi;

¹⁷aya si be za sozu ’diyi pini, awala pie, okelea pie, mele alatararisi; azini oteku edele melesi ’diyisi, eri o’bi mele nzizasi nzizasi, oteku dria alu alusi; oteku edele dahabusi ’diyisi eri o’bi dahabu nzizasi nzizasi yi dria alu alusi;

¹⁸eri o’bi nzizasi mele edele alaruri pari obiese edezurisi; o’bi mele wura gari ombanirisi, adani kerubi i opile ajapi sanduku aziza Yehovanirini a’bupi ’diyi.

¹⁹’Ba fe mani e’yo ’diyi dria vazu, Daudi kini, e’yo siza engapi Yehova vuri ma alia, adani wura ’ diri ma azi dria.

²⁰Daudi nga di ’yo i mvi Sulemani ma tia kini, Mi ma ovu di okporu asi teza be, mi ’yeo Mi ru ku, mi asi ma oti ku indi; Yehova Mungu, eri Mungu maniri, erini ovule mi berisi. Eri ngani mi nde ku, ngani mi ku ku indi, de nga azi ngaza jo Yehovani ma aliari deni i dria ku.

²¹Mi lu amuti atalau edeta edepi ’diyini indi, ’ba Levini pie, azi ngaza dria jo Yehovani ma aliari ngazu; azi ndu ndusi onduou azi ngapi avasi ’diyi nga ovu mi beni, azi ngaza driasi; ’ba ’ba dri cepi ’diyi pie, ’ba dria pie nga yi ma rua fe dria azita mini ’yezu indi.